Ang Hunahuna sa Bibliya

Kon ang mga Minahal sa Kinabuhi Dili Sama Kanimo ug Pagtuo

SUMALA sa usa ka banabana, adunay kapin sa 10,000 ka relihiyon ug mga sekta sa kalibotan. Sa usa ka nasod nasinatian sa mga 16 porsiyento sa hamtong nga populasyon ang pagbalhin ug laing relihiyon. Nan, dili ikatingala nga dunay dili pagsinabtanay bahin sa relihiyosong mga pagtuo tali sa kaparyentehan ug mga higala. Usahay kini moresulta sa pagkadaot sa mga relasyon. Busa mitungha ang pangutana, Unsaon pagtratar sa mga Kristohanon ang mga minahal sa kinabuhi nga dili sama nilag pagtuo?

Usa ka Espesyal nga Relasyon

Tagda, pananglitan, kon unsa ang giingon sa Bibliya mahitungod sa espesyal nga relasyon tali sa mga ginikanan ug sa ilang mga anak. Walay gitagal nga panahon diha sa sugo sa Exodo 20:12 nga “pasidunggi ang imong amahan ug ang imong inahan.” Gani, sa paghisgot ni Jesus niining sugoa, nga narekord sa Mateo 15:​4-6, dayag nga siya naghisgot sa pasidungog nga ihatag sa hamtong nga mga anak ngadto sa ilang mga ginikanan.

Ang basahon sa Bibliya sa Mga Proverbio nagpasidaan batok sa pagpakitag kawalay-pagtahod sa mga ginikanan. Ang Proverbio 23:22 nagtambag nga “ayaw tamaya ang imong inahan tungod lang kay siya tigulang na.” Ang Proverbio 19:26 pintok nga nagpasidaan nga ang usa nga “nagadaogdaog sa amahan ug nagaabog sa inahan maoy anak nga nagagawi nga makauulaw ug talamayon.”

 Tataw nga gipakita sa Kasulatan nga dili gayod nato pasagdan ang atong mga ginikanan. Wala maputol ang atong relasyon kanila tungod lang kay ang atong mga ginikanan wala modawat sa atong relihiyon. Kining maong mga prinsipyo sa Bibliya mapadapat usab sa ubang mga kadugo ug sa kapikas sa kaminyoon. Tataw nga ang mga Kristohanon obligado gihapon sa moral ug sa Kasulatanhon nga paagi sa paghigugma sa ilang mga paryente.

Ang Pagkamakataronganon Hinungdanon

Siyempre, nagpasidaan ang Bibliya batok sa daotang pakig-uban, ug kining maong impluwensiya mahimong maggikan sa suod nga mga paryente sa usa ka tawo. (1 Corinto 15:33) Daghang matinumanon nga mga alagad sa Diyos kaniadto ang mibarog dapig sa kon unsay matarong bisan pag ang ilang mga ginikanan misupak. Sa pagkatinuod mao kiniy gihimo sa mga anak ni Kore. (Numero 16:32, 33; 26:10, 11) Dili gayod angayng ikompromiso sa matuod nga mga Kristohanon ang ilang pagtuo aron pahimut-an ang uban, dili bisan ang ilang mga paryente.​—Buhat 5:​29.

Sa ubang mga situwasyon ang mga ginikanan o ubang mga minahal sa kinabuhi kusganong mosupak sa mga pagtuo sa usa ka Kristohanon. Ang uban lagmit nahimo pa ganing mga kaaway sa matuod nga Kristiyanidad. Sa maong mga kahimtang ang mga Kristohanon molihok sa makataronganong paagi aron mapanalipdan ang ilang espirituwalidad. Si Jesus tukmang miingon: “Ang mga kaaway sa usa ka tawo mao unya ang mga tawo sa iyang kaugalingong panimalay. Siya nga adunay labawng pagmahal sa amahan o sa inahan kay kanako dili-takos kanako; ug siya nga adunay labawng pagmahal sa anak nga lalaki o sa anak nga babaye kay kanako dili-takos kanako.”​—Mateo 10:36, 37.

Hinuon, sa kadaghanang mga kahimtang, ang mga Kristohanon wala makaagom ug grabeng pagsupak gikan sa ilang mga minahal sa kinabuhi. Wala lang gayod mahupti sa ilang mga paryente ang samang pagsabot sa mga pagtulon-an sa Bibliya. Ang Balaang Kasulatan nagdasig sa mga sumusunod ni Kristo sa pagtratar sa mga dili-magtutuo uban ang ‘kalumo’ ug “halawom nga pagtahod.” (2 Timoteo 2:​25; 1 Pedro 3:​15) Ang Bibliya tukmang nagtambag: “Ang ulipon sa Ginoo dili kinahanglang makig-away, kondili kinahanglang magmalumo sa tanan.” (2 Timoteo 2:​24) Gitambagan usab ni apostol Pablo ang mga Kristohanon nga “dili magsultig daotan mahitungod kang bisan kinsa, dili palaaway, makataronganon, magpasundayag ug bug-os nga kalumo sa tanang tawo.”​—Tito 3:2.

Makigkomunikar ug Ipahayag ang Gugma

Sa 1 Pedro 2:​12, ang mga Kristohanon gihatagan niini nga pagdasig: “Hupti ninyo ang maayong panggawi taliwala sa mga nasod [mga dili-magtutuo] aron nga . . . sila ingong resulta sa inyong maayong mga buhat nga niini sila mga saksing-nakakita maghimaya sa Diyos.” Kasagaran, ang mga minahal sa kinabuhi nga dili sama nato ug pagtuo makakita sa mga kausaban nga nahimo sa Bibliya diha sa atong kinabuhi. Hinumdomi nga daghang dili-matinagdanon o mga magsusupak pa gani sa kamatuoran sa Bibliya ang nagbag-o sa ilang hunahuna. Lagmit, alang sa pipila ka tawo, mokabat pag daghang katuigan ang pagpaniid pag-ayo sa maayong panggawi sa usa ka kapikas sa kaminyoon o usa ka anak aron susihon kon unsa gayoy hinungdan sa maong panggawi. Kon ang mga tawo dili modawat sa mga kamatuoran sa Bibliya, kinahanglang ang rason dili tungod kay sila gipasagdan sa usa ka Kristohanong paryente.

Sa pagkatinuod, lainlain ang mga kahimtang, ug ang ubang Kristohanon nga mga Saksi nagpuyo nga layo kaayo sa ilang mga ginikanan. Mahimong dili posible ang subsob nga pagbisita sumala sa atong gusto. Apan ang pagpadala ug mga sulat, pagtawag sa telepono, o ang regular nga pagpakigkontak sa ubang mga paagi magpasalig sa atong mga minahal sa atong gugma. Daghang dili matuod nga mga Kristohanon ang nahigugma sa ilang mga ginikanan ug ubang mga paryente ug regular nga nakigkomunikar kanila bisan unsa pa ang ilang mga relihiyon. Dili ba angay nga ang Kristohanong mga Saksi mobuhat usab sa ingon?

[Hulagway sa panid 26]

Ang pagpakigkontak sa imong mga minahal magpasalig kanila sa imong gugma