Mga Batan-on Nangutana . . .

Angay ba Akong Magpapatik sa Akong Panit?

“Nindot ang ubang mga patik. Kini artistiko kaayo.”​—Jalene. *

“Duha ka tuig na akong nangandoy nga makapapatik.”​—Michelle.

ANG mga patik morag makita bisan diin. Ang mga musikero sa rock, iladong mga atleta, modelo, ug mga artista magpagawal sa ilang mga patik. Daghang tin-edyer ang nagsundog kanila, nga mapasigarbohong nagpakita sa mga patik diha sa ilang mga abaga, kamot, hawak, ug mga buolbuol. Si Andrew nangatarongan: “Uso ang mga patik. Depende ra nimo kon magpapatik ka o dili.”

Ang World Book Encyclopedia nag-ingon: “Ang pagpapatik mao ang batasan sa pagbutang ug permanenteng mga disenyo diha sa lawas. Ginahimo kini pinaagi sa pagtusok ug gigming nga mga buho sa panit ginamit ang hait nga pangtusok, bukog, o dagom nga gituslob sa substansiya nga may natural nga mga kolor.”

Bisan tuod dili sayon ang pagkuhag eksakto nga estadistika, ang usa ka reperensiya nagbanabana nga 25 porsiyento sa tanang 15 ngadto sa 25 anyos sa Tinipong Bansa ang dunay patik. Si Sandy miingon: “Popular kini.” Nganong gusto man kaayong magpapatik ang ubang mga batan-on?

Nganong Popular Kaayo?

Alang sa ubang mga batan-on, ang pagpapatik maoy usa ka paagi aron ikapakita ang pagkaromantiko. Si Michelle miasoy: “Gipapatik sa akong magulang nga lalaki diha sa iyang buolbuol ang ngalan sa iyang trato sa una.” Ang problema? “Dili na sila trato karon.” Sumala pa sa magasing Teen, “gibanabana sa mga doktor nga kapin sa 30 porsiyento sa tanang nagpatangtang sa patik maoy mga tin-edyer nga babaye nga gustong ipapala ang ngalan sa ilang trato kaniadto.”

Para sa pipila ka mga batan-on ang mga patik maoy mga buhat sa arte. Alang sa uban kini maoy mga simbolo sa pagkaindependente. “Akoy magbuot sa akong kinabuhi,” matod pa ni Josie, nga midugang sa pag-ingon nga ang pagpapatik “mao lamang ang kinadak-ang personal nga desisyon nga akong nahimo sukad.” Ang pagpapatik  nagpaposible sa ubang mga batan-on sa pag-eksperimento​—sa pagbati nga silay nagbuot sa ilang panagway. Ang mga patik magsilbi usab nga simbolo sa pagrebelde o sa dili-naandang mga estilo sa kinabuhi. Busa ang ubang mga patik dunay bastos nga mga pulong ug drowing o hilas nga mga eslogan.

Bisan pa niana, ang kadaghanang batan-on nadala ra tingali sa uso. Apan, tungod ba kay morag ang tanan nagpapatik, nagpasabot na nga ikaw kinahanglan pod nga magpapatik?

Ang Karaang Arte sa Pagpatik

Ang pagpatik maoy karaan na nga batasan. Sa Ehipto ug Libya dihay nakit-ang mga mummy nga may patik nga naglungtad na ginatos ka tuig kanhi sa wala pa si Kristo. May nakaplagan usab nga mga mummy nga may patik didto sa Amerika del Sur. Daghang larawan nga gigamit ingong patik dunay direktang koneksiyon sa pagsimba sa paganong mga diyos. Sumala pa sa tigpanukiduki nga si Steve Gilbert, “ang kinaunahang nahibaloang patik dili usa ka disenyo, kondili usa ka larawan nga naghawas sa diyos nga si Bes. Sumala pa sa mitolohiya sa Ehipto, si Bes mao ang mahilayong diyos sa hudyaka.”

Dunay rason nga gidid-an sa Moisesnong Balaod ang katawhan sa Diyos sa pagpatik sa ilang panit. Ang Levitico 19:28 nag-ingon: “Dili ninyo samadsamaran ang inyong unod alang sa usa ka namatayng kalag, ug dili kamo magbutang ug patik sa inyong kaugalingon. Ako mao si Jehova.” Ang paganong mga magsisimba, sama sa mga Ehiptohanon, nagpatik sa mga ngalan o mga simbolo sa ilang mga diyosdiyos diha sa ilang mga dughan o mga bukton. Pinaagi sa pagtuman sa balaod ni Jehova sa pagdili sa pagpapatik, ang mga Israelinhon nadayag nga lahi sa ubang mga nasod.​—Deuteronomio 14:​1, 2.

Bisan tuod ang mga Kristohanon karon dili na ilalom sa Moisesnong Balaod, ang pagdili niini sa pagpapatik makatukmod kanato sa pagpamalandong. (Efeso 2:15; Colosas 2:​14,  15) Kon ikaw usa ka Kristohanon, seguradong dili ka gusto nga butangag mga marka ang imong lawas​—bisag temporaryo ra​—nga makapahinumdom bahin sa paganismo o bakak nga pagsimba.​—2 Corinto 6:15-18.

