Kon sa Unsang Paagi Mahibaloan Nimo ang Ngalan sa Diyos

USA ka kolumnista sa mantalaan nakadawat sa mosunod nga sulat gikan sa usa ka magbabasa: “Sa tibuok kong kinabuhi gihunahuna nako pag-ayo kining pangutanaha, ug naglaom ko nga ikahatag nimo ang tubag. Unsay ngalan sa Diyos? Ang mga Hudiyo nag-ingon nga ang tinuod nga ngalan nawala na sa paglabay sa katuigan. Ang mga Kristohanon nagtawag Kaniyang Jesus. Ang mga Muslim nagtawag Kaniyang Allah. . . . Busa, unsa man gayoy ngalan sa Diyos?” Gipatik  sa mantalaan ang pangutana apil kining maong tubag: “Sumala sa karaang Hebreohanong mga pagtulon-an, ang Diyos maoy makagagahom-sa-tanan, busa dili paigo Kaniya ang bisan unsang usa ka ngalan. Apan, pasaligan ti ka nga Siya (Lalaki man o Babaye) motubag sa bisan unsang ngalan nga matinahoron nimong itawag kaniya.”

Ang maong taphaw nga tinamdan ngadto sa ngalan sa Diyos kasagaran karon. Bisan tuod mahiligon sa relihiyon, daghan nga nagtuo sa Bibliya wala kaayo maghunahuna sa isyu bahin sa ngalan sa Diyos. Apan unsay bation sa Diyos niana? Gamayng butang ba lamang kana alang kaniya?

Dili Gamayng Butang

Tagda ang kamatuoran nga ang Bibliya naghisgot sa personal nga ngalan sa Diyos, nga Jehova, libolibo ka beses. Sa Bag-ong Kalibotang Hubad sa Balaang Kasulatan, ang balaang ngalan makita sa 7,210 ka beses! a Ang Diyos mismo ang nag-inspirar sa mga magsusulat sa Bibliya sa paggamit kanunay sa iyang ngalan. Ang usa niining maong mga magsusulat, ang salmistang si Asap, misulat: “Ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” (Salmo 83:18) Si David misulat usab diha sa usa ka salmo: “Kami magahisgot mahitungod sa ngalan ni Jehova nga among Diyos.”​—Salmo 20:7.

Gipakita sa Bibliya nga si Jehova nga Diyos nagasusi sa atong kasingkasing aron sa pagtino kon unsay atong pagbati sa iyang ngalan. Ang salmista nag-ingon: “Kon nahikalimot kami sa ngalan sa among  Diyos, . . . dili ba ang Diyos magasusi niini? Kay nasayod siya sa mga tinago sa kasingkasing.” (Salmo 44:​20, 21) Ang manalagnang Isaias misulat: “Pagpasalamat kamo kang Jehova! Tawga ang iyang ngalan. Ipahibalo taliwala sa mga katawhan ang iyang mga pakiglabot. Hisgoti nga ang iyang ngalan gibayaw.”​—Isaias 12:4.

Ang Diyos mismo nag-ingon: “Sila makaila gayod nga ang akong ngalan maoy Jehova.” (Jeremias 16:21) Sa laing higayon siya miingon: “Balaanon ko ang akong dakong ngalan, nga gipasipalahan sa taliwala sa kanasoran, . . . ug ang kanasoran makaila gayod nga ako mao si Jehova.” (Ezequiel 36:23) Ang uban niining maong mga pahayag nagpunting sa panahon sa dihang si Jehova molihok uban ang kasuko ngadto niadtong wala magtahod sa iyang ngalan. Ang isyu bahin sa iyang personal nga ngalan dili gamayng butang alang sa Diyos.

