Ang Iyang Report Nakahatag ug Dakong Impresyon

Sa iyang kataposang tuig sa tunghaan, si Ginny, nga usa sa mga Saksi ni Jehova sa Tinipong Bansa, nakabaton ug maayong kahigayonan nga makapahayag bahin sa iyang relihiyon. “Gihatagan sa akong magtutudlo ang among klase ug asaynment sa pagsulat ug usa ka taas nga report aron kami makagraduwar,” siya miingon. “Giingnan nako siya nga ang gusto nakong isulat mao ang bahin sa mga Saksi ni Jehova sa mga kampo konsentrasyon sa Nazi.”

Gitugotan sa magtutudlo si Ginny sa pagsulat bahin sa maong topiko. “Gikulbaan ko sa dihang miabot na ang panahon aron akong ihatag ang akong sinulat ug isaysay kini sa klase,” miadmitir si Ginny. “Wala ko mahibalo kon unsay isulti sa akong mga klasmet o kon kataw-an ba ko nila.”

Gisugdan ni Ginny ang iyang presentasyon pinaagi sa pagpangutana: “Nahibalo ba kamo kon kinsay nagsul-ob ug uniporme nga may Star of David didto sa mga kampo konsentrasyon sa Nazi?” Ang tanan miingon, “Ang mga Hudiyo.” Dayon nangutana siya kon nahibalo ba sila kon kinsay nagsul-ob ug uniporme nga may purpurang trianggulo. Walay mitubag. “Gisultihan ko sila nga ang nagsul-ob niini mao ang mga Saksi ni Jehova,” matod ni Ginny.

Ang magtutudlo ug ang klase nakadayeg sa impormasyon ni Ginny. “Nahingangha sila sa pagkahibalo nga puwede unta nga maangkon sa mga Saksi ni Jehova ang kagawasan pinaagi sa pagpirma lang ug usa ka pirasong papel nga nagsalikway sa ilang pagtuo,” miingon si Ginny. “Sa ulahi gisultihan ako sa uban nakong mga klasmet nga kaniadto bugalbugalan nila ang mga Saksi ni Jehova, apan sa sunod higayon nga dunay Saksing motuktok sa ilang balay, maminaw na sila.”

Si Ginny nakadawat ug upat ka gradong A alang sa iyang report ug presentasyon. “Dili lang taas ang akong grado,” siya miingon, “kondili nakabaton usab ako ug dakong kahigayonan sa pagpahayag sa akong pagtuo!”

[Hulagway sa panid 19]

Daghang Saksi ni Jehova ang gitanyagan ug kagawasan sa kondisyon nga ilang pirmahan kini nga dokumento nga nagsalikway sa ilang pagtuo

[Credit Line]

Courtesy of United States Holocaust Memorial Museum