Gikan sa Among mga Magbabasa

Malnutrisyon Maikagon kaayo akong nagbasa sa serye nga “Malnutrisyon—‘Ang Wala Mamatikdi nga Emerhensiya.’” (Pebrero 22, 2003) Sa Japan dili kaayo kini problema, busa natingala gayod ako sa akong nabasa. Nanghinaot ako nga ang maayong balita sa Gingharian sa Diyos ikawali pa ngadto sa mga tawo nga nag-antos niining maong problema.

Y. T., Japan

Mga Music Video Usahay makadawat ako sa inyong mga magasin gikan sa usa ka kaila nga usa sa mga Saksi ni Jehova. Sa akong hunahuna ang artikulong “Mga Batan-on Nangutana . . . Angay ba Akong Motan-aw ug mga Music Video?” (Pebrero 22, 2003) maayo kaayong pagkasulat. Kini espesipiko kaayo ug nagpadayag sa mga kapeligrohan nga natago diha sa modernong musika.

M. M., Japan

Sa dihang nadawat nako ang maong artikulo, gihuman dayon nako kini ug basa. Daghan sa akong mga higala ang manan-aw ug mga music video, ug ganahan silang mag-estorya bahin niana. Ang artikulo nakatabang kanako nga dili madala sa tentasyon nga motan-aw niana. Ako 12 anyos, ug ang artikulo miabot sa tukmang panahon.

K. W., Tinipong Bansa

Nalingaw gayod ako sa artikulo. Ako usa ka bug-os-panahong ebanghelisador ug nahibalo nga hinungdanon nga ako magpakita ug maayong panig-ingnan alang sa mga batan-on. Busa sa dihang ang mga batan-on mangutana kanako kon nganong wala nako makita ang usa ka music video, karon makaingon ako nga tungod kini kay dili nako gustong madaot ang akong relasyon kang Jehova. Palihog padayona ninyo ang pagpatik ug matulon-anong mga artikulo sa “Mga Batan-on Nangutana . . .”

R. B., Tinipong Bansa

Ako mag-21 anyos na, ug malingaw ako sa pagtan-aw ug mga music video. Apan, husto kamo sa pag-ingon nga kining maong mga video adunay impluwensiya diha sa nanan-aw niini. Kasagaran, ang mga batan-on gusto sa usa ka musika tungod sa tono o ritmo niini apan wala magtagad sa mga pulong. Ilabinang tinuod kini sa dihang ang mga pulong sa awit anaa sa langyawng pinulongan. Ang mga video kasagarang nagpadayag kon unsa ang mensahe nga tinuod nga ihatag sa maong musika. Usahay matingala ko nga makakita sa video sa usa ka awit nga akong gihunahuna nga angayan! Sa dihang makakita ako ug malaw-ay nga video, ilisan nako ang channel ug dili na maminaw pag-usab sa maong awit.

T. G., Pransiya

Mga Wildebeest Giganahan kaayo ko sa artikulong “Ang Dakong Paglalin.” (Pebrero 22, 2003) Gustoan ko ug mga hayop, ug sa dihang moabot ang usa ka bag-ong gula sa Pagmata!, ang unang buhaton nako mao ang pagbasa sa bisan unsang mga artikulo bahin sa mga hayop. Natingala ako sa pagkabasa nga sa dihang mameligro, ang baye nga wildebeest makapahunong sa proseso sa pagpanganak ug taposon kana sa luwas nga panahon ug dapit! Palihog padayon sa pagpatik niining maanindot nga mga artikulo.

K. R., Italya

Dili-Mapasaylong Sala Wala ko mahibalo kon unsaon pagpahayag ang akong pasalamat kang Jehova ug kaninyo tungod sa artikulong “Ang Hunahuna sa Bibliya: Aduna bay Sala nga Dili Mapasaylo?” (Pebrero 8, 2003) Dugaydugay na kong nangitag ingon niana nga impormasyon. Naningkamot ko sa pagsabot sa Hebreohanon 10:26, ug sa akong hunahuna mapadapat lamang kana sa 144,000, nga moadto sa langit. Salamat sa pagpatin-aw niini.

R. A. P., Ghana

Sirya Gipabilhan gayod nako ang talagsaong estilo sa artikulong “Sirya—Mga Timailhan sa Makaiikag nga Kagahapon.” (Pebrero 8, 2003) Tungod kay malingaw kaayo ako sa kasaysayan ug geograpiya, naikag ako nga makaarang sa paglangkit sa mga bersikulo sa Bibliya uban sa eksaktong dapit diha sa mapa. Nanghinaot ko nga magpatik pa kamo ug ubang mga artikulo nga sama niini.

M. P., Pransiya

[Picture Credit Line sa panid 30]

UN/DPI Photo by Eskinder Debebe