Mga Batan-on Nangutana . . .

Sa Unsang Paagi Makagawas Ako sa Anino sa Akong Igsoon?

“Gusto kong mahimong lahi nga indibiduwal, apan gibati ko kanunay nga kinahanglan kong molihok sumala sa reputasyon sa akong mga igsoong babaye. Gibati ko nga dili ko gayod mahimo ang mga butang nga nalampos sa akong mga igsoon.”—Clare.

ADUNA ka bay igsoong lalaki o babaye nga daw malamposon sa halos tanang butang? Kanunay ka bang awhagon sa imong mga ginikanan nga mahimong sama nianang igsoona? Kon mao, lagmit mahadlok ka nga kanunay kang mailalom sa iyang anino—nga ang imong bili kanunayng sukdon sumala sa kon unsa ka maayo ang imong pagsunod sa mga kalamposan sa imong igsoon.

Ang duha ka magulang nga lalaki ni Barry * pulos graduwado sa tinamod-kaayo nga Ministerial Training School * ug dunay ekselenteng reputasyon ingong mga Kristohanon. Si Barry miangkon: “Naapektohan ang akong pagsalig sa kaugalingon, tungod kay gibati ko nga dili gyod ko makakab-ot sa ilang mga sukdanan sa buluhatong pagsangyaw o mahimong sama nila ka maayong mopakigpulong sa publiko. Nalisdan ko sa pagbaton ug akong kaugalingong mga higala tungod kay mag-uban-uban ra man ko sa akong mga magulang nga lalaki sa dihang imbitahon sila. Gibati ko nga mahigalaon lamang ang mga tawo nako tungod lang sa akong mga igsoon.”

Natural lang nga mayugot kon duna kay igsoon nga mao ray kanunayng dayegon. Sa kapanahonan sa Bibliya, ang batan-ong si Jose maoy lahi taliwala sa iyang mga igsoong lalaki. Unsay epekto niini nganha sa iyang mga igsoon? “Sila nagsugod sa pagdumot kaniya, ug sila wala makahimo sa pagsulti kaniya nga madinaiton.” (Genesis 37:1-4) Siyempre, makasaranganon si Jose. Apan ang imong igsoon mahimong magpukaw ug pakig-indig ug kayugot pinaagi sa pagpahinumdom kanunay nimo sa iyang mga kalamposan.

Ang reaksiyon sa ubang mga batan-on niining tanan mao ang pagrebelde—tingali pasagdang moubos ang ilang mga grado sa eskuylahan, dili na kaayo makigbahin sa Kristohanong mga kalihokan, o mohimog makalilisang nga kagawian. Maghunahuna tingali sila nga kon dili nila mahimo ang nahimo sa ilang igsoon, wala nay kapuslanan ang pagsulay sa paghimo niana. Apan sa kadugayan, ang pagrebelde makadaot lamang kanimo. Sa unsang paagi makagawas ka gikan sa anino sa imong igsoon sa paagi nga mobati kag katagbawan sa imong kaugalingon?

 Hupti ang Hustong Panglantaw Bahin sa Imong mga Igsoon

Ang pagsentro sa tanan nimong pagtagad sa nalampos sa imong magulang basin magpatuo kanimo nga siya hingpit ug nga dili ka gayod mahisama kaniya. Apan tinuod ba gayod kana? Ang Bibliya prangkang nag-ingon: “Ang tanan nakasala ug wala makaabot sa himaya sa Diyos.”—Roma 3:23.

Oo, bisag unsa pa ang kahanas o abilidad sa imong mga igsoon, sila maoy ‘mga tawo gihapon nga sama kanatog mga kaluyahon.’ (Buhat 14:15) Walay katarongan nga ituboy sila o himoon silang idolo. Ang bugtong tawo nga nakahatag ug hingpit nga panig-ingnan mao si Jesu-Kristo.—1 Pedro 2:21.

Mokat-on Gikan Kanila!

