Ang Hunahuna sa Bibliya

Di-Normal nga mga Estilo sa Kinabuhi—Mouyon ba ang Diyos Niini?

“KANUS-A ako mahibalo kon unsang seksuwal nga estilo sa kinabuhi ang akong gusto?” Mao kini ang gisulat sa 13-anyos nga batang babaye diha sa lindog sa usa ka publikasyon nga nagtambag sa mga tin-edyer. Ang iyang pangutana nagpabanaag sa tinamdan sa daghan nga nagtuong ang mga tawo dunay kagawasang mosagop ug bisan unsang seksuwal nga estilo sa kinabuhi nga ilang gusto.

Ang pipila ka tawo nalibog gayod bahin sa ilang seksuwal nga mga pagbati. Ang uban klaro nga misagop ug di-normal nga mga estilo sa kinabuhi sama sa homoseksuwalidad. Aduna poy uban nga way-kokaulaw nga naglihok ug nagbesti sama nianang sa kaatbang nga sekso. Ang pipila nagpausab sa ilang sekso pinaagig operasyon. Nangatarongan pa gani ang ubang mga tawo nga ang mga hamtong angayng tugotan nga makigsekso sa mga bata.

Ang seksuwal nga mga buhat ug gender (pagkalalaki o pagkababaye) personal lang ba gayod nga desisyon? Unsay ikasulti sa Pulong sa Diyos bahin niining mga isyuha?

“Lalaki ug Babaye Iyang Gilalang Sila”

Sumala pa sa basahong Genesis sa Bibliya, ang Diyos mismo maoy naglalang sa panagkalahi sa mga lalaki ug mga babaye. Kini nag-ingon: “Gilalang sa Diyos ang tawo sumala sa iyang larawan . . . Lalaki ug babaye iyang gilalang sila. Dugang pa, ang Diyos nagpanalangin kanila ug ang Diyos miingon kanila: ‘Magmabungahon ug magdaghan kamo ug pun-a ang yuta ug gamhi kini.’”​—Genesis 1:​27, 28.

Gilalang sa Diyos ang mga tawo nga may kagawasan sa pagpili ug sila gihatagag kahigayonan aron mapahimuslan ang ilang kagawasan. (Salmo 115:16) Kay may responsabilidad sa pag-atiman sa tanang uban nga buhing mga butang sa yuta, ang tawo gitugotan nga maoy mopili ug haom nga ngalan alang niini. (Genesis 2:19) Apan, kon mahitungod sa mga isyu sa seksuwalidad, ang Diyos naghatag ug espesipikong mga giya.​—Genesis 2:24.

Tungod sa pagsupil ni Adan, kitang tanan nakapanunod ug pagkadili-hingpit. Busa pakigbisogan gayod nato ang unodnong mga kahuyangan ug kusganong mga kailibgon nga supak sa orihinal nga katuyoan sa Diyos. Mao nga diha sa mga balaod nga gihatag pinaagi kang Moises, ang Diyos espesipikong naghisgot sa seksuwal nga mga buhat nga iyang gikasilagan​—pagpanapaw, pag-unay, homoseksuwalidad, ug pagpakigsekso uban sa mga mananap. (Levitico 18:6-23) Ang Diyos espesipiko usab nga nagdili sa pagpakaaron-ingnong membro sa kaatbang nga sekso alang sa imoral nga mga katuyoan. (Deuteronomio 22:5) Ang Bibliya kusganong nagtudlo nga ang seksuwal nga relasyon nga uyonan lamang sa Diyos mao kanang uban sa kaatbang  nga sekso ug sulod sa kahikayan sa kaminyoon. (Genesis 20:1-5, 14; 39:7-9; Proverbio 5:15-19; Hebreohanon 13:4) Makataronganon ba ang maong mga sukdanan?

Kinsay Mopili?

Ang Bibliya nagtandi sa kahimtang sa tawo atubangan sa iyang Maglalalang ngadto sa yutang kulonon diha sa mga kamot sa magkukulon. Kini nag-ingon: “Nan, kinsa ka gayod Oh tawo, nga magtubagtubag sa Diyos? Ang butang bang inumol moingon ngadto kaniyang nag-umol niini, ‘Nganong giingon mo ako niini sa pagbuhat?’” (Roma 9:20) Klaro diha sa paagi sa paglalang sa Diyos sa mga lalaki ug babaye nga normal nga sila magkaibogay. Busa ang pagkaibog sa kasekso, sa mananap, o sa bata dili normal.​—Roma 1:​26, 27, 32.

