Gikan sa Among mga Magbabasa

Korte Suprema Salamat sa panghapin nga serye nga “Ang Korte Suprema sa T.B. ug ang Kagawasan sa Panulti.” (Enero 8, 2003) Kining mga artikuloha nagpakita kon sa unsang paagi ang pagpihigpihig sa mayoriya mahimong lantawon usahay ingong husto ug dili malalis. Ang kadaghanan nag-ingon nga maayo ra ang pagtuo sa bisan unsa nga gusto nimo apan gidili ang pagsulti niana ngadto sa uban. Human mabasa kining mga artikuloha, mas madayganon na akong makigsulti sa uban bahin sa akong relihiyosong mga pagtuo.

S. O., Japan

Ang kaso sa Stratton, Ohio, maoy usa gayod ka kadaogan alang sa kagawasan sa panulti. Ang paborableng desisyon mahimong dunay makapakombinsir nga epekto sa ubang dapit sa kalibotan, sama dinhi sa Pilipinas, diin sa pipila ka dapit ang mga Saksi ni Jehova gibabagan sa sekular nga mga awtoridad nga nagbaod nga kinahanglang mokuhag permiso alang sa pagpamalaybalay. Mapasalamaton kami niining gikinahanglan kaayo nga kadaogan.

N. E., Pilipinas

Pagdumot Kinasingkasing ko kamong pasalamatan sa eksperyensiya ni José Gomez, nga giasoy diha sa artikulong “Nakalingkawas Gikan sa mga Talikala sa Pagdumot.” (Enero 8, 2003) Sulod sa daghang tuig, nasinati ko usab ang pagmaltratar. Karon wala na ako magdumot kang bisan kinsa. Ang giingon ni José, “Asa na kaha ko karon kon dili pa tungod sa kaluoy ni Jehova?” mapadapat usab kanako. Salamat niining talagsaong eksperyensiya kon sa unsang paagi iyang nabuntog ang iyang pagdumot.

N. T., Japan

Pagmabdos nga Malayo sa Peligro Gusto ko kamong pasalamatan sa artikulong “Himoa ang Imong Pagmabdos nga Malayo sa Peligro.” (Enero 8, 2003) Kining artikuloha nakahatag kanakog tin-awng panglantaw kon unsay nalangkit sa pagmabdos. Ako 32 anyos, ug gikinahanglan ko gayod kining artikuloha. Nasabtan na nako karon kon unsay angay kong buhaton aron malayo sa peligro ang pagmabdos ug ipakita ang pagpabili sa maong talagsaong gasa.

B. C., Italya

Kining artikuloha naghisgot nga ang babaye mahimong hilingon kon duna ba siyay group B streptococcus tali sa 26 ug 28 ka semana. Ang girekomendar nga gidugayon sa paghiling karon maoy tali sa 35 ug 37 ka semana sa pagmabdos ug dili 26 ngadto sa 28 ka semana. Ang mga magbabasa niining artikuloha lagmit mangutana gayod sa ilang mga doktor kon nganong wala sila hilnga sa 26 ngadto 28 ka semana. Ang ilang mga doktor mahimong magsalikway sa Pagmata! ingong kasaligang tinubdan sa impormasyon alang sa ilang mga pasyente.

L. S., Tinipong Bansa

Ang “Pagmata!” nagtubag: Ang among mga gula giandam mga bulan nga abante aron mahatagag panahon ang paghubad niini ngadto sa kapin sa 80 ka pinulongan. Sa panahon nga gisulat ang artikulo bahin sa pagmabdos nga malayo sa peligro, tali sa 26 ug 28 ka semana mao ang gidawat sa daghan nga hustong panahon alang sa paghiling. Apan, sa Agosto 2002, ang American Academy of Pediatrics nagpagula ug impormasyon nga gihatag kanila sa U.S. Centers for Disease Control. Sa pagkakaron, sama sa hustong giingon sa maong magbabasa, ang girekomendar nga panahon sa pagpahiling maoy sa 35 ngadto sa 37 ka semana.

Sa panid 13, ang usa ka potnot nag-ingon nga ang iron ug folic acid mahimong makaplagan diha sa atay ug mga nut. Apan, ang atay adunay daghang bitamina A​—nga, sumala sa giingon sa inyong artikulo, peligroso alang sa masuso.

B. J., Britanya

Ang “Pagmata!” nagtubag: Salamat sa maong pasidaan.

Pagpit-os sa Isigkaingon Ako 15-anyos nga dalagita ug nalisdan sa pagsagubang sa pagpit-os sa isigkaingon. Nalipay pag-ayo ako sa pagbasa sa artikulong “Mga Batan-on Nangutana . . . Sa Unsang Paagi Masagubang Nako ang Pagpit-os sa Isigkaingon?” (Disyembre 22, 2002) Ang pagbasa bahin sa ubang mga batan-on nga may susamang mga problema nagpasalig kanako nga wala ako mag-inusara. Masagubang namo ang pagpit-os sa isigkaingon pinaagi sa tabang sa bugtong Labing Gamhanan nga Diyos. Daghan kaayong salamat sa maong impormasyon, nga miabot sa hustong panahon.

K. R., Australia