Usa ka Libro nga May Talagsaong Epekto

TUNGOD kay daghan kaayong batan-on ang nagsundog sa nagkato, nunot-sa-uso nga mga estilo, makaparepresko kon ang uban mosulay sa pagpamesti nga makasaranganon. Sa Balykchy, usa ka siyudad sa Kyrgyzstan, nga kanhi usa ka republika sa Unyon Sobyet, usa ka grupo sa mga batan-on ang nakahukom sa pagpaletrato nga magsul-ob ug sinina nga sama sa ilang nakita sa hapin sa librong Mga Pangutanang Gisukna sa mga Batan-on—Mga Tubag nga Mosaler. Ang maong mga batan-on miadto sa usa ka propesyonal nga letratista ug mihangyo kaniya nga letratohan ang grupo nga sama nianang sa hapin sa libro. Ang letrato nga makita dinhi mao ang gikuha sa letratista.

Human makapaletrato, gihatag sa mga batan-on ang libro ngadto sa letratista. Niadtong higayona, wala kaayo siya magpakitag interes, tungod kay wala man siya motuo sa Bibliya. Apan, sa dihang namalik ang mga batan-on sa estudio pipila ka adlaw sa ulahi aron kuhaon ang letrato, siya nag-ingon nga sukad masukad wala pa siya makabasa ug ingon niadtong libroha. Siya miingon nga wala gayod niya damha nga ang Bibliya naghatag diay sa maong praktikal nga tambag, ug buot niyang mahibalo pag dugang. Tungod niana, misugod siya sa pagtuon sa Bibliya.

Makahangyo ka usab ug kopya niining libroha, nga gidisenyo ilabina sa pagtabang sa mga batan-on sa mga problema nga ilang giatubang karon. Pil-api lang ang nagauban nga kupon ug ipadala ngadto sa adres nga gipakita diha sa kupon o sa nahiangayng adres nga gilista sa panid 5 niining magasina.

□ Interesado akong makadawat ug kopya sa librong Mga Pangutanang Gisukna sa mga Batan-on—Mga Tubag nga Mosaler.

Ipaila kon unsang pinulongan.

□ Palihog kontaka ako mahitungod sa usa ka libreng pagtuon sa Bibliya sa balay.