Gikan sa Among mga Magbabasa

Katingalahang mga Igbalati Ako 15 anyos ug nagabasa sa inyong mga magasin sukad nga nakat-on ako sa pagbasa. Salamat sa seryeng “Ang Katingalahang mga Igbalati sa Kinabuhi​—Giapresyar ba Nimo Kini?” (Marso 8, 2003) Makaiikag ang mga artikulo. Salamat sa dakong paghago ug pagpanukiduki nga inyong gihimo diha sa matag isyu sa Pagmata! Naghinamhinam kong makabasa na usab sa sunod nga gula!

H. S., Tinipong Bansa

Kining seryeha nakapaamgo kanako kon unsa kita ka komplikado. Nahingangha ako sa pagkahibalo nga ang tumoy sa tudlo sa tawo makabatyag sa usa ka tulbok nga tulo ka micron lamang ang gihabogon! Si Jehova nahingawa gayod sa iyang kalalangan sa paghunahuna niya nianang usa ka gamay kaayong butang.

E. R., Australia

Katsilang Martir Kinasingkasing nga pagpasalamat alang sa artikulong “Usa ka Lalaki nga Mihukom sa Pagsunod sa Diyos.” (Marso 8, 2003) Natandog ako sa pagbasa kon giunsa ni Antonio Gargallo, nga 19 anyos lamang ug bag-ong nabawtismohan ingong Kristohanon, sa pagpabiling maunongon sa dihang sa kalit lang siya kinahanglang mohimo ug seryoso kaayong desisyon. Nagtudlo kadto kanako kon unsa ka dakong kalig-on ug kalinaw sa galamhan ang mahatag ni Jehova kanato kon kita determinadong motuman sa iyang kabubut-on.

M. T., Italya

Daghang salamat niining mubo apan makapatandog nga eksperyensiya. Ang mga luha nanaligdig sa akong mga aping samtang nagbasa ako niini. Ilabina akong natandog sa sulat ni Antonio Gargallo ngadto sa iyang inahan ug igsoong babaye sa wala pa siya patya. Palihog ipadayon ang pagsulat mahitungod sa mga Kristohanon nga naghupot sa ilang integridad kang Jehova atubangan sa kamatayon aron mapalig-on namo ang among kaugalingong pagtuo.

R. O., Nigeria

Mga Sapatos Salamat sa artikulong “Komportable Bang Isul-ob ang Imong Sapatos?” (Marso 8, 2003) Nasinati nako sa daghang katuigan ang mga sakit sa tiil ug nakaagi na ug ubay-ubayng ginagmay nga mga operasyon sa mga tudlo niini. Nadiskobrehan ra gayod nako nga mas dako diay ug diyutay ang akong usa ka tiil kay sa usa. Tungod kay nagsige kog sul-ob ug dili hustong sukod sa sapatos sulod sa daghang tuig, nagasul-ob na ako karon ug sapatos nga tuyong gidisenyo alang sa mga tawong may mga abnormalidad sa bukog.

R. G., Tinipong Bansa

Kadto maoy matulon-anon kaayong artikulo. Apan, wala ninyo hisgoti nga kasagaran ang pinakamaayo nga panahon sa adlaw nga mopalit ug sapatos maoy sa hapon na kaayo, sa dihang ang mga tiil lagmit manghupong.

A. W., Canada

Ang “Pagmata!” nagtubag: Salamat sa imong obserbasyon. Palihog tan-awa ang balita sa “Pagpaniid sa Kalibotan” nga “Mga Suliran sa Panglawas Gilangkit sa mga Sapatos,” nga makita sa among gula sa Agosto 8, 1999.

Pagpangopya Buot nakong ipahayag ang akong apresasyon sa artikulong “Mga Batan-on Nangutana . . . Unsay Daotan sa Pagpangopya?” (Enero 22, 2003) Usa ako ka estudyante sa unibersidad ug nagbatasan sa pagpangopya sukad pa niadtong ako anaa sa kinto grado. Kanunay kong nagduhaduha kon ang pagpangopya husto ba, apan wala koy nakitang tubag. Busa kining artikuloha maoy tinuod nga bahandi. Magbag-o na ako sa akong mga paagi sugod sa sunod nakong pasulit, nga maoy akong gitun-an karon.

S. Y., Ukraine

Pagpamampam sa mga Bata Salamat sa seryeng “Pagpamampam sa mga Bata​—Usa ka Makapasubong Katinuoran.” (Pebrero 8, 2003) Ang nakapatandog gayod kanako mao ang kamatuoran nga bisan pa sa kasakit sa maong topiko, ang mga biktima gihatagan ug paglaom. Ang talaan sa mga kasinatian sa mga biktima nga inyong gihisgotan susama sa akong nasinatian. Kini nagpakita nga bisan niining daang sistema, ang mga samad sa mapait kaayong kasinatian maalim ra sa dakong sukod​—uban sa tabang ni Jehova.

P. R., Alemanya