“Tuig sa Bibliya”

Sa Alemanya, Austria, Pransiya, ug Switzerland, ang tuig 2003 gideklarar nga “Tuig sa Bibliya.” Ang mantalaan sa Alemanya nga Frankfurter Allgemeine Zeitung nag-ingon: “Sama sa una ug kataposang higayon nga gisaulog kini niadtong 1992 ingong ‘Tuig sa Bibliya,’ [ang mga simbahan] nagtinguha sa pagpukaw sa kaikag sa mga tawo bahin niining ‘libro sa kinabuhi’ ug sa pagpasiugda sa bili sa Balaang Kasulatan may kalabotan sa kultura.”

Sumala pa sa Bibelreport sa Hunyo 2002, ang Bibliya nahubad sa labing menos sa 2,287 ka pinulongan​—sa pipila ka bahin niini. Ang mga banabana nagpakita usab nga sa pagkakaron, duolan sa lima ka bilyong Bibliya ang naapod-apod. Kining dakong paningkamot klarong nagpadayag nga ang mga tawo dunay dakong pagtamod niining basahona.

Karon, ang kadaghanang tawo tingali dili motuo nga ang Bibliya praktikal. Sa pagkamatuod, daghan ang nagtuo nga ang mga sukdanan sa Bibliya kinaraan na ug walay koneksiyon sa tinuod nga mga hitabo sa kinabuhi. Apan, niining Tuig sa Bibliya, ang mga simbahan sa Alemanya naglaom nga makab-ot ang duha ka butang​—pagpasibot sa mga tawo nga magkinabuhi sumala gayod sa Bibliya ug sa pagpukaw sa kadasig alang sa Bibliya ngadto sa mga tawo nga mibulag sa simbahan.

Ang pagbasa sa Bibliya gikan sa sinugdanan ngadto sa kataposan maoy usa ka talagsaong buhat, apan seguradong maayong paagi kini aron masabtan ang pangunang mga punto sa Kasulatan. Hinunoa, ang tawo nga buot makabenepisyo ug dako gayod gikan sa Bibliya angayng magsilsil sa hunahuna sa mga pulong diha sa 2 Timoteo 3:​16, 17: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”

Ang Aleman nga magbabalak nga si Johann Wolfgang von Goethe (1749-​1832) miingon: “Kombinsido ako nga ang Bibliya mas motahom pa kon mas masabtan kini sa tawo.” Sa pagkatinuod, diha lamang sa Pulong sa Diyos nga atong makita ang makataronganong pagpatin-aw kon diin kita gikan, kon nganong naglungtad kita, ug kon unsay anaa sa umaabot!​—Isaias 46:​9, 10.

[Picture Credit Line sa panid 31]

Gikan sa librong Bildersaal deutscher Geschichte