Natawo Nganha sa Dili-Mabinationg Kalibotan!

ANG usa ka bata gipakatawo nganha sa maharason, dili-mabination nga kalibotan, usa ka kalibotan nga puno sa kapit-os. Bisan tuod ang bata dili gayod makasulti sa iyang gibati, ang ubang mga siyentipiko nagtuo nga bisan sa wala pa matawo, ang bata sa sulod sa tiyan nahibalo na kon unsay nagakahitabo.

Ang librong The Secret Life of the Unborn Child nag-ingon: “Kita nahibalo na karon nga ang wala pa matawong bata maoy usa ka tawo nga may kahibalo ug mosanong sa panukbil kinsa sukad sa ikaunom ka bulan padayon (ug tingali mas sayo pa) adunay aktibong emosyonal nga kinabuhi.” Bisan tuod ang bata dili tingali mahinumdom, ang ubang mga siyentipiko naghunahuna kon ang makapahigwaos nga kasinatian sa pagkahimugso makaapekto ba gayod sa iyang kinabuhi sa ulahi.

Human sa pagkatawo, magpadayon ang kapit-os. Sa gawas sa tagoangkan sa inahan, ang bata dili na awtomatikong ginapakaon. Ang pusod nga nagdalag oksiheno ug mga sustansiya giputol na. Aron mabuhi, siya mismo kinahanglang mosugod sa pagginhawa ug sa pagkaon. Siya nagkinahanglan ug laing tawo sa pagpakaon kaniya ug pag-atiman sa iyang ubang pisikal nga mga panginahanglan.

Ang bag-ong natawo nga bata kinahanglan usab nga motubo sa mental, emosyonal, ug sa espirituwal. Busa aduna gayoy laing tawo nga moatiman sa bata. Kinsa ang labing angayan nga mohimo niana? Unsay gikinahanglan sa bata gikan sa iyang mga ginikanan? Sa unsang paagi matagbaw sa labing maayong paagi kining maong mga panginahanglan? Ang sunod nga mga artikulo motabang sa pagtubag nianang mga pangutanaha.