Usa ka Bulawanong Gasa Gikan sa Halayong Amihanan

TINAMPO SA MAGSUSULAT SA PAGMATA! SA SWEDEN

‘Unsa may atong dad-ong sinugatan nga komon sa atong nasod?’ naghunahuna ang akong asawa ug ako sa wala pa mobiya sa Sweden aron sa pagduaw sa pipila ka higala sa Inglaterra. Kay gustong mahimong edukasyonal ang among gasa nga Nordic cloudberry jam nga hinimo sa balay, gibalay namo ang usa ka matulon-anong marka nga sa panguna gipasukad sa kaugalingon namong mga obserbasyon ug sa ubang lokal nga mga reperensiya. Ang mosunod mao ang resulta sa among pagpanukiduki.

Unsa ang mga Cloudberry?

Ang cloudberry, Rubus Chamaemorus sa Latin, motubo diha sa mga tanom nga ubos sa 30 sentimetros ang gitas-on. Ang matag tanom magpatunghag usa lamang ka puting bulak ug usa ka berry. Kon hilaw pa, ang berry maoy pula ug gahi, apan kon kini mogulang na, kini modalag o modalag-brawon ang kolor ug mohumok ug mahimong dugaon. Lagmit ginganlan kini nga cloudberry tungod kay sa amihanang Inglaterra ang mga cloudberry motubo diha sa kabukiran diin ang mga panganod maporma sa mubo nga mga altitud. Makaplagan usab nimo kini diha sa umog nga mga dapit, kasagaran diha sa mga kapatagan ug kalamakan sa tibuok habagatang Artiko. Sa Sweden kini kasagarang mahinog sa Agosto, sa dihang hapit nang matapos ang tinghunlak sa Nordic.

Ang Bulawan sa Kalamakan

Sulod sa daghang siglo, ang mga lumad nga Lapp mamupo ug mga cloudberry aron kan-on panahon sa tingtugnaw. Kini dagaya sa bitamina C ug sa uban pang mga bitamina, ug sanglit duna man kiniy kinaiyanhong preserbatibo, ang cloudberry jam dili madaot sulod sa daghang tuig kon huptang bugnaw. Tungod kay ang pangunang pagkaon sa unang mga molupyo niining amihanang mga rehiyon mao ang karne ug isda, ang mga cloudberry nahimong hinungdanong suplemento sa bitamina. Mao diay nga kini gitawag nga bulawan sa kalamakan!

Karong panahona, daghang cloudberry ang pupoon aron itumod ngadto sa dagkong mga merkado ug industriya. Sa Sweden, pananglitan, panahon sa normal nga tuig, ang merkado makabaligya ug linibo ka toneladang cloudberry—tanan gipupo nga kinamot! Ang kugihan nga mga tigpupo ug cloudberry, sagad nagtungha nga mga bata nga namakasyon, mokitag ekstrang kuwarta gumikan niini. Gipasidunggan pa gani sa mga taga-Pinlandia ang cloudberry pinaagi sa pagpaugdo niini ingong adorno diha sa ilang bag-ong duha-ka-euro nga sensilyo!

Lami nga Kasinatian

Ang cloudberry adunay makapapresko, tam-is ug medyo aplod nga lami. Makakaplag ka tingali ug jam o gipreserbar nga mga cloudberry ug bisan mga ilimnon nga sinagolag cloudberry diha sa linaing mga tindahan o uban pang mga tindahan sa dagkong mga siyudad sa Uropa ug Tinipong Bansa. Ang cloudberry ice cream parfait subsob nga gidalit ingong mga siragana sa tinuig nga salosalo alang sa mga mananaog sa Nobel Prize, nga gipahigayon sa Stockholm, Sweden. Ang eksklusibong mga restawran mahimong magdalit sa init nga jam ug gamiton kana ingong pangpalami sa vanilla ice cream. Gawas pa, ang jam lami kaayong iparis sa Swedish cheesecake o piniritong Camembert cheese ug laming paunod usab sa pastri. Ang ilimnon nga golden cloudberry gigama sa Pinlandia, ug ang binong cloudberry di pa dugayng gibaligya diha sa merkado sa mga bino sa Sweden.

Kon mahiadto ka sa dapit diin adunay mga cloudberry, pupoa kini ug tagamtama ang kalami niini nga presko, ilabina kon buliboran ug asukar, dayon paibabwan ug daghang binatil nga krema. Mouyon ka nga kini bililhon gayod samag bulawan—ug matukmod ka sa pagpasalamat sa imong Maglalalang tungod niining lamiang gasa.