Pagbisita sa Jerusalem Diha sa Quebec

ANG mga bisita sa modernong-adlawng Jerusalem makahanduraw kon sama sa unsa ang kinabuhi balik sa panahon sa Bibliya. Apan, kining karaang siyudad aktuwal nga makita sa talagsaong paagi nga mga 8,500 kilometros sa kasadpan sa Jerusalem diha sa gamayng lungsod nga nahimutang sa St. Lawrence River sa Canada. Didto, makita sa mga bisita ang dako nga mga talan-awon sa Jerusalem ug sa mga palibot niini. Sa unsang paagi posible kana? Ania ang katin-awan.

Gibutang diha sa palingin nga bilding sa lungsod sa Sainte Anne de Beaupré, Quebec, ang usa sa kinadak-ang dibuho sa Jerusalem, ang Great Cyclorama. Kining dako kaayong dibuho maoy 14 metros ang gitas-on ug 110 metros ang sirkumperensiya. Bisan tuod dili eksakto ang tanang detalye niini, ang dibuho makaikag gihapon sa mga estudyante sa Bibliya, kay kini naghatag ug realistiko kaayong paglarawan sa kinabuhi sa Jerusalem sa panahon sa Bibliya.

Sa magtan-aw sa dibuho diha sa lungtoranan sa sentro sa bilding, makita sa mga bisita ang kabanikanhan palibot sa unang-siglong Jerusalem. Samtang magsubay ang ilang mga mata sa tibuok nga 360-grado nga talan-awon, ang gibantog nga siyudad mismo modayag uban sa dagkong mga paril niini, maanindot nga templo, ug maluho nga mga palasyo. Diha sa daplin sa dibuho, laing klarong talan-awon modayag nga naglarawan sa kataposang mga yugto sa yutan-ong kinabuhi ni Jesus. Ang tumatan-aw niining talagsaong dibuho mobati nga mora gayod kini ug tinuod nga daw anaa ka mismo sa lugar, nga naglakawlakaw uban sa mga tawo diha sa karsada sa Jerusalem.

Sa katingalahan, kining makaikag kaayong dibuho nga may three-dimensional nga epekto dugay na kaayong gihimo. Sa pagkatinuod, si Paul Philippoteaux, nga usa ka iladong pintor sa Paris, nagdibuho niini sa mga tuig 1878 hangtod sa 1882. Lima pa ka pintor​—duha gikan sa Tinipong Bansa, duha sa Pransiya, ug usa sa Inglaterra​—mitabang niya sa pagtapos sa iyang obra maestra. Apan, ang orihinal nga nagmugna sa ideya sa dibuho mao ang Aleman nga pintor nga si Bruno Piglhein, nga desidido sa paggamag usa ka butang aron ang mga tawo makabaton ug kasayoran bahin sa adlaw-adlawng kinabuhi panahon sa Bibliya. Dihang kini natapos didto sa Munich, Alemanya, ang dibuho gieksibit diha sa dagkong mga kaulohan sa Uropa. Sukad sa 1895 kini permanente nang gidispley didto sa Canada.

[Picture Credit Line sa panid 31]

All photos: Cyclorama de Jérusalem inc.