Ang Kinadak-ang Liso sa Kalibotan

Sa daghang tuig nang nanglabay, nadagsa sa kaislahan sa Maldives ug Indonesia ang hilabihan ka dakong liso, ug naukay ang mga tawo niini. Dihay mga sulosugilanon kon diin kini gikan. Ang uban nagtuo nga gikan kini sa usa ka kahoy sa ilalom sa dagat. Tungod niini, kini ginganlan ug Coco-De-Mer, o lubi sa dagat. Gituohan pa gani nga mao kini ang gidili nga bunga nga gikaon ni Adan diha sa tanaman sa Eden. Apan, sa kataposan ang tinuod nga sugilanon bahin niini nahibaloan sa tungatunga sa ika-18ng siglo. Kining misteryosong liso maoy bunga sa usa ka matang sa lubi nga motubo lamang sa Seychelles, nga usa ka gamayng pundok sa mga isla diha sa Indian Ocean.

Ang kinadaghanang Coco-De-Mer nanubo diha sa Vallée de Mai, sa isla sa Praslin. Kining mga lubiha makaabot ug kutob 30 metros ang gihabogon ug gibanabana nga mabuhi hangtod sa gatosan ka tuig. Ang usa ka makaiikag nga impormasyon bahin sa Coco-De-Mer mao nga dunay laki ug baye niining mga kahoya. Aron mamunga ang baye, kini kinahanglang mabutangag malo sa laki nga Coco-De-Mer. Busa, kinahanglang adunay gulang nga mga kahoyng laki ug baye aron mabuhi ang tanom diha sa kasulopan.

Ang bunga sa baye nga Coco-De-Mer talagsaon gayod. Ang bunga morag dako, berde nga kasingkasing. Apan ang sulod adunay nag-akob nga unod nga motimbang ug kutob 20 kilos. Ang ubang mga bunga daghan ug liso. Dili ikahibulong nga ang Coco-De-Mer nalista sa The Guinness Book of Records ingong ang may kinadak-ang liso sa kalibotan.

Sa magtan-aw sa mga bulig niining samag-bato nga bunga, ang tawo maikag gayod niining katingalahan sa kalalangan. Peligrosong magtindog ilalom sa punoan. Ang mga bulig motimbang ug 180 kilos. Apan, sa katingalahan, walay gikataho nga nahulogan sa maong bunga. Bisan pa niana, dili gihapon maayong moadto sa Vallée de Mai sa unosong panahon. Kining katingalahang bunga maayong tan-awon sa linaw nga panahon.