Gikan sa Among mga Magbabasa

Pribasiya Ang ulohan sa hapin nga “Nameligro ba ang Imong Pribasiya?” (Enero 22, 2003) nakadani sa akong pagtagad tungod kay ako awtor man sa usa ka labing himalitang libro bahin sa maong ulohan. Maayo kaayo ang nahimo sa inyong magsusulat. Aniay dugang pang sugyot: Kon pangayoan ka ug identipikasyon, mahimo nimong gamiton ang pasaporte, nga wala maglista sa imong adres sa balay o numero sa social security.

J. L., Espanya

Mga Mutya Salamat sa artikulong “Mga Mutya sa Baybayon.” (Enero 22, 2003) Gibati namo ang samang kahinam nga gibati sa magsusulat sa dihang nangolekta kami ug mga kabhang sa hilahila ug amahong. Ang pagpangolektag kinhason sa baybayon maoy usa sa among gihandom sa tanan. Sa matag higayong among tan-awon ang among koleksiyon, makadayeg kami sa dili matupngan nga artistikong kahenyo sa Maglalalang.

W. ug M. P., Alemanya

Gikan pa niadtong ako mga 12 anyos, ako naikag na sa mga kinhason. Human sa 20 ka tuig nga pagpangolekta kanila, natagbaw ako sa akong natigom. Apan sa dihang nabasa nako kini nga artikulo ug nahibalo nga dunay mga 50,000 ka espisye sa mga mollusk, ako nakaamgo nga gamay ra diay kaayo ang akong natigom, ug labi pa akong nahibulong sa kalalangan ni Jehova.

M. S., Paraguay

Mga Barkong Tangbo Ako naikag sa artikulong “Naglawig sa Asul nga Kalawran​—Sa mga Barkong Tangbo!” (Enero 22, 2003) Sa akong personal nga pagbasa sa Bibliya, akong naagian ang Job 9:26. Nagtumong sa mubong kinabuhi sa mga tawo, kini nag-ingon: “Sila naglawig sama sa mga sakayan nga tangbo.” Usa ka higala ug ako naghunahuna kon nganong si Job nagtandi sa kamubo sa kinabuhi ngadto sa usa ka barkong tangbo. Dayon miingon ang akong higala nga basin gipasabot ni Job ang susamang punto sa inyong artikulo nga “ang mga tangbo anam-anam nga matuphan ug tubig” ug busa dili na magamit.

N. D., Tinipong Bansa

Ang “Pagmata!” nagtubag: Sumala sa usa ka reperensiya, ang mga pulong ni Job nagtumong sa kapaspas sa maong gaan nga mga sakayan. Kon mao, ang samang punto mahimo​—nga ang kinabuhi sa tawo hamubo.

Mga Flamingo Sa dihang gibuksan namo kini nga isyu sa Pagmata!, ang akong bana ug ako nakamatikod sa artikulong “Pulahog-Balhibong mga Mananayaw.” (Enero 22, 2003) Ang akong bana miingon: “Kini alang kanimo.” Siya nasayod kaayo sa akong pagdayeg sa kalalangan ni Jehova ug ilabina gayod sa eleganteng rosas ug kolor nga flamingo. Gipangandoy kong mapanid-an kining matahom nga mga linalang sa akong kaugalingong mga mata. Salamat sa artikulo. Kini nagpatugob kanako sa daghang paagi.

M. N., Czech Republic

Pagpangopya Ako 11 anyos. Giganahan ko sa artikulong “Mga Batan-on Nangutana . . . Unsay Daotan sa Pagpangopya?” (Enero 22, 2003) Bisan tuod dili kanunay maayo ang akong mga grado, nahibalo ko nga ang akong mga eskor nakuha nako sa matinud-anong paagi. Sa pagkatinuod, pipila sa akong mga klasmet nga nangopya nakakuha ug mas ubos pa nga mga grado kay kanako! Bisan pa niana, ang akong tanlag hinlo, ug kana mao ang labing hinungdanong butang.

Z. T., Austria

Nalit-agan ako sa pagpangopya, tingali kay wala nako kana hunahunaa ingong seryoso. Kining artikuloha motabang kanako sa paghinumdom sa mga kasulatan sama sa Hebreohanon 13:​18, nga, sa baylo, motabang kanako kon ako mahaylo sa pagpangopya sa umaabot.

N. I., Italya

Ako anaa sa ikanapulong ang-ang. Usahay misulay ako sa pagpangopya panahon sa among pasulit, nga wala gayod makaamgo nga kini sama ra sa pagpangawat! Apan sa tabang niining artikuloha, maningkamot na ako karon nga huptang hinlo ang akong tanlag.

K. G., Estonia