Gikan sa Among mga Magbabasa

Pagkatulog Ang serye nga “Igo ba ang Imong Katulog?” (Marso 22, 2003) maoy tukma kaayo sa panahon alang nako. Tungod kay kalit lang nasakit ang akong anak nga babaye, nagsugod ko sa pag-antos sa insomnia. Human sa lima o unom ka adlaw, miadto ko sa duol nga ospital, ug sa tabang sa tambal, makatulog na ko karon. Apan, ang inyong mga artikulo nagsugyot nga kinahanglan usab akong mohimog igong ehersisyo panahon sa adlaw apan dili mag-ehersisyo nga hapit na ang tingkatulog. Sulayan dayon nako sa pagpadapat ang maong tambag.

T. M., Japan

Di pa dugay, nakasinati kog hilabihang kakapoy. Ang doktor sa among pamilya naghiling nako ug nakahinapos nga wala ra koy igong katulog sa magabii ug naapektohan sab ko sa tambal nga akong gitomar para sa patol. Nagduda ko sa iyang dayagnosis. Apan usa ka semana sa ulahi nadawat nako ang inyong mga artikulo bahin sa pagkatulog. Gihurot nakog basa ang maong magasin, ug human masulayi ang pasulit sa panid 9, nakahinapos ko sama sa nahinapos sa akong doktor. Gisulayan nako karon ang mga sugyot nga gihatag sa artikulo. Salamat sa nunot-sa-panahong kasayoran.

M. B., Tinipong Bansa

Mga Lubi Gusto nakong ipahayag nga nalingaw gyod ko sa artikulong “Usa sa Labing Mapuslanong mga Nut sa Yuta.” (Marso 22, 2003) Bag-o lang kong miadto sa Mexico, ug nakita ko mismo kon unsa ka daghag gamit ang lubi! Nakita ko halos ang tanang gamit sa lubi nga gilista diha sa artikulo. Ang lain pang gamit sa lubi naglangkit sa pagputol ug mga lukay, bagusan kini, ug banganon ang 10 ngadto sa 15 niining uga, lubay nga mga tukog. Maayo kaayo kining himoon nga pangdagpas sa langaw!

D. S., Tinipong Bansa

Kining artikuloha nakapahinumdom nako sa akong Lola nga naghimog mga hungot sa katuigan sa 1930. Daghan sa iyang mga silingan nagtukod sa ilang mga payag ginamit ang tabla nga gikan sa lubi, ug ang ilang mga atop maoy mga salirap. Gusto ko kamong pasalamatan tungod sa maong matulon-anong mga artikulo.

M. B., Tinipong Bansa

Pagpasuso Ang usa ka artikulo sa “Pagpaniid sa Kalibotan” nga “Mga Benepisyo sa Pagpasuso” (Marso 22, 2003) nakapalibog nako. Wala ko magduda nga kadtong wala gipasuso mahimong dunay mga abnormalidad sa ilang sistema sa imyunidad. Ako wala gipasuso ug kanunayng matrangkaso. Apan ang pagkutlo sa usa ka pagtuon nga nagpaila nga kadtong wala gipasuso ubos ug IQ kay niadtong gipasuso nagpakitag kawalay-pagpakabana sa ilang mga pagbati.

C. B., Italya

Ang “Pagmata!” nagtubag: Dili namo katuyoan nga makapasakit kang bisan kinsa. Gitaho lang namo ang mga kaplag sa pagtuon sa Denmark mahitungod sa pagpasuso. Ang pagpatik sa maong impormasyon magtugot sa mga ginikanan karong adlawa sa paghimog may-kasayorang mga desisyon maylabot sa ilang mga pamaagi sa pagpadako ug anak.

Mga Proverbio sa Aprika Padayon akong nahingangha sa daghang nagkalainlaing mga artikulo nga anaa sa Pagmata! Tigbasa ako niini sulod na sa mga 40 ka tuig, ug nalingaw gayod ako sa artikulo nga “Mga Proverbio sa Akan nga Katawhan—Aninag sa mga Sukdanan sa Katilingban.” (Marso 22, 2003) Nakatabang kini kanako nga masabtan kon unsa ka hinungdanon ang maayong pamatasan sa pagpakiglabot sa atong isigkatawo. Akong gikopya ang pipila ka proverbio aron makahisgot ako bahin niini matag karon ug unya.

D. Z., Tinipong Bansa

Wala pa ko makabasa sukad ug maanindot, makalingaw, ug matulon-anon nga artikulo bahin sa mga proverbio. Pagkamakalingaw nga kasinatian ang pagbasa bahin sa mga kostumbre sa ubang kultura. Human sa matag proverbio, mohunong ko kadiyot ug mosulay sa paghunahuna kon unsay kahulogan niana. Kasagaran, wala gyod motakdo sa tinuod nga kahulogan ang akong gihunahuna!

J. K., Alemanya