Gikan sa Among mga Magbabasa

Pag-abuso sa Droga Ang atubangang hapin sa Abril 8, 2003, nga gula (“Pag-abuso sa Droga Diha sa Pamilya—Unsay Imong Mahimo?”) nakadani sa akong pagtagad. Gitun-an nako sa Bibliya ang usa ka babaye nga ginganlag Linda. Duha sa iyang mga anak nga lalaki ang nagiyan sa droga. Pagkaugma sa buntag akong gitun-an ang maong gula uban kaniya—parapo por parapo. Nakahatag kini kaniya ug dakong kadasig ug kalig-on. Ang maong impormasyon miabot sa husto gayong panahon.

C. M., Tinipong Bansa

Ako nagdumalag usa ka matang sa serbisyo nga motabang sa mga pamilya sa pagsagubang sa pagkagiyan sa droga ug sa alkoholismo. Bisan tuod ako usa ka Katoliko, himasa ako sa Pagmata! Gusto nakong magpasalamat sa serye bahin sa pag-abuso sa droga diha sa pamilya. Akong gibasa kini uban ang dakong kaikag, kay makatabang kini kanako sa akong trabaho uban sa mga batan-on.

H. C., Ecuador

Pagkinamot Akong gibasa ang artikulo nga “Kinamot nga Paagi sa Pagkaon” sa Abril 8, 2003, nga gula. Ako diyes anyos, ug gisulayan nako pagkaon ang init nga beef hash (linutong karne ug patatas nga gihiwahiwa ug giinit pag-usab) nga nagkinamot. Lisod kaayo kadto. Apan makalingaw kadto, ug lami kaayo ang hash! Salamat niining artikuloha. Di pa dugay ginadala nako ang Pagmata! ngadto sa eskuylahan ug ginabasa kini panahon sa reses.

M. T., Japan

Mga Pasulit sa Bibliya Buot kong mahibalo kamo nga ganahan ko sa mga crossword puzzle nga inyong gipatik. Daghan kog nakat-onan gikan niana.

R. N., Tinipong Bansa

Akong gitudloan ang akong mga anak sa Bibliya sukad sa bata pa sila kaayo. Apan karon nga dagko na sila, malisod ang pagpaikag kanila sa espirituwal nga mga butang. Busa nangita kog mga paagi sa pagtabang kanila. Sa dihang nadawat nako ang Abril 8 nga gula ug gitun-an ang bahin nga “Nahibalo Ka Ba?” nakaideya ko. Dihadiha akong gigamit ang mga pangutana alang sa akong mga anak, nga naghimo niana sa paagi nga daghan silag kapiliang tubag, ug gipaskin nako sa bungbong ang mga pangutana. Sa sinugdan, dili sila interesado niana, apan pagkataudtaod nagsugod sila sa pagtubag sa mga pangutana. Karon gihimo namo ang mga pangutana nga topiko sa among mga kabildohay sa pamilya.

R. M., Japan

Ang “Pagmata!” nagtubag: Ang pasulit sa Bibliya nga “Nahibalo Ka Ba?” makita diha sa pipila ka pinulongan sa edisyon sa “Pagmata!” nga walay crossword puzzle.

Mga Lubi Nalingaw gayod ako sa artikulong “Usa sa Labing Mapuslanong mga Nut sa Yuta,” diha sa Marso 22, 2003 nga gula. Ang usa ka higala ug ako magkauban sa pagpanghimo ug sabon ingong pasatiempo. Naggamit kami ug lana sa lubi diha sa among sabon, tungod kay maayo kini sa panit ug daghag bula. Human mabasa kining artikuloha gipabilhan pa nako pag-ayo ang lubi.

C. B., Canada

Kagawasan sa Panulti Bag-o pa nakong nahuman ug basa ang seryeng “Ang Korte Suprema sa T.B. ug ang Kagawasan sa Panulti.” (Enero 8, 2003) Ang maong serye nagpatungha ug lainlaing emosyon dinhi kanako—kahingangha nga ang debate bahin niining maong topiko nagpadayon pa gihapon sa Tinipong Bansa, pagdayeg sa mahanasong pagpresentar sa atong Kristohanong mga igsoon sa atong punto-debista, ug lalom nga apresasyon nga ang matarong nga mga desisyon mahimong ipakanaog bisan niining dili-matarong nga kalibotan. Gibati nako ang dakong kalipay sa paghimo sa buluhatong pagwali sa maayong balita. Ang maong mga artikulo nagpalapad sa among kahibalo.

O. S., Belarus

Pribasiya Ang seryeng “Nameligro ba ang Imong Pribasiya?” (Enero 22, 2003) nakatabang kanako nga mas makasabot kon unsay kahulogan sa pagtahod sa mga katungod sa uban. Ang pagpanghilabot sa pribasiya sa uban, sa pagkatinuod, maoy usa ka matang sa pagpangawat nga adunay dili-maayong mga sangpotanan. Ingong mga Kristohanon, kita kinaiyanhong suod sa usag usa. Apan dali ra kitang makalimot nga adunay mga utlanan nga dili nato angayng lapason.

T. M., Czech Republic