Mga Kapeligrohan sa Panglawas

Dunay mga kapeligrohan usab sa panglawas nga angay nimong tagdon. Si Dr. Robert Tomsick, usa ka associate professor sa dermatolohiya, mikomento: “Ang pagpatik maoy pagsamad sa imong panit ug pagbutang niinig substansiya nga may kolor. Bisag mabaw ra ang dulot sa dagom, kon masamdan ang imong panit, nameligro ka nga maimpeksiyon sa bakterya o virus. Ako nagtuo nga sa katibuk-an peligroso [ang pagpapatik].” Si Dr. Tomsick nagpadayon: “Sa dihang makasulod na ang may-kolor nga substansiya, bisag walay impeksiyon, kanunay anaa ang posibilidad nga ikaw maalerdyik, manghubag ang panit ug maalerdyik sa tusok sa dagom nga maoy hinungdang mopula, mohubag, mopakpak ug mokatol ang panit.”

Bisan pag gituyo nga mahimong permanente ang mga patik, dunay lainlaing mga paagi nga gigamit sa pagwala niini: Pagpanas pinaagig laser (pagsunog sa patik), operasyon (laplapon ang patik), dermabrasion (pagkuskos sa panit ug alambreng pangkuskos aron makuha ang una ug ikaduhang lut-od sa panit), salabrasion (paggamit ug tinimpla nga may asin aron ihumol sa gipatikang panit), ug pag-ulat (pagtangtang sa patik pinaagig asido aron kini maulatan). Kini nga mga pamaagi mahal ug sakit. “Ang pagpatangtang sa patik pinaagig laser mas sakit kay sa pagpapatik,” nag-ingon ang magasing Teen.

Unsa Kahay Hunahunaon sa Uban?

Kinahanglan usab nga imong hatagag seryosong pagtagad kon unsay bation sa uban kon ikaw magpapatik, tungod kay daghan ang dili moangay niini. (1 Corinto 10:29-33) Tungod sa kapritso, si Li nga usa ka babayeng taga-Taiwan nagpapatik sa 16 anyos pa siya. Karon siya 21 anyos na ug nagtrabaho sa opisina. “Lainan ko kon tutokan sa akong mga kauban sa trabaho ang akong patik,” miadmitir si Li. Si Theodore Dalrymple, usa ka propesyonal maylabot sa pangutok nga taga-Britanya, nag-ingon nga alang sa daghang tawo, ang mga patik “maoy makitang ilhanan nga ang usa ka tawo . . . membro sa mapintas, bangis, batok-katilingban, ug kriminal nga mga grupo.”

Ang artikulo diha sa magasing American Demographics may susama usab nga komento: “Tin-aw nga giisip nga makuyaw sa kadaghanang Amerikano kon ang usa ka tawo dunay patik o tusok sa lawas nga makita. Otsentay singko porsiyento [sa mga batan-on] mouyon nga ‘ang mga tawong dunay mga patik nga makita . . . angayng masayod nga kining matanga sa pagpaila sa kaugalingon lagmit nga makababag sa ilang karera o personal nga mga relasyon.’”

Hunahunaa usab kon ang imong desisyon sa pagpapatik makatabang o makadaot ba sa imong pag-angkong Kristohanon. Dili kaha ‘makapandol’ kini sa uban? (2 Corinto 6:3) Tinuod, ang patik sa ubang mga batan-on matabonan sa ilang mga sapot. Bisan ang ilang mga ginikanan tingali wala mahibalo bahin niining sekretong mga patik. Apan pagbantay! Mabisto ang imong sekreto sa dihang moadto ka sa doktor panahon sa emerhensiya o sa dihang maligo diha sa eskuylahan! Mas maayong “magmaminatud-on sa tanang butang,” nga likayan ang binuang nga pagpanglimbong.​—Hebreohanon 13:18.

Sama sa tanang uso, ang kaikag sa pagpapatik mawala ra sa paglabay sa panahon. Sa pagkatinuod, aduna bay besti​—tingali maong, kamiseta, sinina, o sapatos​—nga paborito kaayo nimo nga gusto nimong isul-ob sa tibuok nimong kinabuhi? Siyempre wala! Ang mga estilo, tabas, ug mga kolor mausab. Apan, ang mga patik dili samag sapot nga daling mahukas. Gawas pa, ang nindot alang kanimo sa 16 ka pa tingali dili na makapadani sa dihang ikaw 30 anyos na.

Daghan ang nagbasol nga sila naghimog permanenteng kausaban sa ilang panagway. “Nagpapatik ako sa wala pa ako makakat-on bahin kang Jehova,” matod ni Amy. “Munas ginhawa nakong tagotago niini. Maulaw ko kon kini makit-an sa uban diha sa kongregasyon.” Ang leksiyon? Hinuktoki unag maayo ayha ka magpapatik. Ayaw paghimog desisyon nga basin imong basolan sa ulahi.

[Footnote]

[Hulagway sa panid 26]

Ang mga patik kanunayng nalangkit sa rebelyosong mga estilo sa kinabuhi

[Hulagway sa panid 26]

Paglabay sa panahon, daghan ang nagbasol nga sila nagpapatik

[Hulagway sa panid 27]

Hinuktoki unag maayo ayha ka magpapatik