Gisundog sa Tawo ang Disenyo sa Maglalalang

Nganong ang mga bombilya nga ingon ka nipis sa papel dili man mabuak bisag gunitag maayo inigtaod niini sa socket? Sumala sa librong How in the World?, ang tubag nahiluna ilabina diha sa porma sa bombilya, nga gipasukad sa porma sa tipaka sa itlog. Bisan tuod nipis kaayo ang mga tipaka sa itlog, kini dili mabuak sa kabug-at sa inayan iniglumlom niini diha sa salag. Kini tungod kay ang porma sa itlog adunay estruktural nga kalig-on nga dili mabuak sa kabug-at sa langgam. (Ang mas bagang mga tipaka basin dili madutlan inigtuhik sa kuyabog aron kini mogawas.) Kay sinundog sa disenyo sa Maglalalang, ang mga bombilya may pagkalingin aron kon gunitan ug maayo, ang puwersa “mabahinbahin ngadto sa tanang direksiyon nga halayo ra sa gigunitan nga bahin gumikan sa kakurba sa bildo.” Busa, sama sa itlog, ang sobrang kabug-at wala matingob diha sa usa ra ka bahin, mao nga ang bombilya dili mabuak. Daghag nakat-onan ang tawo tungod sa pagtuon sa kalalangan!