Gikan sa Among mga Magbabasa

Diabetes Ako kinasingkasing nga nagapasalamat alang sa serye nga “Pagsagubang sa Diabetes.” (Mayo 8, 2003) Gidiabetes ako sukad pa sa edad nga kuwatro anyos. Abi nako ug dili na ako maminyo o makasulod sa bug-os-panahong ministeryo, apan kini nga mga artikulo nakahatag nako ug paglaom. Karon, sa edad nga 17, akong gihimong tumong ang bug-os-panahong ministeryo, ug akong himoon ang kutob sa akong maarangan aron makab-ot kini.

T. A., Japan

Para nako mapuslanon kaayo ang gihatag nga mga sugyot ngadto sa pamilya ug mga higala nga dili nila dasigon ang mga tawong dunay diabetes sa pagkaon ug kontra. Lisod para nako ang pagluto alang sa akong pamilya ug unya dili ako makakaon sa mga pagkaon nga akong giandam. Alang niadtong walay diabetes, tingali morag gamay ra kini nga butang, apan sultihan ko kamo nga kini dili gayod gamay nga butang!

V. N., Italya

Ako nagtrabaho ingong nars ug maestra. Sa pagsugod sa sunod nga semestre, ang akong itudlo sa akong mga estudyante maoy bahin sa diabetes. Ang ilustrasyon sa mga panid 8 ug 9 sayon sabton, ug akong gamiton kini sa akong pagtudlo. Salamat sa pagpatik ug gipayano nga mga artikulo bahin sa medikal nga mga topiko.

C. B., Pransiya

Salamat sa mga artikulo bahin sa diabetes. Wala ako niining sakita, apan mao kini ang sakit sa akong 14-anyos nga igsoong babaye. Nasabtan na nako karon kon unsay giantos sa akong igsoon. Tinuod, kinahanglang magsakripisyo ako alang niya, apan kini dili sama ka lisod sa iyang pagsagubang sa diabetes!

E.D.M., Italya

Lima na ka tuig nga gidiabetes ang akong inahan. Kanunay ko nga mabalaka sa iyang panglawas tungod kay layo ang akong gipuy-an. Nagplano ko nga padad-an siya ug kopya niining magasina. Basin makatabang kini sa dihang wala ako.

R. W., Indonesia

Pagkaangol Nalipay ako sa pagbasa sa “Kon sa Unsang Paagi ang Pagkaangol Nakausab sa Akong Kinabuhi.” (Abril 22, 2003) Kining artikuloha nakatabang nako sa pagsagubang sa pagkaangol sa akong bukobuko kapin na sa 30 ka tuig. Gisagubang ko usab ang daghang butang nga gisagubang ni Brader Stanley Ombeva. Nakahupay nako ang pagkahibalo nga ang Pulong sa Diyos motabang kanato sa pagsalig kang Jehova.

G. G., Tinipong Bansa

Natandog kaayo ako sa prangka nga pag-asoy ni Brader Ombeva sa iyang reaksiyon sa iyang mga kakulian sa lawas. Naamgohan gayod nako kon unsa ka gamay ang akong mga problema kon itandi sa iyang gisagubang. Kining artikuloha nakatabang nako sa paghunahuna bahin sa akong nadawat nga mga panalangin.

S. C., Canada

Pagkatalagsaon! Mao kana ang pulong nga akong gamiton sa paghubit niining artikuloha. Gitapos ko gayod kini ug basa. Makapatukbil sa hunahuna ang pagbasa kon sa unsang paagi ang Kasulatan nahimong makahuloganon kaayo kang Brader Ombeva sa dihang kini iyang gikinahanglan pag-ayo. Motabang kini kanako sa pagpakitag dugang nga empatiya sa dihang motabang sa uban.

R. G., Tinipong Bansa

Nadasig ako sa pagkahibalo nga bisan ang usa ka Kristohanon nga nag-alagad ingong ansiyano sa kongregasyon nakabati niining matanga sa kasuko ug miangkon nga gikinahanglan ang panahon sa pagsagubang sa kahimtang nga sama niini. Giasoy ni Brader Ombeva nga bisan sa panahon nga grabe kaayo ang iyang sakit, wala gayod siya mahimong iregular sa ministeryo. Determinado usab ako nga dili mahimong iregular.

M. K., Japan

Makadaghan ako nga nahulog niadtong batabata pa mao nga karon ako nag-antos. Ako kanunayng mobatig pagngulngol, maglisod sa paglakaw, ug luyahon. Naguol ako tungod sa akong mga limitasyon diha sa Kristohanong ministeryo. Apan ang pagbasa bahin sa kon sa unsang paagi gisagubang ni Brader Ombeva ang iyang problema nakatabang nako. Daghan kaayong salamat!

E. E., Tinipong Bansa