Tungod niini nga rason, ang mga tawong mosagop niining dili-normal nga mga hilig sa sekso nagsupak sa Diyos. Ang Bibliya naundan niini nga pasidaan: “Alaot ang usa nga nakiglalis sa iyang Mag-uumol, ingon sa usa ka bika batok sa ubang bika sa yuta! Moingon ba ang yutang-kulonon sa iyang mag-uumol: ‘Unsay imong ginahimo?’” (Isaias 45:9) Makataronganon gayod nga ang Magbubuhat sa mga tawo maoy mohatag ug giya bahin sa seksuwal nga mga butang. Dili ba makataronganon usab nga ang mga tawo angayng mosunod sa maong paggiya?

Paghupot sa Kaugalingong Sudlanan

Ang magsusulat sa Bibliya nga si Pablo migamit ug samang ilustrasyon sa dihang naghatag ug giya sa mga Kristohanon bahin sa seksuwal nga panggawi. Siya miingon: “Ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan, dili sa mahakogong kaibog sa seksuwal nga gana.” (1 Tesalonica 4:​4, 5) Si Pablo nagtandi sa lawas sa tawo ngadto sa usa ka sudlanan. Ang paghupot sa maong sudlanan nagkahulogan nga ang hunahuna ug mga kailibgon sa usa ka tawo iyang ipahiuyon sa moral nga mga balaod sa Diyos.

Tinuod, dili kini sayon. Ang tawong giabusohan sa sekso sa bata pa, ang tawo kansang mga ginikanan o tig-atiman nagpakitag mahilayon nga panig-ingnan sa pagkalalaki o pagkababaye, o ang tawong naladlad sa pornograpiya sa linghod pa nga panuigon malisdan gayod. Ang mga gene, hormone, ug pangisip mahimong hinungdan usab sa pagkadaot sa seksuwal nga mga pagbati. Apan, makapahupay ang pagkahibalo nga ang atong Maglalalang makahatag ug tabang ug pagpaluyo alang sa mga tawong nanginahanglan niini.​—Salmo 33:20; Hebreohanon 4:16.

Tugoti ang Dakong Magkukulon sa Pag-umol Kanimo

Ang tibugol nga yutang-kulonon kinahanglang ibutang sa sentro sa hulmahang motuyok sa dili pa sugdan sa magkukulon ang pag-umol ug paghulma niini. Dayon, samtang nagtuyok ang hulmahan, ang yutang kulonon maampingong hulmahon sa magkukulon sa hanas nga paagi sa porma nga iyang gusto. Sa dili pa kita maumol nga usa ka tilinguhaong tawo sa mata sa Diyos, kita kinahanglang magsentro sa atong kinabuhi diha sa dili-mausab nga mga prinsipyo ug mga balaod sa Diyos. Sa dihang mosugod na kita sa paghimog mga paningkamot, ang Diyos mahigugmaong mohulma kanato sa maampingong paagi pinaagi sa Bibliya, sa iyang balaang espiritu, ug sa Kristohanong panag-igsoonay. Sa ingon niana ang tawo magsugod sa pagbati ug pagtagamtam sa personal nga pag-atiman sa Diyos.

Siyempre, kinahanglang atong ugmaron ang atong pagsalig sa kaalam sa Maglalalang, masaligon nga nahibalo siya kon unsay labing maayo alang kanato. Kini nga pagsalig maugmad pinaagi sa pag-ampo ug sa sinserong pagtuon sa Bibliya. Ang tawo nga nagaatubang ug problema bahin sa dili-angayng pagbati sa sekso nga may ingon niini nga tinamdan dali nga umolon sa Maglalalang. Ang 1 Pedro 5:​6, 7 nag-ingon: “Busa, ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon; samtang inyong itugyan kaniya ang tanan ninyong mga kabalaka, kay siya may kahingawa kaninyo.”

Pinaagi sa regular nga pagbasa sa Bibliya atong masayran ang bahin sa daghang matinumanong mga alagad sa Diyos nga nakigbisog sa unodnong  mga kailibgon apan wala gayod molunga. Makapadasig gayod kini nga mga panig-ingnan! Atong mamatikdan ang kahigawad nga gibati usahay ni apostol Pablo bahin sa iyang kaugalingon sa dihang siya mipatugbaw: “Alaot ako nga tawo! Kinsa ang magluwas kanako gikan sa lawas nga nahiagom niini nga kamatayon?” Bisan pa niana, kita iyang gitultolan usab ngadto sa pangunang tinubdan sa tabang sa dihang iyang gitubag ang iyang kaugalingong pangutana: “Salamat sa Diyos pinaagi kang Jesu-Kristo nga atong Ginoo!”​—Roma 7:​24, 25.

