Gikan sa Among mga Magbabasa

Pagpamampam sa mga Bata Dili ko ikapahayag sa mga pulong ang akong pagkamapasalamaton tungod sa seryeng “Pagpamampam sa mga Bata​—Usa ka Makapasubong Katinuoran.” (Pebrero 8, 2003) Kining seryeha nagyagyag sa bug-os nga kangil-aran niining sulirana. Gibati ko nga kini angayng ipatik pag-usab diha sa sekular nga mga mantalaan aron mas daghang tawo ang mahibalo nga kining matanga sa pagkaulipon naglungtad.

M. K., Czech Republic

Sirya Salamat tungod sa artikulong “Sirya​—Mga Timailhan sa Makaiikag nga Kagahapon.” (Pebrero 8, 2003) Sa prangkang pagkasulti, dili gayod ako interesado sa kasaysayan. Apan tungod niining artikuloha akong nahanduraw ang nagkalainlaing mga dalan ug mga siyudad nga giduaw ni apostol Pablo. Ang impormasyon nga sama niini makatabang kanato nga mouswag ang atong kahibalo ug masabtan kon unsay gisagubang sa mga alagad sa Diyos sa nangagi.

T. S., Tinipong Bansa

Pagpabiling Himsog Buot kong pasalamatan kamo tungod sa tanang sugyot bahin sa ehersisyo ug pagpaniwang nga napatik sa “Pagpaniid sa Kalibotan.” Naangayan ko ilabina ang ulohang “Pagpabiling Himsog.” (Pebrero 8, 2003) Kana nagpakita nga bisan ang diyutayng ehersisyo makatabang nga moayo ang imong panglawas. Makapadasig kini kanako tungod kay ang usa ka tambal nga akong gitomar daling makapakapoy kanako ug kinahanglang dili nako dugayon ang akong ehersisyo. Salamat tungod niining sugyot bahin sa panglawas ug pagpabiling himsog.

G. P., Tinipong Bansa

Mga Crossword Puzzle Aniay pipila ka pulong sa pagpasalamat kaninyo tungod sa pagbutang ug mga crossword puzzle diha sa inyong mga magasin. Gikalipayan ko kini sa bug-os! Kini makalingaw, edukasyonal, ug usa ka epektibong paagi sa pagrelaks sa kataposan sa adlaw.

J. G., Tinipong Bansa

Moangay ako kanunay sa pagtubag sa mga crossword puzzle, ug sa dihang misugod kamo sa pag-apil niana diha sa Awake! gisugdan ko kana sa pagpaabot. Sa sinugdan, kinahanglang tan-awon ko ang kadaghanang teksto, apan ako makatubag karon sa daghang puzzle nga dili na motan-aw sa teksto! Ingong resulta, nakakat-on ako ug ubay-ubayng bersikulo sa Bibliya ug mga karakter sa Bibliya.

E. G., Tinipong Bansa

Mapahiyomon Ako gianggaan ug Smile (Pahiyom) sa akong pamilya ug mga higala. Gihatagan gani akog usa ka letrato sa akong kaugalingon nga may kapsiyon: “Kon ikaw makakitag tawo nga walay pahiyom, hatagi siya sa usa sa imong mga pahiyom.” Ugaling lang, ang pipila ka trahedya nga nahitabo dili pa dugay sa akong pamilya nakapaguol kaayo nako. Ang artikulong “Ang Gahom sa Pahiyom” (Enero 22, 2003) nakapausob sa akong panglantaw. Karon ako makalipay na usab sa mga tawo pinaagi sa pagpahiyom. Nagpasalamat ako kang Jehova tungod sa paggamit niining artikuloha aron tabangan ako nga mausab ang akong panglantaw sa kinabuhi.

O. F., Nigeria

Basura Sa seryeng “Basura​—Matabonan Kaha Kita Niini?” (Agosto 22, 2002), inyong gikutlo ang banabana sa usa ka Italyanhong asosasyon labot sa kalikopan bahin sa mga gitas-on sa panahon sa pagkadunot sa nagkalainlaing mga butang diha sa tubig sa dagat. Nagtuo ako nga ang ilang banabana nga 500 ka tuig alang sa mga lata sayop kaayo. Sa paratong tubig sa Pelican Island National Wildlife Refuge sa Florida, namatikdan ko ang daghang lata nga aluminum ug ordinaryong mga lata nga napolbos sa dihang giyatakan ko kini sa akong botas. Kining mga lataha dili mahimong anaa na sulod sa kapig 10 ka tuig​—tingali menos pa niana. Sumala sa nahibaloan ni bisan kinsang may bangka nga aluminum, ang asinong tubig mokutkot sa aluminum.

S. S., Tinipong Bansa

Ang “Pagmata!” nagtubag: Tinuod nga ang ubang mga banabana labi pang kasarangan. Bisan pa niana, ang “Elements of Marine Ecology,” ni R. V. Tait ug F. A. Dipper, nagsugyot nga mahimong mokabat ug 80 ngadto 100 ka tuig aron madunot ang aluminum nga mga lata ug 50 ngadto 100 ka tuig aron madunot ang ordinaryong mga lata. Ang metal nga mga lata nga nahanginan tingali mas daling madunot kay sa mga nabasa sa tubig.