Pagsagubang sa mga Baha sa Caucasus

TINAMPO SA MAGSUSULAT SA PAGMATA! SA RUSYA

SA MIAGING tuig sa amihanang rehiyon sa Caucasus sa Rusya, ang gidaghanon sa ulan nga naandang mobundak sa tulo ka bulan nga yugto mibundak sa duha lamang ka adlaw. Daghang suba ang miapaw. Bisan ang gagmayng mga sapa gibul-ogan sa sulog kaayong tubig, nga nagbanlas sa tanang giagian niini. Ang mga dam nangaguba, ug ang mga balay ug ubang mga tinukod nangapayhag. Sa kalit, ang libolibong residente walay nay mga balay. Daghang tawo nga wala dayon makagawas sa ilang mga balay nangamatay. Ang uban nagtan-aw nga walay mahimo sa dihang ang ilang mga minahal gianod sa nagbul-og nga tubig.

Sa siyudad sa Nevinnomyssk, usa ka pamilya misulay sa pag-ikyas sakay sa ilang traktor. Apan, gitikyaob sa taas kaayong tubig ang traktor, ug ang tibuok pamilya nawagtang. Adunay nangamatay sa pagsulay sa pagluwas sa uban. Sumala sa banabana sa gobyerno, 335,000 ka tawo ang naapektohan sa mga baha. Taliwala kanila, kapin sa 200 ang nangamatay ug daghan ang wala na igkita.

Tinagpulo ka libong balay ang gibahaan. Ang sistema sa mga tubo sa tubig ug imburnal nangaguba. Bisan ang nalubong nang patayng mga lawas nangahabwa tungod sa kusog nga bul-og sa tubig, apil na ang patayng mga lawas sa mananap nga namatay sa sakit nga anthrax. Ang kadaot sa baha gibanabana nga mikabat ug mga 16 ka libong milyones ruble, o duolan sa 500 milyones dolyares sa T.B.

Kining matahom ug tabunok nga yuta nga maoy kasagarang tema sa mga awit ug balak, makaguol gayod nga tan-awon! Bisan pa niana, ang kalamidad wala makabungkag sa tinuod nga gugma sa isigkatawo.

Diha Dayoy Gihatag nga Tabang

Sa primero, walay hinlo nga tubig, walay koryente, walay gas, walay komunikasyon sa telepono. Ang mga tawo dili makakomunikar sa usag usa. Kapin sa 3,000 ka mga Saksi ni Jehova ang nagpuyo sa naapektohang lugar, nga kapin sa  700 diha ug sa kasikbit sa Nevinnomyssk. Busa sa dihang miabot ang mga balita bahin sa baha, ang mga Saksi naghikay ug linain nga mga komite sa emerhensiya aron maatiman ang mga naapektohan. Kining maong mga komite nagsugod na sa pagtrabaho bisan sa wala pa miabot ang mga trabahante sa gobyerno sa pagluwas.

Diha sa gamayng lungsod sa Orbelyanovka, mga 60 kilometros sa habagatan-sidlakan sa Nevinnomyssk, kusog kaayong mitaas ang tubig. Walo ka tawo, lakip sa duha ka babayeng Saksi, midangop sa gamayng bungtod. Ug midangop usab diha ang gagmayng mga mananap ug daghang bitin. Tungod niini, tibuok gabiing nangwaslik ang walo ka tawo ug mga bitin.

Pagkasunod buntag, ang lokal nga mga Saksi nangitag paagi sa pagkuha sa ilang duha ka Kristohanong mga sister nga nabara. Sa kataposan, sa sayo nga kahaponon, dihay nakuhang gamayng goma nga balsa. Apan sa wala pa kuhaa ang mga sister, gigamit una sa mga Saksi ang balsa sa pagluwas sa usa ka paralisadong tigulang nga lalaki. Human niana, samtang ilang giluwas ang sister, usa ka helikopter mitungha ug gikuha ang ubang mga tawo nga nabara diha sa bungtod.

