Komunikasyon nga Motultol sa Kinabuhi

SA TANANG linalang sa yuta, ang mga tawo mao lamang ang dili kontento nga makigkomunikar sa usag usa lamang. Bisan unsay nasyonalidad, kahimtang sa katilingban, sekso, o lebel sa edukasyon, ang mga tawo nagpasundayag ug kinaiyanhong tinguha nga makigkomunikar sa kinatas-ang persona, nga mao ang Diyos.

Kana ba maoy binuang lang nga patuotuo? Dili gayod! Sumala sa gihisgotan sa nag-unang artikulo, gilalang sa Diyos ang mga tawo sumala sa iyang dagway. Gibutang niya kanato ang katakos nga makasabot sa espirituwal nga mga butang. Naglakip kini sa tinguha nga makigkomunikar kaniya ingong atong langitnong Amahan. (Genesis 1:27; Mateo 5:3) Sa pagkatinuod, giisip sa Diyos ang pagpakigkomunikar kaniya ingong hinungdanon kaayo nga siya gitawag ingong “Tigpatalinghog sa pag-ampo.”​—Salmo 65:2.

Pagkadakong dungog nga moampo ngadto sa Labing Gamhanan! Ang kadaghanang tawo mag-isip nga usa ka pribilehiyo ang pagpakigsulti nga pribado sa usa ka importanteng tawo, sama sa usa ka presidente o primer ministro. Bisan pa niana, si Jehova nga Diyos mao ang kinatas-ang persona sa uniberso! Ug kita dili na kinahanglang mohimog kahikayan aron makigsulti kaniya. Kita makaampo bisan kanus-a, bisan asa. Makasangpit man gani kita sa Diyos sa hilom gikan sa kasingkasing. (1 Samuel 1:12-15) Apan, si Jehova nagbaod gayod nga kita magmasinsero ug magmatinumanon kaniya. (Miqueas 6:8; Mateo 6:5-13) Kon buot hunahunaon, ang maayong komunikasyon maoy pagsulti ug pagpamati sa usag usa, dili ba?

Mamati Ka ba sa Diyos?

Sa unsang paagi ang usa mamati sa Diyos? Sa panguna pinaagi sa pagbasa ug pagpadapat sa mga pagtulon-an nga makita diha sa iyang sinulat nga Pulong, ang Balaang Bibliya. (2 Timoteo 3:16; 2 Pedro 1:​20, 21) “Ang tawo mabuhi . . . sa matag pulong nga magagula sa baba ni Jehova,” nag-ingon si Jesus. (Mateo 4:4) Mamati ka ba sa Diyos pinaagi sa pagbasa ug pagpadapat sa iyang sinulat nga Pulong?

Kadtong regular nga makigkomunikar kang Jehova makaangkon sa iyang pag-uyon ug makatagamtam sa “kalinaw sa Diyos nga labaw sa tanang panghunahuna.” (Filipos 4:​6, 7; Proverbio 1:33) Mabatonan usab nila ang paglaom nga mabuhi sa walay kataposan sa paraiso sa yuta, nga wala ang kabalaka ug pag-antos nga atong nasinati karon. (Salmo 37:29; Juan 17:3) Kini maoy maanindot gayod nga mga ganti tungod sa pagpahimulos pag-ayo sa milagro sa pagpakigkomunikar sa intelihenteng paagi!

[Hulagway sa panid 10]

Ang pagpakigkomunikar sa Diyos naglakip sa pagbasa sa Bibliya ug pag-ampo