Kon sa Unsang Paagi Makatabang ang Uban

TINGALI aduna kay kaila nga nag-antos sa depresyon o bipolar disorder. Kon mao, sa unsang paagi makatabang ka? Si D. J. Jaffe sa National Alliance for the Mentally Ill nagtanyag niining maayong tambag: “Ayawg lantawa ang sakit ug ang indibiduwal nga managsama; hinunoa, kayugti ang sakit apan higugmaa ang tawo.”

Usa ka babaye nga ginganlag Susanna nakabaton ug pailob ug gugma sa pagpakita niana. Siya may higala nga adunay bipolar. “Dihay mga panahon nga dili siya makaagwanta nga anaa ko sa iyang duol,” miingon si Susanna. Imbes talikdan ang iyang higala, si Susanna nanukiduki aron makakat-on bahin sa bipolar disorder. “Karon,” matod niya, “akong naamgohan kon unsa ka dako ang epekto sa sakit diha sa panggawi sa akong higala.” Gibati ni Susanna nga ang pagpaningkamot sa pagsabot sa nag-antos makahatag ug maanindot nga balos. “Makatabang kini kanimo sa paghigugma ug pagpabili sa maong tawo tungod sa iyang maayong mga hiyas bisan pa sa iyang sakit,” matod niya.

Sa dihang ang masakiton maoy usa ka membro sa pamilya, hinungdanon ang tibuok-kasingkasing nga tabang. Si Mario, nga nahisgotan na niining seryeha, nakakat-on niining maong leksiyon nga sayosayo pa. Ang iyang asawa, si Lucia, nga gihisgotan usab ganina, adunay bipolar. “Sa sinugdan,” miingon si Mario, “natabangan ako pinaagi sa pagkuyog sa akong asawa ngadto sa iyang doktor ug pinaagi sa pagtuon bahin niining katingad-ang balatian aron ako bug-os nga masinati kon unsay among giatubang. Si Lucia ug ako kanunay usab nga mag-estoryahanay ug naningkamot sa pagsagubang sa bisan unsang situwasyon nga motungha sa paglabay sa panahon.”

Tabang Gikan sa Kristohanong Kongregasyon

Ang Bibliya nag-awhag sa tanang Kristohanon sa ‘paghupay sa magul-anong mga kalag’ ug sa ‘pagpakitag hataas-nga-pailob sa tanan.’ (1 Tesalonica 5:14) Sa unsang paagi mahimo nimo kini? Una, hinungdanon nga masabtan ang kalainan tali sa mental ug espirituwal nga sakit. Pananglitan, ang magsusulat sa Bibliya nga si Santiago nagpaila nga tungod sa pag-ampo maayo ang usa nga masakiton sa espirituwal. (Santiago 5:14, 15) Bisan pa niana, giila ni Jesus nga kadtong masakiton sa pisikal nagkinahanglan ug mananambal. (Mateo 9:12) Siyempre, husto ug makatabang gayod ang pag-ampo kang Jehova bahin sa bisan unsang kabalaka, lakip na sa atong panglawas. (Salmo 55:22; Filipos 4:6, 7) Apan ang Bibliya wala mag-ingon nga  ang napauswag nga espirituwal nga kalihokan mao lamang ang makasulbad sa presenteng medikal nga mga problema.

Busa, ang masinaboton nga mga Kristohanon maglikay sa pagpasumbingay nga ang mga tawong magul-anon maoy responsable sa ilang kaugalingong pag-antos. Ang maong mga komento dili makatabang sama niadtong mga komento sa mini nga mga maghuhupay ni Job. (Job 8:1-6) Ang tinuod mao nga sa daghang kaso ang depresyon dili moarang-arang gawas kon kini matambalan sa medikal nga paagi. Ilabinang tinuod kini kon ang usa ka tawo nakaagom sa grabeng depresyon, tingali naghunahuna pa gani sa paghikog. Sa maong mga kaso, hinungdanon ang propesyonal nga pag-atiman.

Bisan pa niana, dako ang ikatabang sa mga isigka-Kristohanon. Siyempre, gikinahanglan ang pailob. Pananglitan, ang pipila ka bahin sa Kristohanong kalihokan mahimong malisod kaayo alang niadtong adunay mood disorder. Ang usa ka nag-antos sa bipolar nga ginganlag Diane nag-ingon: “Nakigbisog ako sa pagpakigbahin sa ministeryo. Lisod ang pagdala ug maayong balita gikan sa Bibliya ngadto sa uban sa dihang dili maayo ang akong pamati.”

