Mga Batan-on Nangutana . . .

Sa Unsang Paagi Molampos Ako Ingong Mamumulong sa Publiko?

“Gihunahuna ko nga namatikdan sa mga tawo ang tanan kong mga sayop ug ang akong kakulang sa pagsalig. Dili nako masentro ang akong hunahuna sa akong pakigpulong. Gibati ko nga gikataw-an lang ko nila sa hilom.”—Sandy. *

ANG awditoryum sa eskuylahan puno sa mga tumatambong. Nadunggan nimo nga gitawag ang imong ngalan, ug dihadiha ang tanan nagtan-aw kanimo. Ang pipila ka lakang paingon sa podyum morag layo kaayo alang nimo. Gipaningot na ang imong mga kamot, morag wa nay umoy ang imong mga bitiis, ug tungod sa pipila ka rason morag uga na kaayo ang imong baba. Dayon, sa wala pa nimo kini kapugngi, mitulo ang usa ka dakong lusok sa singot diha sa imong aping. Pagkamakauulaw! Nahibalo ka nga dili ka moatubang ug firing squad, apan mao gayod kanay imong gibati.

Angay natong dawaton kini: Kadaghanan kanato mahadlok sa pagsulti atubangan sa ubang mga tawo. (Jeremias 1:5, 6) Ang ubang mga tawo nag-isip pa gani sa ilang kahadlok sa pagpakigpulong sa publiko nga labaw pa kay sa ilang kahadlok sa kamatayon! Apan bisag unsa pay imong pagbati bahin niana, dunay maayong mga rason kon nganong angay kang mainteres sa pagpakigpulong sa publiko. Atong susihon ang pipila niini ug hunahunaa kon sa unsang paagi ikaw mahimong usa ka malamposong mamumulong sa publiko.

Sa Dihang Hangyoon nga Mopakigpulong

“Ang pagpakigpulong sa publiko maoy katakos nga gikinahanglan sa tanan.” Mao nay giingon sa usa ka anunsiyo alang sa kurso sa pagpakigpulong sa publiko. Oo, sa madugay o sa madali, ikaw mopakigpulong atubangan sa mamiminaw. Una sa tanan, ang pagpakigpulong sa publiko gipasiugda diha sa daghang eskuylahan. Usa ka batan-ong babaye nga ginganlag Tatiana nahinumdom: “Dunay daghang higayon nga kinahanglan kong mopakigpulong atubangan sa akong mga klasmet sa eskuylahan.” Gikan sa binaba nga mga taho ug mga ebalwasyon sa usa ka libro ngadto sa multimedia nga mga presentasyon ug mga debate, ang mga estudyante kinahanglang magmaandam kanunay sa pagpakigpulong.

Sa dihang ikaw sa ngadtongadto manarbaho na, mahimong hangyoon ka sa pagtudlo sa usa ka grupo sa mga isigkatrabahante, pagtanyag ug usa ka butang ngadto sa usa ka kliyente, o pagpatin-aw sa usa ka financial report ngadto sa usa ka ehekutibong komite. Sa pagkatinuod, ang katakos sa pagpakigpulong mapuslanon diha sa nagkalainlaing matang sa mga trabaho, nga naglakip sa pagpanulat, pagdumala, publikong mga relasyon, ug pagpamaligya.

Apan, komosta kon pilion nimo nga motrabaho ingong mamumuo o klerk sa opisina? Buweno, ang pagkamaayong manulti panahon sa interbiyo sa trabaho mahimong magtino kon makatrabaho ka ba o dili. Samtang magtrabaho, ang imong katakos sa pagpahayag sa imong kaugalingon makatabang kanimo. Si Corrine nagtrabaho sulod na sa tulo ka tuig ingong silbidora human makatapos sa iyang pagtungha.  Siya miingon: “Kon maayo kang manulti, isipon kang mas hamtong ug makaarang sa pagdumala ug dugang responsabilidad. Mahimong magkahulogan gani kana ug mas maayong trabaho, mas dakong suweldo, o labing menos mas dakong pagtahod.”

Sa kataposan, ang batan-ong mga Kristohanon kanunayng mopakigpulong atubangan sa uban ingong bahin sa ilang pagsimba. (Hebreohanon 10:23) “Hinungdanon ang pagpahayag sa imong kaugalingon sa tin-awng paagi,” matod ni Taneisha. “Kita adunay pribilehiyo sa pagwali sa maayong balita sa Gingharian sa Diyos.” (Mateo 24:14; 28:19, 20) Diha sa kongregasyon ug sa ilang publikong ministeryo, ang batan-ong mga Kristohanon dili “makahunong sa pagsulti sa mga butang nga [ilang] nakita ug nadungog.”—Buhat 4:20; Hebreohanon 13:15.

