Gikan sa Among mga Magbabasa

Matematika Nalingaw ko sa pagbasa sa artikulong “Ang Matematika Mapuslanon sa Tanang Tawo.” (Mayo 22, 2003) Maikagon gayod ako sa mga numero sukad pa kaniadto. Sama sa inyong giingon, si Jehova mao ang Dakong Matematisyan, ug walay duhaduha nga sa bag-ong kalibotan, kitang tanan makakat-on pag dugang bahin sa lohika sa mga numero. Daghan kaayong salamat sa maong praktikal nga impormasyon.

G. C., Britanya

Kining artikuloha nakatabang gayod kanako. Sa eskuylahan, dili gyod ko ganahan sa matematika. Bisan pag maminaw ko ug magkuhag mga nota, dili gyod ko kasabot niini. Apan human nako mabasa kining artikuloha, nagtuo ko nga mahanas ra ako niini. Mapasalamaton ko nga inyong gipatik kining artikuloha. Ako 13 anyos.

Y. I., Japan

Mao gyod ning artikuloha ang akong gikinahanglan! Ako 15 anyos ug dili hawod sa matematika. Sa dihang motan-aw kog mga problema sa matematika, ingnon ko ang akong kaugalingon, ‘Dili ko kini mapuslan inigkahamtong na nako, busa walay kapuslanan ang pagkat-on niini.’ Apan, tungod niining artikuloha, nasabtan ko nga mapuslanon diay ang matematika sa daghang paagi. Busa nakahukom ko karon nga maningkamot pag-ayo ug dili moundang. Palihog padayona ang pagpatik ug mga artikulo nga sama niini!

M. N., Japan

Mga Wati Nalingaw ko sa makapahimuot nga karikatura nga nag-ilustrar sa artikulong “Ang Makaiikag nga Kalibotan sa mga Wati.” (Mayo 8, 2003) Ilabina nakong gipabilhan kini ingong tabang sa pagmemorya. Tungod sa maong mga drowing, dali ra nakong mahinumdoman ang kaundan sa maong artikulo.

M. Z., Italya

Ako 11 anyos, ug kanunay kong maghunahuna kon nganong dangog kaayo ang mga wati, apan karon nahibalo na ko kon ngano. Abi gyod nakog dunay usa lang ka matang sa wati. Wa ko magtuo nga duna diay kapin sa 1,800 ka espisye sa mga wati! Padayona ang pagpatik ug matulon-anong mga artikulo nga sama niini.

T. C., Tinipong Bansa

Pagkaangol Salamat sa artikulong “Kon sa Unsang Paagi ang Pagkaangol Nakausab sa Akong Kinabuhi.” (Abril 22, 2003) Tukmang gipahayag ni Brader Ombeva ang akong mga pagbati. Nag-antos ko sa fibromyalgia ug sa uban pang mga balatian, ug usahay grabe kaayo ang kasakit nga wa na koy lain pang mahimo kon dili ang paghilak. Kinahanglan kong bug-os nga mosalig kang Jehova sa paghatag kanakog kusog nga makaantos. Sama sa giingon ni Brader Ombeva, dakog ikatabang ang pagpamalandong sa makapahupay nga mga kasulatan. Gawas pa, ang akong bana lig-ong nagpaluyo kanako sa panahon sa akong kasakit. Salamat sa maong mga artikulo.

C. F., Tinipong Bansa

Dunay misikil nga disk sa dugokan sa akong bana gumikan sa usa ka aksidente sa trabahoan. Ang pagpakigbisog ni Brader Ombeva sa negatibong mga pagbati susama gayod sa among nasinatian. Gibati namo ang kaluya tungod sa kahimtang nga dili namo makontrolar. Masakitan gyod ko nga magsud-ong sa akong bana nga mag-antos sa hilabihang kasakit ug sa pagkahibalo nga diyutay ra kaayo kog mahimo sa paghupay niana. Duha ka tuig na ang milabay, ug siya padayong nag-antos sa mga hugna sa kasakit apan dili na sama kaniadto. Nianang malisod kaayo nga yugto, si Jehova nagpalig-on kanamo, ug siya padayong nagpahayag sa iyang mahigugmaong kahingawa pinaagi sa mga artikulo nga sama niini. Daghan kaayong salamat!

A. S., Tinipong Bansa

Mga Batan-on Nangutana Ako 16 anyos ug anaa sa primero anyo sa hayskul. Nag-atubang kog mga suliran ug mga pagpit-os nga wala nako maatubang sukad. Gibati gyod nako ang mga epekto sa pagpit-os sa isigkaingon. Ang mga artikulo sa “Mga Batan-on Nangutana” nakatabang kanako sa pagkaamgo sa kahinungdanon sa pagbasa ug pagtuon sa Bibliya. Salamat kaayo sa kahingawa nga inyong gipakita alang sa mga tin-edyer, nga subsob nakong bation nga direktang gitumong kanako mismo!

S. R., Tinipong Bansa