Puwersa Aron Magbag-o

Mahimo usab nato nga mabatonan ang balaang espiritu sa Diyos. Kini maoy usa ka gamhanang puwersa aron magbag-o. Ang balaang espiritu makatabang kanato sa ‘paghukas sa daan nga pagkatawo’ ug sa ‘pagsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’ (Efeso 4:22-24) Ang atong mahigugmaong langitnon nga Amahan motubag gayod sa sinserong pagpangayog balaang espiritu sa pagtabang kanato nga magbag-o. Si Jesus nagpasalig kanato nga ang Amahan “mohatag ug balaang espiritu niadtong nagapangayo kaniya.” (Lucas 11:13) Apan, gikinahanglan ang pag-ampo kanunay sumala sa gipakita sa iyang mga pulong: “Padayon sa pagpangayo, ug igahatag kini kaninyo.” (Mateo 7:7) Tinuod gayod kini ilabina sa dihang manglimbasog sa pagkontrolar sa seksuwal nga mga kailibgon.

Ang Diyos motabang usab kanato pinaagi sa matuod nga Kristohanong panag-igsoonay, nga gilangkoban ug mga tawo nga nagkalainlain ug mga gigikanan. Ang ubang mga Kristohanon sa unang-siglong kongregasyon sa Corinto nahiapil kanhi sa matang sa “mga lalaking gihuptan alang sa dili-kinaiyanhong mga katuyoan” ug “mga lalaking makigdulog sa mga lalaki.” Bisan pa niana, sila nagbag-o. Ang dugo ni Kristo naghinlo kanila, ug sila nahimong dalawaton sa panan-aw sa Diyos. (1 Corinto 6:9-11) Ang uban karon kinahanglang magbag-o usab niining paagiha. Ug sa ilang pagpakigbugno batok sa sayop nga mga kailibgon sila makadawat ug tabang gikan sa Kristohanong kongregasyon.

Kini ba nagpasabot nga ang pagkahimong Kristohanon dihadiha nga magwagtang sa mahilayong mga kailibgon o sa kalibog sa usa ka tawo labot sa pagkalalaki o pagkababaye? Dili. Ang mapinadayonong pagpadapat sa mga prinsipyo sa Bibliya nakatabang sa pipila sa pagkinabuhi nga normal. Bisan pa niana, kining maong mga Kristohanon sagad nga kinahanglang makigbisog matag adlaw batok sa sayop nga mga kailibgon. Sila nag-alagad sa Diyos bisan tuod sila dunay mahulagwayong “tunok sa unod.” (2 Corinto 12:7) Basta sila magpadayon sa pagpakig-away batok sa sayop nga mga kiling ug magpadayon sa ilang matarong nga paggawi, ang Diyos mag-isip kanila nga matinumanong mga alagad ug sila hinlo sa iyang mga mata. Sila makalaom sa panahon sa umaabot sa dihang ang tanang tawo “ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Roma 8:21.

Sa kasamtangan, ang tanan nga buot magpahimuot sa Diyos kinahanglang mosubay sa iyang matarong nga mga sukdanan. Ang matuod nga mga Kristohanon buot nga moalagad sa Diyos​—dili kay magpahinunot sa ilang kaugalingong mga kiling. Ang mga tawo nga mapainubsanong magpasakop sa kabubut-on sa Diyos diha sa tanang bahin sa kinabuhi pagagantihan ug dumalayong kangaya ug kalipay. ​—Salmo 128:1; Juan 17:3.

[Blurb sa panid 13]

Kon mahitungod sa mga isyu sa seksuwalidad, ang Diyos naghatag ug espesipikong mga giya

[Blurb sa panid 14]

Ang ubang mga Kristohanon sa unang-siglong kongregasyon sa Corinto maoy kanhi “mga lalaking gihuptan alang sa dili-kinaiyanhong mga katuyoan” ug “mga lalaking makigdulog sa mga lalaki.” Bisan pa niana, sila nagbag-o

[Hulagway sa panid 15]

Ang pagtuon sa Bibliya makatabang sa usa sa pag-ugmad ug taas nga mga sukdanan sa moral