Busa, ang pagkat-on sa pagpakigpulong sa maayong paagi makabenepisyo kanimo sa nagkalainlaing mga paagi. Bisan pa niana, mahimong mabalaka ka gihapon sa paghunahuna nga mobarog atubangan sa mamiminaw. Aduna ka bay mahimo aron mabuntog nimo ang imong kakulba? Oo, aduna.

Pagbuntog sa Imong mga Kahadlok

“Dili ka kinahanglang mahimong hawod o hingpit aron molampos,” matod pa ni Dr. Morton C. Orman, nga usa ka eksperto bahin sa kapit-os ug usa ka propesyonal nga mamumulong sa publiko. “Ang pangunang katuyoan sa pagpakigpulong sa publiko mao kini: hatagi ang imong mamiminaw ug usa ka butang nga mapuslanon.” Sa laing pagkasulti, isentro ang pagtagad nganha sa mensahe, dili nganha sa imong kaugalingon o sa imong mga kabalaka. Ang pipila ka tawo sa unang siglo nagtuo nga si apostol Pablo dili mao ang labing larinong mamumulong, apan tungod kay kanunay siyang nagsulti ug usa ka butang nga mapuslanon, siya epektibo gihapon. (2 Corinto 11:6) Sa samang paagi, kon magtanyag kag usa ka hinungdanong butang nga imo gayong gituohan, ang imong kakulba mas daling mawala.

Si Ron Sathoff, lain pang ilado nga mamumulong ug tigbansay sa mga mamumulong, naghatag niining maong sugyot: Ayawg hunahunaa ang imong pakigpulong ingong usa ka pasundayag. Isipa kini ingong usa ka pakigkabildo. Oo, sulayi ang pagpakigkomunikar sa imong mamiminaw, dili ingong dakong pundok sa mga tawo, kondili ingong mga indibiduwal, sama sa imong buhaton sa naandang pakigkabildo. Ipakita ang tinuod nga “personal nga interes” sa imong mamiminaw, ug pakigsulti kanila sa paagi nga ikaw normal nga makig-estorya. (Filipos 2:3, 4) Kon mas kabildohay ang imong pagpakig-estorya, mas relaks ka.

Ang laing komon nga rason sa kabalaka mao ang kahadlok nga maulawan o sawayon sa imong mamiminaw. Si Lenny Laskowski, usa ka propesyonal nga mamumulong ug tigbansayg mga mamumulong, nagpahinumdom kanato nga kanunayng hunahunaon sa mamiminaw ang matag presentasyon uban ang positibong panghunahuna. “Gusto nila nga ikaw molampos—dili mapakyas,” matod pa ni Laskowski. Busa pagbaton ug positibong tinamdan. Kon posible, himamata ang imong mamiminaw sa dihang mangabot sila. Isipa sila ingong mga higala, dili mga kaaway.

Hinumdomi, usab, nga ang kakulba dili gayod bug-os makadaot nga pagbati. “Sukwahi sa popular nga pagtuo,” nag-ingon ang usa ka eksperto, “ang kakulba  makaayo kanimo ug sa imong pakigpulong.” Nganong ingon man niana? Tungod kay ang usa ka sukod sa kakulba magbanaag ug pagkamakasaranganon, nga motabang kanimo nga dili mahimong sobra ka masaligon. (Proverbio 11:2) Daghang atleta, musikero, ug mga aktor mibati nga ang diyutayng kakulba sa pagkatinuod makapahimo kanilang mas maayong mopasundayag, ug tinuod usab kana alang sa mga mamumulong sa publiko.

Mga Sugyot Alang sa Kalamposan

Pinaagi sa pagpadapat niining mga sugyota ug sa uban pang mga ideya, ang pipila ka batan-ong mga Kristohanon adunay usa ka sukod sa kasinatian ug kalamposan ingong mga mamumulong sa eskuylahan, sa trabahoan, ug sa ilang mga kongregasyon. Susiha kon ang pipila sa ilang mga sugyot makatabang ba kanimo.

Jade: “Ipahayag ang impormasyon sa kaugalingon mong mga pulong. Kombinsiha ang imong kaugalingon sa mga kaayohan sa angay mong isulti. Kon gibati nimo nga hinungdanon ang imong pakigpulong, bation usab kana sa mamiminaw.”

