Ngalan sa Diyos Diha sa Usa ka Edad-Medya nga Kastilyo

TINAMPO SA MAGSUSULAT SA PAGMATA! SA SLOVAKIA

ANG Slovakia maoy gamay apan maanindot kaayong nasod sa sentro sa Uropa. Ang matahom nga kabanikanhan daghag kastilyo nga nagbarog ingong mga monyumento sa taas ug dagayang kasaysayan sa rehiyon. Lakip sa labing talagsaon mao ang Orava Castle, nga natukod ibabaw sa 112-metros nga anapog nga mga pangpang nga nag-umbaw sa kasikbit nga balangay.

Ang unang sinulat nga rekord bahin sa Orava Castle nahisulat niadtong 1267. Sukad niadto, daghan na ang nakapanag-iya niini. Sa 1556 ang kastilyo gipanag-iya sa adunahan nga pamilyang Thurzó. Lakip sa ubang mga pagpauswag ug pagdugang, gitukod sa mga Thurzó ang kapilya sa kastilyo.

Matag tuig ang Orava Castle ug ang mga eksibit niini makadanig libolibong bisita gikan sa daghang nasod. Diha sa patyo ang mga bisita makakitag usa ka butang nga makapainteres kaayo nga nasulat diha sa kinulit nga bato sa eskudo de armas sa pamilyang Thurzó. Ang kinulit dunay Biblikanhong ngalan sa Diyos​—Jehova—​sa Latin.