Milyonmilyon ang Motambong—Atua Ka ba Unya Didto?

◼ ASA? Ngadto sa usa sa “Himayaa ang Diyos” Distritong mga Kombensiyon nga gipahigayon sa gatosan ka dapit sa tibuok kalibotan. Ang tulo-ka-adlaw nga programa, nga gihikay sa mga Saksi ni Jehova, giandam aron sa pagtabang sa tanang mahigugmaon sa Diyos sa pagkinabuhi sa paagi nga makahatag sa ilang Maglalalang sa dungog nga takos kaniya.

Ang unang adlaw sa kombensiyon magsentro sa pagtagad diha sa temang “Takos Ikaw, Jehova, . . . nga Modawat sa Himaya.” (Pinadayag 4:11) “Ang Kalalangan Nagpahayag sa Himaya sa Diyos” mao ang ulohan sa pakigpulong nga motabang kanato sa pagsabot kon sa unsang paagi ang mga hiyas ni Jehova “tin-awng makita,” o “maila pinaagi sa mga butang nga gihimo.” (Roma 1:20) Ang makapadasig nga keynote address, “Ang Mahimayaong Matagnaong mga Panan-awon Nagpadasig Kanato!,” moawhag sa tanan sa pagbutang kanunay sa hunahuna sa dagkong mga hitabo nga gitagna sa Pulong sa Diyos alang sa atong adlaw. “Ang Tagna ni Amos—Ang Mensahe Niini Alang sa Atong Adlaw” mao ang ulohan sa tulo-ka-bahin nga simposyum nga magpasiugda sa modernong-adlaw nga kapadapatan niining karaang mga pasidaan sa manalagna. “‘Ang Maayong Yuta’—Pasiunang Pagtan-aw sa Paraiso” mopausbaw sa atong pagpabili sa rehiyon nga gihatag ni Jehova ngadto sa iyang karaang katawhan.

Ang ikaduhang adlaw sa kombensiyon adunay temang “Ipahayag sa Taliwala sa Kanasoran ang Iyang Himaya,” nga gipasukad sa Salmo 96:3. Lakip sa mga haylayt mao ang simposyum nga nag-ulohang “Ginasumbalik-Silaw Samag mga Salamin ang Himaya ni Jehova.” Kining tulo-ka-bahin nga presentasyon maglaraw kon sa unsang paagi kita makatuman sa atong ministeryo sa mas epektibong paagi. Ang pakigpulong nga “Gidumtan nga Walay Pasikaranan” pagasundan sa diskurso sa dedikasyon ug bawtismo, nga maoy usa ka hinungdanong bahin sa tanang kombensiyon sa mga Saksi ni Jehova. Sa hapon, ang pakigpulong nga “Pagbantay sa ‘Tingog sa mga Estranyo’” mohatag ug tukma-sa-panahong pahamatngon mahitungod sa ‘mini nga mga magtutudlo’ nga mosulay sa paglimbong sa katawhan sa Diyos pinaagig “mini nga mga pulong.” (2 Pedro 2:1, 3) “Ang Atong mga Anak—Usa ka Hamiling Panulondon” maoy motapos sa programa nianang adlawa. Kana maoy usa ka malipayong okasyon alang sa mga ginikanan maingon man sa mga bata.

Sa kataposang adlaw sa kombensiyon tagikon ang temang “Himoa ang Tanang Butang Alang sa Kahimayaan sa Diyos.” (1 Corinto 10:31) Duyogan sa usa ka serye sa mga interbiyo ang pakigpulong nga nag-ulohang “Kon sa Unsang Paagi ang mga Batan-on Nagadayeg Kang Jehova.” Ang sesyon sa buntag maglakip usab ug 45-minutos nga drama nga may ulohang “Maisogong Nagsangyaw Bisan pa sa Pagsupak.” Sanglit ang relihiyon anaa kanunay sa balita, tubagon sa pakigpulong publiko ang pangutana, “Kinsay Nagahimaya sa Diyos Karon?” Ang pakigpulong nga “‘Magpadayon sa Pagpamungag Daghan’ sa Kahimayaan ni Jehova” motapos sa kombensiyon ngadto sa usa ka makapadasig nga konklusyon.

Pipila lamang kini sa makapalihok nga mga presentasyon nga mapatalinghogan sa “Himayaa ang Diyos” Distritong Kombensiyon sa mga Saksi ni Jehova. Segurado nga buot nimong motambong sa tibuok tulo ka adlaw. Alang sa dapit sa kombensiyon nga labing duol kanimo, kontaka ang Kingdom Hall sa mga Saksi ni Jehova sa imong dapit o pagsulat sa mga magpapatik niining magasina.