Aseite—May Panahon Bang Mahurot Kini?

“Kon walay [enerhiya] ang industriya dili na makapadayon sa paglihok . . . Dili na magama ang mga kotse, trak, tren, barko o ayroplano . . . Kon walay enerhiya, ang mga balay mabugnaw ug walay suga, ang pagkaon dili maluto. . . . Kon walay kahinguhaan ug enerhiya kita sa literal mahibalik sa Panahon sa Bato.”—Gikan sa “U.S. Geological Survey World Petroleum Assessment 2000.”

ANG mga eksperto sa enerhiya nangagpas nga ang abiyo sa aseite sa kadugayan mahurot. Gibanabana sa pipila nga ang reserbang aseite sa kalibotan molungtad na lang ug gikan sa 63 ngadto sa 95 ka tuig. Kasamtangan, ang ubang tinubdan sa enerhiya gipahimuslan na, nga ang pipila niana gigamit sulod nag mga dekada. Apil sa mga daling mahulipan mao ang mosunod nga mga pananglitan: solar, hangin, balod, hydroelektrik, ug mga init nga bugwak sa dagat. Apan sa pagkakaron, anaa pay mga suliran labot sa produksiyon ug pag-apod-apod niana.

Mangiob gayod ang palaaboton nga sa dihang mahurot na ang dili-mahulipan nga mga tinubdan sa enerhiya, panahon na nga moliso ngadto sa mga mahulipang mga tinubdan. Ang mga kompaniya sa aseite andam mopahimulos sa limitadong panahon nga ilang gibanabana nga aduna pay aseite. Ikasubo, adunay bug-os nga katarongan sa pagdahom nga ang mga suliran sa katilingban ug kalikopan nga nalangkit sa aseite mohangtod nianang gidugayona. Dili na mistil isulti pa, ang hinungdan niining mga sulirana dili mao ang aseite mismo. Ang kahakog ug kauhaw sa gahom sa tawo maoy nakahatag ug daotang dungog sa aseite.

Ikalipay, ang umaabot sa aseite​—ug, sa pagkamatuod, sa tanang tinubdan sa enerhiya​—wala diha sa mga kamot sa mga nasod. Kini anaa gayod sa mga kamot sa Maglalalang ug Mag-aatiman sa yuta, si Jehova nga Diyos, nga nagsaad nga mahanaw na sa dili madugay ang tanang suliran sa kalikopan ug katilingban nga nalangkit sa paggamit ug pag-abuso sa mga kahinguhaan sa yuta. (Pinadayag 4:11) Sumala sa giingon sa Bibliya, haduol na ang panahon sa dihang ang Diyos ‘maglaglag sa mga nagalaglag sa yuta.’ Ang matarong nga pagmando sa Diyos moresulta sa “usa ka bag-ong langit ug usa ka bag-ong yuta,” usa ka kalibotan nga walay hakog nga pagpanghimulos ug inhustisya, diin ang mga kahinguhaan sa yuta pagagamiton sa dili-mahakogong paagi sa kaayohan sa tanang masinugtanong katawhan.​—Pinadayag 11:18; 21:​1-4.

[Mga hulagway sa panid 12]

Ang kapuling mga kahinguhaan ug enerhiya naglakip sa mga solar panel ug mga turbina sa hangin