Rochelle: “Nakaplagan kong mapuslanon ang pagkuhag video sa kaugalingon kong pakigpulong. Pinaagi niini makita nimo ang imong mga kahuyangan, apan kini mapuslanon. Lain pa, pagpili ug ulohan nga gusto nimo. Madayag kini diha sa imong pakigpulong.”

Margrett: “Akong nakaplagan nga mas natural akong mosulti ug mas kabildohay akong paminawon kon mogamit ko ug usa ka laraw imbes isulat ang tanan nakong igsusulti. Gawas pa, ang pagginhawa ug lawom sa dili pa mosulti makatabang sa pagpakalma nako.”

Corrine: “Ayawg kahadlok sa pagkatawa sa imong mga sayop. Ang tanan masayop. Kinahanglang himoon lang nimo ang imong maarangan.”

Siyempre, sama sa bisan unsang paningkamot, sama sa esport, arte, o musika, walay kapuli sa eksperyensiya ug dugayng pagbansaybansay. Si Tatiana nagrekomendar sa pag-andam sa imong pakigpulong nga abante kaayo aron duna kay igong panahon sa pagbansaybansay. Ug ayaw pag-undang. “Kon mas subsob akong mopakigpulong atubangan sa uban,” matod niya, “mas masayon na kini alang nako.” Apan, duna pay usa ka tinubdan sa tabang nga dili nimo angayng kalimtan, ilabina kon hangyoon ka nga mopakigpulong aron sa pagtuboy sa matuod nga pagsimba.

Tabang Gikan sa Dakong Tigkomunikar

Ingong batan-on, si David, nga umaabot nga hari sa Israel, aduna nay reputasyon ingong “usa ka makinaadmanong manulti.” (1 Samuel 16:18) Nganong ingon man niana? Dayag nga sa iyang pagkabatan-on, panahon sa daghang oras nga iyang gigugol ilalom sa kalangitan nga nag-atiman sa iyang mga karnero, si David nakaugmad ug suod nga relasyon uban sa Dakong Tigkomunikar, si Jehova nga Diyos, pinaagi sa pag-ampo. (Salmo 65:2) Sa baylo, ang maong relasyon nag-andam kaniya sa pagsulti nga klaro, may puwersa, ug makapadani bisan ilalom sa masulayong mga kahimtang.—1 Samuel 17:34-37, 45-47.

Makaseguro ka nga samtang magpadayon ka sa pagsimba, ang Diyos motabang usab kanimo sa pagsulti sa makapadaning paagi, maingon nga iyang gitabangan si David, nga maghatag kanimo “sa dila sa mga tinudloan.” (Isaias 50:4; Mateo 10:18-20) Oo, pinaagi sa pagpahimulos sa mga kahigayonan sa pagpauswag sa imong mga katakos sa pagpakigpulong karon, ikaw mahimong usa ka epektibong mamumulong sa publiko!

[Footnote]

[Kahon sa panid 18]

Gibansay Ingong mga Mamumulong

Diha sa mga kongregasyon sa mga Saksi ni Jehova sa tibuok kalibotan, dunay usa ka senemanang binase-sa-Bibliya nga programa sa pagpanudlo nga gitawag ug Teokratikanhong Tunghaan sa Ministeryo. Ang mga estudyante makigbahin sa panaghisgot sa klase, mohatag ug mga presentasyon atubangan sa kongregasyon, ug modawat ug personal nga tabang aron maabagan silang mouswag. Misaler ba ang maong programa? Atong pasultihon ang 19-anyos nga si Chris bahin sa iyang naeksperyensiyahan.

“Sa wala pa ko moapil sa maong tunghaan, dili gyod ko komportable kon dunay mga tawo,” matod pa niya. “Wala gyod ko maghunahuna nga makatindog ko sa entablado atubangan sa mamiminaw. Apan ang pipila diha sa kongregasyon nagdasig kanako, nga nag-ingon nga bisan pag magkabungabunga ko sa tibuok pakigpulong, malingaw ra sila niana, tungod kay nahibalo sila kon unsa ka dako ang akong paningkamot nga maatua didto. Dayon, inigkahuman sa matag pakigpulong nga akong ihatag, ila kong dayegon. Nakatabang kaayo kadto.”

Karon, human sa lima ka tuig sa maong tunghaan, si Chris nangandam sa paghatag sa una niyang 45-minutos nga pakigpulong. Gipahimuslan ba nimo kining maong tagana?

[Mga hulagway sa panid 16, 17]

Ang pagkahimong malamposong mamumulong makatabang kanimo sa tanang bahin sa kinabuhi