Sunod, sulayi ang pagtan-aw sa imong kahimtang ingong kahigayonan sa pagkat-on ug usa ka butang. Pananglitan, tagda ang mga igsoong lalaki ug babaye ni Jesu-Kristo. (Mateo 13:55, 56) Hunahunaa kon unsa untay ilang makat-onan gikan sa ilang hingpit nga igsoon! Bisan pa niana, “sa pagkatinuod, ang iyang mga igsoon wala magpasundayag ug pagtuo kaniya.” (Juan 7:5) Tingali ang garbo ug pangabugho mao ang nakababag sa ilang pagtuo. Ang espirituwal nga mga igsoon ni Jesus—ang iyang mga tinun-an—mao ang misanong sa iyang mahigugmaong imbitasyon: “Magtuon gikan kanako.” (Mateo 11:29) Ug human lamang sa pagkabanhaw ni Jesus nga ang iyang mga igsoon sa unod sa kataposan nakaamgo kon unsa ka dako ang ilang makat-onan gikan kang Jesus. (Buhat 1:14) Hangtod sa maong panahon, ilang nasayloan ang daghang bililhon nga mga kahigayonan sa pagkakat-on gikan sa ilang talagsaong igsoon.

Si Cain nakahimo usab sa susamang sayop. Ang iyang manghod nga si Abel maoy talagsaong alagad sa Diyos. Ang Bibliya nag-ingon nga “si Jehova nagtan-aw nga may pag-uyon kang Abel ug sa iyang halad.” (Genesis 4:4) Apan, tungod sa usa ka hinungdan, ang Diyos “wala magtan-aw nga may pag-uyon kang Cain ug sa iyang halad.” Angay untang magpakita si Cain ug pagkamapainubsanon ug mokat-on gikan sa iyang manghod. Apan, “si Cain nanginit sa dakong kasuko” ug gipatay na hinuon niya si Abel.—Genesis 4:5-8.

Walay duhaduha nga dili ka gayod masuko sa imong igsoon nga susama niana. Apan imong masayloan usab ang bililhong mga kahigayonan kon imong tugotan ang garbo ug pangabugho nga mobabag. Kon aduna kay igsoon nga hawod sa matematika, batid sa kasaysayan, hanas sa imong paboritong dula, nakabaton ug talagsaong kahibalo sa Kasulatan, o maayong mopakigpulong sa publiko, kinahanglan nimong pakigbisogan ang pangabugho! Gawas pa, “ang pangabugho maoy pagkadunot sa kabukogan” ug makadaot lamang kanimo. (Proverbio 14:30; 27:4) Inay mayugot, sulayi ang pagkat-on gikan sa imong igsoon. Dawata ang kamatuoran  nga siya adunay pipila ka abilidad o kahanas nga wala nimo mabatoni. Matikdi kon giunsa paghimo sa imong igsoon ang mga butang—o, mas maayo pa, pagpatabang niya.

Si Barry, nga gihisgotan ganina, nakabenepisyo gikan sa maayong mga panig-ingnan sa iyang mga igsoon. Siya miingon: “Nakita ko kon unsa ka malipayon ang akong mga igsoon tungod kay sila andam sa pagtabang sa mga tawo diha sa kongregasyon ug sa buluhatong pagsangyaw. Busa nakahukom ko sa pagsundog sa panig-ingnan sa akong mga igsoon, ug nakigbahin ko sa buluhaton sa konstruksiyon sa Kingdom Hall ug sa Bethel. Ang kasinatian nga akong naangkon nakahatag kanakog kompiyansa ug nakatabang kanako sa pagpalambo sa akong relasyon uban kang Jehova.”

Pagkaplag sa Imong Maayong mga Hiyas

Tingali mahadlok kang mosundog sa maayong mga hiyas sa imong igsoon tungod kay magkahulogan kana nga mawad-an ka sa imong kaugalingong personalidad. Apan dili kinahanglang mahitabo kana. Gidasig ni apostol Pablo ang unang-siglong mga Kristohanon: “Mahimong mga tigsundog kanako.” (1 Corinto 4:16) Nagkahulogan ba kini nga gusto ni Pablo nga hikawan sila sa ilang kaugalingong personalidad? Wala gayod. Dunay dakong luna alang sa kadaiyahan sa personalidad. Kon dili ka sama ka hawod sa imong igsoon sa matematika, wala kana magpasabot nga ikaw may diperensiya. Nagkahulogan lamang kana nga ikaw lahi.