Sa kahaponon ang mga Saksi diha sa balsa nagluwas ug uban pa. Sa dihang nangutana ang mga Saksi, “Nakaila ba kamo kon kinsa kami?” ang mga tawo mitubag: “Siyempre, walay lain kondili ang Departamento sa Emerhensiya nga mga Situwasyon.” Ang mga tawo nakurat sa pagkahibalo nga sila mga Saksi.

Ang mga Saksi sa Nevinnomyssk mipalit ug madaladalang kosinilya ug naglutog mainit nga mga pagkaon alang sa mga tawong nanginahanglan. Nanghatag sila dili lamang pagkaon kondili tubig, sapot, ug medisina usab. Ang mga grupo sa boluntaryong mga Saksi nanghinlo usab sa mga balay ug nanghawan sa mga dinahili diha sa mga lagwerta.

Usa ka magtiayong Saksi sa Zelenokumsk nga dunay negosyo nagpagamit sa ilang sakyanan sa paghatod sa tubig, pagkaon, ug sapot, nga ilang gipalit sa tiyanggihan nga pinakyaw nga namaligya. Sa dihang ang asawa gipangutana sa iyang mga kaila kon para kang kinsa ang iyang gipamalit, siya miingon nga para kini sa mga isigkamagtutuo nga naapektohan sa kalamidad. Kay natandog sa iyang mahunahunaon nga tinamdan, sila gusto usab nga motabang. Usa ka babayeng negosyante mihatag ug usa ka dakong sakong miki, dihay lain ang mihatag ug dakong paketeng sabon, ug ang uban mihatag ug sakosakong asukar.

Tabang Gikan sa Lagyong mga Dapit

Sanglit ang mga Saksi sa Rusya gusto man mahibalo kon unsay ilang ikatabang sa mga biktima sa baha, usa ka linain nga pondo ang gitagana aron ikapadala ang tabang ngadto sa mga nanginahanglan. Bisan ang mga boluntaryo sa Sentro sa Administrasyon sa mga Saksi ni Jehova sa Rusya, nga nahimutang duol sa St. Petersburg, mitabang. Ang uban namalit ug bag-ong mga butang alang sa mga biktima sa baha. Dihay miingon: “Gihatag ko ang akong kinamaayohang gamit tungod kay duna pa koy magamit, apan ang atong mga igsoong lalaki ug babaye wala gayoy bisag usa.”

Ang Sentro sa Administrasyon nagpadala usab ug mga sulat ngadto sa duolan sa 150 ka kongregasyon sa mga Saksi ni  Jehova sa St. Petersburg ug Moscow, nga nagsaysay nga ang mga igsoon mahimong mohatag ug donasyong salapi, pagkaon, ug sapot. Bisan tuod naglisod sa panalapi ang Rusya ug ang kadaghanang Saksi kabos, daghan sila ug gihatag. Ang ilang pagpanghatag kaamgid sa pagpanghatag sa kabos nga mga Kristohanon sa Macedonia ngadto sa ilang nanginahanglang mga igsoong lalaki ug babaye sa Judea.​—2 Corinto 8:​1-4.

Human sa pagklaseklase sa mga butang nga hinatag diha sa sentro sa pondohanan sa donasyon, kini gikarga diha sa mga trak ug gidala ngadto sa lugar nga gibahaan. Gawas pa niining maong mga donasyon, ang Sentro sa Administrasyon mipalit ug napulo ka toneladang pagkaon, 500 ka hapin sa katre, ug mga panghinlo, maingon man mga himan ug mga sapot nga pangtrabaho alang sa buluhaton sa paghinlo sa lugar nga gibahaan. Tanantanan, unom ka 50-toneladang mga trak naghatod sa mga hinabang ngadto sa amihanang rehiyon sa Caucasus.

Ang Pagkamahinatagon Nakahatag ug Pamatuod

Ang buluhaton sa mga Saksi panahon sa paghinlo sa lugar nga gibahaan namatikdan. Tagda ang kahimtang sa maanindot nga lugar sa mga turista nga siyudad sa Kislovodsk, nga dunay kapin sa 300 ka Saksi. Sila mitanyag sa pagtabang sa administrador sa siyudad ug gihatagan ug usa ka lugar nga pagahinloan.