Aron makatabang sa mga tawo nga nag-antos niini, paningkamoti ang pagpakitag empatiya. (1 Corinto 10:24; Filipos 2:4) Sulayi ang paglantaw sa mga butang sama sa panglantaw sa nag-antos inay kay sumala sa imoha. Ayawg pabug-ati ang maong indibiduwal pinaagi sa dili-makataronganong mga panahom. “Sa dihang ako gidawat tungod sa kon unsa ako karon,” matod ni Carl, kinsa nakigbisog sa depresyon, “akong gibati nga inanayng nahibalik ang akong pagbati sa kasuod. Uban sa mapailobong tabang sa pipila ka mas tigulang nga mga higala, nakahimo ako sa pagtukod ug mas suod nga relasyon uban sa Diyos ug nakakaplag ug dakong kalipay sa pagtabang sa uban sa paghimo sa susama.”

Uban sa tabang, kadtong nagmasakiton makakaplag ug dakong kahupayan gikan sa ilang kalisdanan. Tagda ang usa ka Kristohanong babaye nga ginganlag Brenda, kinsa aduna usay bipolar. “Ang akong mga higala gikan sa kongregasyon matinabangon ug masinaboton kaayo sa panahon nga magmagul-anon ako, nga wala gayod maghukom kanako ingong luya sa espirituwal,” matod niya. “Dihay mga panahon nga paubanon ko nila sa pagsangyaw ug papaminawon lamang ako o ila kong gahinan ug lingkoranan diha sa Kingdom Hall aron makasulod ako sa dihang nanglingkod na ang tanan.”

Ang tabang sa mahigugmaon ug may empatiya nga mga ansiyano sa kongregasyon nakatabang ug dako kang Cherie, kinsa nahisgotan sa nag-unang artikulo, nga nag-antos sa depresyon. Miingon siya: “Sa dihang ang mga ansiyano magpasalig kanako sa gugma ni Jehova, magbasa kanako ug mga teksto gikan sa Pulong sa Diyos, ang Bibliya, ug maghisgot bahin sa katuyoan ni Jehova alang sa usa ka paraiso sa pakigdait ug maayong kahimtang ug sa dihang sila mag-ampo uban nako—bisan diha sa telepono—mogaan ang akong paminaw. Ako nahibalo nga ako wala talikdi ni Jehova o sa akong mga igsoon, ug kana maoy nagpalig-on kanako.”

Walay duhaduha nga pinaagi sa pagtagana ug makahuloganong tabang, ang mga membro sa pamilya ug mga higala adunay hinungdanong bahin sa kaayohan sa nag-antos. “Sa akong hunahuna makontrolar na nako ang akong kinabuhi karon,” matod ni Lucia. “Ang akong bana ug ako naningkamot aron makasagubang niini nga magkauban, ug miarang-arang ang among kahimtang kay sukad masukad.”

Daghan nga nakigbisog karon sa lainlaing matang sa sakit sa utok ang nakaamgo nga dugay ang pagpakigbugno niining makalilisang nga mga balatian. Apan, ang Bibliya nagsaad nga sa bag-ong kalibotan sa Diyos, “walay pumoluyo nga moingon: ‘Ako masakiton.’” (Isaias 33:24) Mawala na ang makapaguol nga mga balatian nga naghasol sa daghan kaayong tawo karon. Makapadasig gayod ang pagpalandong sa saad sa Diyos sa usa ka bag-ong kalibotan diin ang tanang sakit—lakip na ang mga mood disorder—mahanaw sa dayon. Nianang panahona, matod sa Bibliya, wala nay pagbangotan ni pagtiyabaw ni may kasakit pa.—Pinadayag 21:4.

[Blurb sa panid 12]

Giila ni Jesus nga kadtong masakiton nagkinahanglan ug mananambal.—MATEO 9:12

[Blurb sa panid 13]

Ang Bibliya nagsaad nga sa bag-ong kalibotan sa Diyos, “walay pumoluyo nga moingon: ‘Ako masakiton.’”​—ISAIAS 33:24