Si Pablo naghatag niining praktikal nga tambag: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.” (Galacia 6:4) Nganong dili paningkamotang maugmad ang kaugalingon nimong mga kahanas ug mga abilidad? Ang pagkat-on sa pagsulti ug usa ka langyawng pinulongan, pagtugtog ug usa ka instrumento sa musika, o paggamit ug kompiyuter mahimong makatabang kanimo sa pagbati nga mas maayo bahin sa imong kaugalingon, ug mahimong makahatag kini kanimo ug bililhong mga kahanas. Ayawg kabalaka kon dili nimo mabuhat ang mga butang sa hingpit nga paagi! Pagkat-on nga mahimong kugihan, responsable, ug hanas. (Proverbio 22:29) Wala ka tingaliy kinaiyanhong katakos sa usa ka butang, apan “ang kamot sa mga kugihan mao ang magamando,” nag-ingon ang Proverbio 12:24.

Sa laing bahin, ang imong espirituwal nga kauswagan mao gayod ang angay mong ugmaron. Ang espirituwal nga mga kahanas mas dumalayon ug bili kay sa bisan unsang abilidad nga mas daling mamatikdan sa uban. Tagda ang kaluhang managsoon nga si Esau ug Jacob. Gidayeg pag-ayo si Esau sa iyang amahan tungod kay siya “usa ka tawo nga mahibalong mangayam, usa ka tawo sa kapatagan.” Sa sinugdan, ang iyang igsoon nga si Jacob mahimong dali rang mataligam-an tungod kay siya “usa ka tawo nga walay-ikasaway, nga nagpuyo sa mga tolda.” (Genesis 25:27) Napakyas si Esau sa pag-ugmad sa iyang espirituwalidad ug wala niya maangkon ang mga panalangin. Giugmad ni Jacob ang gugma alang sa espirituwal nga mga butang ug dagayang gipanalanginan ni Jehova. (Genesis 27:28, 29; Hebreohanon 12:16, 17) Unsa ang leksiyon? Ugmara ang imong espirituwalidad, ‘palamdaga ang imong kahayag,’ ug ang imong “pag-uswag madayag sa tanan nga mga tawo.”—Mateo 5:16; 1 Timoteo 4:15.

Si Clare, nga gihisgotan ganina, miingon: “Tagbaw na ko sa pagkinabuhi diha sa anino sa akong mga magulang nga babaye. Apan nakahukom ko sa pagsunod sa tambag sa Kasulatan sa ‘pagpasangkad’ sa akong mga pagmahal. Lainlain ang akong gipakig-ubanan diha sa pagsangyaw sa kanataran sa kongregasyon, ug nangita kog praktikal nga mga paagi sa pagtabang niadtong nanginahanglan diha sa kongregasyon. Nagdapit usab ako ug mga igsoong lalaki ug babaye nga lainlain ug pangedaron ngadto sa among balay ug gilutoan ko silag pagkaon. Mas daghan na ko karon ug mga higala, ug mas masaligon na ako.”—2 Corinto 6:13.

Matag karon ug unya, ang imong mga ginikanan makalimot tingali ug awhagon ka nga mahimong sama sa imong igsoong lalaki o babaye. Apan ang paghunahuna nga ang imong mga ginikanan naglantaw lamang sa imong kaayohan makapamenos sa kahiubos. (Proverbio 19:11) Apan, mas maayo kon matinahoron nimong sultian ang imong mga ginikanan kon unsay imong gibati bahin sa maong mga pagtandi. Tingali mangita silag laing mga paagi sa pagpahayag sa ilang mga kahingawa.

Ayawg kalimti nga tagdon ka ni Jehova nga Diyos mismo kon moalagad ka kaniya. (1 Corinto 8:3) Si Barry nagsumaryo niini pinaagi sa pag-ingon: “Nakaplagan ko nga sa nagkadugay akong nag-alagad kang Jehova, ako mas malipayon. Karon ang mga tawo magtan-aw kanako ingong indibiduwal ug nagpabili kanako, sama sa ilang pagpabili sa akong mga igsoon.”

[Mga footnote]

[Hulagway sa panid 25]

Ang imo bang igsoon mao ang kanunayng gihatagag pagtagad?

[Hulagway sa panid 26]

Susiha ang kaugalingon nimong mga abilidad ug mga interes

[Hulagway sa panid 26]

‘Palamdaga ang imong kahayag’ pinaagi sa pag-ugmad sa imong espirituwal nga mga kahanas