Usa ka Timbang nga Panglantaw Bahin sa Uso

ANG Bibliya nag-ingon nga ang Diyos “naghimo sa tanang butang nga matahom sa panahon niini.” (Ecclesiastes 3:​11, New International Version) Makita nato ang katahom bisan diin sa kalibotan palibot nato. Makita usab nato kini diha sa mga tawo.

Ang tumong sa tigdisenyo sa uso mao ang pagpauswag sa katahom pinaagi sa mga sinina nga atong gisul-ob. Apan, sumala sa gipakita sa nag-unang artikulo, ang industriya sa uso nagbag-o usab sa ideya kon unsay giisip nga matahom. Ang propesor sa sikolohiya nga si Ruth Striegel-Moore nag-ingon: “Naanad na kaayo kita sa pagkakita ug niwang kaayo nga mga babaye, nga naghunahuna kita nga mao kanay giisip nga matahom.”

Klaro nga dili maalamon nga tugotan ang hunahuna sa kalibotan karon bahin sa katahom nga magpugos kanato sa pagpahiuyon niini. Sa iyang librong Always in Style, si Doris Pooser nagpunting nga “ang babaye karon wala na magkinahanglan ug pagbag-o o pagtakoban sa iyang lawas kon motungha ang usa ka bag-ong ‘sumbanan.’” Sa pagkatinuod, nganong tugotan  man nato ang media nga mopatuman sa kaugalingon niining sukdanan? “Mas menos ang kahigwaos nga bation kon kita magmakontento sa atong kaugalingong mga kinaiya, imbes magpunayg usab-usab sa atong panagway,” matod ni Pooser.

Walay-Paglubad nga Katahom

Ang pagsalig sa kaugalingon ug pagkatagbaw sa kinabuhi nagdepende sa mas daghang butang inay kay sa katahom lamang. “Ang tinuod nga kalipay naggikan sa kahiladman,” misulat si Judy Sargent, kanhing nag-antos sa anorexia. “Wala kini magdepende sa timbang sa usa.” Ang Bibliya nagkomento pa ug dugang bahin niini. “Ang inyong katahom,” misulat si apostol Pedro, “kinahanglang gilangkoban sa inyong tinuod nga sulod nga pagkatawo, ang walay-paglubad nga katahom sa malumo ug malinawon nga espiritu, nga maoy kinalabwan ug bili sa panglantaw sa Diyos.”​—1 Pedro 3:​4, Today’s English Version.

Ang walay-paglubad nga katahom nga gihisgotan ni Pedro molabaw sa pisikal nga pagkamadanihon tungod sa pagkadumalayon niini ug sa bili niini sa mga mata sa Diyos. Daghang siglo kanhi, usa ka maalamong hari nag-ingon: “Ang pagkamadanihon mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.”​—Proverbio 31:30.

Bisan tuod ang pisikal nga katahom mas makapadani tingali karon, daghang tawo ang nagtahod gihapon sa usa ka tawo nga nagpakita ug Kristohanong mga hiyas. Gitambagan ni apostol Pablo ang mga Kristohanon: “Isul-ob [ninyo] ang bag-ong  pagkatawo, . . . ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.”​—Colosas 3:​10, 12.

Ang uso, tungod sa kinaiya niini, maoy lumalabay. Bisan pag lantawon kini sa labing maayong kahimtang, ang kinabag-ohang estilo makapatahom lamang kanato sa mubo nga panahon. Apan ang bisan unsang maayong impresyon nga atong nahimo dali rang madaot kon ang atong panagway wala duyogi sa maayong personalidad. Hinumdomi, “ang bunga sa espiritu”​—lakip na ang mga hiyas nga gugma, kalipay, pakigdait, hataas-nga-pailob, pagkamaayo, ug pagpugong sa kaugalingon​—dili gayod mawala sa uso.​—Galacia 5:​22, 23; 1 Timoteo 2:​9, 10.

Apan, tinuod nga haom nga mohatag ug angayng pagtagad sa atong pamesti. Si Aline, nga taga-Pransiya, miangkon nga malisod ang pagkahimong timbang niining bahina. “Sa tin-edyer pa,” siya nag-ingon, “naikag gayod ako sa mga sinina. Gusto nakong sundon ang kinaulahiang uso tungod kay naghatag kini kanako ug pagsalig-sa-kaugalingon. Ug mas maayo pa gani kon makapalit ako ug mga sinina nga mahalon ug marka.

“Apan sa dihang mihamtong na ko,” si Aline nagpadayon, “kinahanglang makakat-on ako sa pagsuportar sa akong kaugalingon, ug nagsugod sab ko sa paggugol sa dakong bahin sa akong panahon diha sa Kristohanong ministeryo. Akong naamgohan nga kon gusto nakong magkinabuhi nga dili sobra sa akong maabot, dili na mahimong maulipon ako sa uso. Nagsugod ako sa pagpamalit sa akong mga sinina panahon sa baratilyo o diha sa mga tindahan nga naghatag ug diskuwento. Akong nakaplagan nga mahimong maayo gihapon ang akong pamesti​—pero un-kuwarto ra sa presyo ang akong magasto. Ang sekreto anaa sa pagkakat-on sa pagpamalit ug mga sinina nga mobagay nimo, praktikal, ikaparis nimo sa uban nimong mga sinina, ug dili daling mawala sa uso. Imbes tugotan ang uso nga modiktar kon unsay akong angayng paliton, sa pagkakaron maningkamot ako sa pagdesisyon kon unsang estilo ang mobagay nako. Dili ko moingon nga ang mga sinina dili na hinungdanon nako. Apan ang akong bili nagdepende ug labaw pa kay sa akong panagway lamang.”

Sa usa ka katilingban diin ang panggawas nga panagway giisip nga mas hinungdanon kay sa tinuod nga mga hiyas, maayong hinumdoman sa mga Kristohanon ang ugdang nga pahinumdom sa Bibliya: “Ang tanan nga anaa sa kalibotan​—ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi sa usa​—wala magagikan sa Amahan, apan nagagikan sa kalibotan. Dugang pa, ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:​16, 17.

[Hulagway sa panid 9]

Ang tinuod nga katahom naggikan sa kahiladman, dili gikan sa imong gisul-ob

[Hulagway sa panid 10]

Pilia ang mga sinina nga praktikal ug ikaparis sa uban nimong mga sinina