Pag-atubang sa Malisod nga mga Kahimtang Diha sa Usa ka Talagsaong Teritoryo

ANG mga Saksi ni Jehova nagsangyaw sa daghan nang katuigan diha sa Navajo nga reserbasyon, nga nahimutang sa mga bahin sa Arizona, New Mexico, ug Utah, T.B.A. Sa Navajo nga pinulongan, kini nailhan ingong Diné Bikéyah (nasod sa Navajo). Ang kapin sa 220,000 ka Nitibong mga Amerikano niana nga nasod, nga gitawag ug Diné (ang mga tawo) sa ilang pinulongan, mao ang kinadaghanan sa tanang tribo sa Indian sa Amerika del Norte.

Sa miaging mga tuig lainlaing mga kongregasyon sa mga Saksi ni Jehova ang natukod diha sa mga dapit diin may grupo sa Navajo nga mga lalaki ug babaye nga interesado sa Bibliya. Sa pagkakaron, dunay upat ka kongregasyon diha sa reserbasyon—sa Tuba City, Kayenta, Keams Canyon, ug Chinle. (Tan-awa ang mapa sa ubos.) Dugay na nga may kaugalingong Kingdom Hall ang matag kongregasyon gawas lang sa kongregasyon sa Chinle, nga kinahanglang magtigom diha sa inabangan nga mga lawak sa eskuylahan. Karon nausab na ang kahimtang.

Kingdom Hall Alang sa Usa ka Talagsaong Teritoryo

Sa Sabado, Hunyo 7, 2003, gipahinungod ang Kingdom Hall sa Chinle. Ang pakigpulong sa pagpahinungod gihatag ni Gerrit Lösch, usa ka membro sa Nagamandong Lawas sa mga Saksi ni Jehova. Iyang gibatbat diha sa iyang pakigpulong ang kusog nga pag-uswag sa pagpanukod ug mga Kingdom Hall sa tibuok kalibotan, apan iyang gipatin-aw nga linibo pa ka tigomanan ang gikinahanglan aron maalagaran ang kapin sa 94,600 ka kongregasyon. Iya usab nga gipatin-aw ngadto sa 165 ka tumatambong ang 15 ka katarongan kon nganong angay nilang pabilhan ang ilang bag-ong Kingdom Hall ug ang mga kaayohan sa regular nga pagtambong sa Kristohanong mga panagkatigom. Iyang gitapos ang pakigpulong pinaagig usa ka pag-ampo sa pagpahinungod, nga naghangyo sa panalangin ni Jehova sa paggamit niining ekselenteng tigomanan.

Kini nga kongregasyon maoy usa lang ka grupo kaniadto nga nakig-uban sa Kongregasyon sa Keams Canyon, nga mga 100 kilometros sa habagatan-kasadpan. Karon ang buluhaton sa Kongregasyon sa Chinle mao ang pagsangyaw sa maayong balita sa Gingharian sa Diyos diha sa usa ka  teritoryo nga nagkatag sa gilapdong 11,000 kilometro kuwadrado! Daghang Navajo ang nagpuyo diha sa mga treyler o mga hogan, mga balay nga pormag hexagon o octagon. Aron maabot ang hilit nga mga dapit, gikinahanglan ang four-wheel-drive nga mga sakyanan. Gikinahanglan kini ilabina aron maabot ang nagkatag nga mga puy-anan diha sa Canyon de Chelly (litokon nga d’Shay), usa ka maanindot nga bahin sa teritoryo sa kongregasyon.

Canyon de Chelly—Sagrado Alang sa mga Navajo

Ang habog nga kapatagan ibabaw sa mga bukid sa Arizona ilado tungod sa nanganawkanaw nga talan-awon niini, diin ang mga haywey tul-id kaayo hangtod nga morag mahanaw kini ngadto sa kapunawpunawan. Ang Canyon de Chelly dili kaayo layo gikan sa Kingdom Hall. Ang dal-og naglikoliko latas sa 40 kilometros sa pulahong-bato nga mga pangpang nga nagsugod sa gihabogong 9 metros ug inanay nga moabot sa gihabogong 300 metros. Kining dapita, nga naapil sa listahan sa nasodnong mga monyumento, ginaduaw sa daghang turista kada tuig. Kini nga dal-og, apil ang Canyon del Muerto, giisip sa mga Navajo nga sagradong dapit. May pipila ka mga pamilya nga nanimuyo dinhi, diha sa ilang mga hogan nga gama sa mga batang ug yuta. Apan, ang tanan ginaduaw sa mga Saksi ni Jehova, kinsa maghatod kanila ug literatura sa Bibliya sa ilang kaugalingong pinulongan.

Sa pag-agi diha sa dal-og, ang usa kinahanglang kuyogan ug awtorisadong giya nga Navajo. Ang pipila ka mga bisita magbaktas, ug ang uban magkabayo; apan ang kadaghanan mosakay  ug four-wheel-drive nga sakyanan. Kining klaseha sa sakyanan gikinahanglan tungod kay ang kasagarang agian mao ang Chinle Wash. Ang mga giya usab antigong molikay ug huyonghuyong nga usahay molamoy ug kabayo o pik-ap nga sakyanan. Apan unsay nakapanindot sa Canyon de Chelly?

Makakat-on ka bahin sa mga tawong nagpuyo kanhi diha sa dal-og tungod sa mga kinulit ug mga dibuho diha sa mga kilid sa titip nga mga pangpang. Ang mga arkeologo nagtuo nga ang gibantog nga mga puy-anan diha sa pangpang, nga gitukod diha sa dagkong lungib sa kilid sa pangpang, gitukod tali sa 350 K.P. ug 1300 K.P. Tingali ang labing ilado mao ang White House Ruin, nga maoy gingalan tungod sa puti nga bungbong sa usa sa mga tinukod. Giabandonar kini sa Anasazi (Navajo nga ngalan alang sa “karaang kaaway”) niadtong mga 1300 K.P. Gituohan nga walay Navajo nga nagpuyo niining dapita hangtod sa ika-18ng siglo.

Kon moadto ka sa Canyon de Chelly, moagi ka sa Navajo Route 7. Diha sa likoanan duol sa National Monument, bantayi ang karatula nga nag-ingong “Jiihōvah Yádahalne’í bi Kingdom Hall” ug “Kingdom Hall of Jehovah’s Witnesses.” Ikaw gidapit sa paghapit ug pagduaw.

[Mga mapa sa panid 22]

(Alang sa aktuwal nga pagkahan-ay, tan-awa ang publikasyon)

COLORADO

NASOD SA NAVAJO

ARIZONA

CANYON DE CHELLY NATIONAL MONUMENT

Chinle

Kayenta

Tuba City

NASOD SA HOPI

Keams Canyon

NEW MEXICO

UTAH

[Hulagway sa panid 23]

Ang mga arkeologo nag-ingon nga tingali dihay pipila ka mga pamilyang Anasazi nga nag-usa sa pagpuyo niining balay sa pangpang

[Hulagway sa panid 24]

Hogan

[Hulagway sa panid 24]

Canyon del Muerto

[Hulagway sa panid 24]

Spider Rock sa Canyon de Chelly