Sa Hunyo 28 sa alas 8:00 s.b., mga 150 ka Saksi, hasta tibuok mga pamilya, nagdala sa ilang mga gamit ug nagtipon nga naghulat nga hatagan ug trabaho. Ang uban mibakasyon sa trabaho nga walay suweldo aron lang makatabang sa buluhatong paghinlo. Wala madugay, dihay awto nga miabot, ug ang bise-mayor migawas. “Kinsa kining mga tawhana?” siya nangutana.

“Mga Saksi ni Jehova sila,” siya gitubag. “Sila mianhi aron sa paghinlo sa siyudad human sa kalamidad.”

Natingala sa pagkakitag daghan kaayong tawo, ang bise-mayor miingon, “Dalayegon kaayo kamo! Salamat! Pagkatalagsaon!”

Sa ulahi, sa wala pa ang paniudto, laing opisyal nga babaye miabot sakay sa iyang awto. Siya mihunong, migawas, ug miduol sa mga Saksi. “Naniid kami sa inyong gibuhat, ug nahibulong gayod kami,” siya miingon. “Wala pa kami makakita sukad ug mga tawo nga nagtrabaho nga sama kaninyo. Daghan na kaayo ang inyong nahimo!”

Niana gihapong higayona, usa ka babayeng tigulang mihapit ug nangutana, “Nganong naghago man ug maayo kining mga tawhana?” Sa dihang gisultihan nga mga Saksi ni Jehova sila nga nagtabang sa siyudad, milugmaw ang luha sa iyang mga mata. “Tinuod gayod kamo nga mga magtutuo,” siya miingon. “Ang tinuod nga kinaiya sa mga tawo madayag dihang dunay mga kalamidad.” Laing babaye miingon: “Pagkadalayegon ang ilang gihimo! Dugay nang wala ako makakita ug sama niana.”

Pagkasunod adlaw gidayeg sa lokal nga mantalaang Na Vodakh ang mga Saksi ni Jehova, nga nag-ingon nga sila nakahakot ug kapin sa 100 ka toneladang lapok gikan sa siyudad. Ang mga opisyales sa siyudad nagpadala ug sulat sa pagpasalamat sa mga Saksi nga nag-ingon: “Ang inyong dakong tabang nakapabalik sa katahom sa siyudad . . . Sa walay duhaduha, ang mga pulong sa pasalamat sa daghang bisita sa atong siyudad maoy inyong labing maayong ganti.”

Bisan tuod ang kinaiyanhong kalamidad nga mihampak sa amihanan sa rehiyon sa Caucasus nakahatag ug dakong kapildihan ug kagubot, ang mga Saksi ni Jehova malipayon sa pagpakitag gugma sa ilang mga isigkamagtutuo ug sa ilang isigkatawo. Nakahatag usab ug dakong kalipay kini kanila tungod kay sila nahibalo nga ang maong mga pagpasundayag sa gugma makahatag ug kadayeganan kang Jehova, nga atong Maglalalang.

[Mga mapa sa panid 16]

(Alang sa aktuwal nga pagkahan-ay, tan-awa ang publikasyon)

Black Sea

CAUCASUS MOUNTAINS

Nevinnomyssk

Orbelyanovka

Zelenokumsk

Kislovodsk

Caspian Sea

[Credit Line]

Globe: Mountain High Maps® Copyright © 1997 Digital Wisdom, Inc.

[Hulagway sa panid 17]

Gipalit sa mga Saksi kining madaladala nga kosinilya ug naglutog mga pagkaon alang sa mga nanginahanglan

[Hulagway sa panid 17]

Gigamit niining maong Saksi ang sakyanan sa pamilya aron sa paghatod sa pagkaon ug mga tagana

[Hulagway sa panid 18]

Gidayeg sa mga opisyales sa Kislovodsk ang mga Saksi sa pagtabang sa paghinlo sa ilang siyudad