Gisakit nga mga Hunahuna

SI Nicole nakasinati ug mga yugto sa kasubo sukad sa 14 anyos pa siya. Apan, pag-edad niyag 16 anyos, nagsugod siya sa pagsinati ug bag-ong butang—usa ka talagsaong kahimtang sa hilabihang kalipay ug naghingaping kapiskay. Daghang butang ang mosantop sa iyang hunahuna, dili-masabtan ang iyang sinultihan, ug dili siya makatulog. Kini giduyogan sa walay-basehanan nga pagduda nga ang iyang mga higala nagpahimulos kaniya. Unya, miingon si Nicole nga iyang mausab ang kolor sa mga butang sumala sa iyang gusto. Niining tungora, ang inahan ni Nicole nakaamgo nga gikinahanglan ang medikal nga tabang, busa iyang gidala si Nicole sa ospital. Human sa pagpaniid pag-ayo sa nag-usab-usab nga buot ni Nicole, sa kataposan nakahimog dayagnosis ang mga doktor: Si Nicole nag-antos sa bipolar disorder. a

Sama kang Nicole, milyonmilyong tawo sa tibuok kalibotan ang nag-antos sa mood disorder—mahimong bipolar disorder o usa ka matang sa klinikal nga depresyon. Ang mga epekto niining maong mga balatian makapahugno. “Sulod sa daghang tuig nagmagul-anon ako,” matod ni Steven kinsa adunay bipolar. “Akong nasinatian ang grabeng depresyon ug dayon ang hilabihang kalipay. Ang terapiya ug tambal nakatabang, apan nalisdan gihapon ko.”

Unsay hinungdan sa mga mood disorder? Sama sa unsa ang maapektahan sa depresyon o sa bipolar disorder? Sa unsang paagi ang mga tawong nag-antos niini—ug ang ilang mga tig-atiman—​mahatagan sa tabang nga ilang gikinahanglan?

[Footnote]