Si Jehova nga Diyos Dili Halayo Kanimo

Sa unsang paagi mailhan nimo ang ngalan sa Diyos? Unsay kahulogan sa pagkaila sa ngalan sa Diyos? Ang Bibliya nagtubag: ‘Kadtong nahibalo sa imong ngalan mosalig kanimo.’ (Salmo 9:10) Klaro nga ang pagkahibalo sa ngalan sa Diyos naglangkit ug labaw pa. Kinahanglang mosalig ka kaniya. Kana nagpasabot ug pagkahibalo kon unsa siyang matanga sa pagka-Diyos ug pagkat-on bahin sa iyang mga hiyas ug iyang mga hunahuna. Kini magtukmod kanimo sa pagsalig kaniya.

Ang mainampingong pagbasa ug pagtuon sa Bibliya mao lamang ang makahatag kanimo ug hait nga pagsabot kon unsang matanga sa pagka-Diyos ni Jehova. Siya nagsaad sa pagpanalipod niadtong nagpakitag pagmahal kaniya ug sa iyang ngalan. Bahin sa usa nga nagbuhat niana, ang Diyos nag-ingon: “Tungod kay iyang gipakita kanako ang iyang pagmahal, igatagana ko usab kaniya ang kaikyasan. Panalipdan ko siya tungod kay nakaila siya sa akong ngalan. Magatuaw siya kanako, ug tubagon ko siya. Diha sa kasakit ako magauban kaniya. Ako magaluwas kaniya ug magahimaya kaniya. Pagatagbawon ko siya sa daghang mga adlaw, ug pakit-on ko siya sa akong pagluwas.”​—Salmo 91:14-16.

Pagkanindot sa relasyon ni Jehova nga Diyos uban niadtong nahibalo sa iyang ngalan! Ikaw usab makatagamtam sa maong relasyon. Sa imong kinasingkasing nga mga pag-ampo, ayaw gayod pagpanuko sa pagtawag sa iyang ngalan. Siya motubag tungod kay, sumala sa giingon sa Bibliya, “siya dili halayo gikan sa matag usa kanato.”​—Buhat 17:27.

[Footnote]

[Kahon/Hulagway sa panid 11]

Ang Diyos Nahibalo sa Imong Ngalan

Ang Diyos miingon kang Moises: ‘Nahibalo ako sa imong ngalan.’ (Exodo 33:12) Ang iladong asoy bahin sa nagdilaab nga kupongkupong nagpamatuod niini. Ang Bibliya nag-ingon nga ang Diyos “mitawag kaniya gikan sa taliwala sa tunokong tanom ug miingon: ‘Moises! Moises!’” (Exodo 3:4) Kini maoy usa lamang ka pananglitan sa daghang okasyon diin ang Diyos nagtawag sa mga tawo pinaagi sa ilang personal nga ngalan. Klaro nga ang Maglalalang sa uniberso interesado kanato ingong mga indibiduwal.

Ang Bibliya nag-ingon nga ang Diyos nakaila sa ngalan sa bilyonbilyong bituon. (Isaias 40:26) Segurado nga aduna siyay labawng pagtagad sa mga tawo nga mosimba kaniya! Si apostol Pablo misulat nga “Si Jehova nakaila sa mga iyaha.” (2 Timoteo 2:19) Kini nagpasabot ug labaw pa kay sa pagmemorya lamang sa mga ngalan. Ang Diyos nasinati kaayo sa iyang mga magsisimba. Sa baylo, angay nga mahibaloan nato ang ngalan sa Diyos ug masinati pag-ayo sa iyang mga hiyas.

Ang kataposang basahon sa Bibliya naghubit sa usa ka mahulagwayong basahon diin ang Diyos nagsulat sa mga ngalan sa tanan nga nagsimba kaniya latas sa kasaysayan. Kining basahona gitawag nga “linukot nga basahon sa kinabuhi” tungod kay si Jehova nga Diyos magahatag ug walay-kataposang kinabuhi ngadto niadtong kansang mga ngalan nasulat diha niana. (Pinadayag 17:8) Kini maoy makalilipay nga palaaboton alang niadtong nahibalo sa ngalan sa Diyos.

[Kahon/Hulaway sa panid 12]

Ilang Gimantala ang Ngalan sa Diyos

● Awit ni Moises una pa misulod ang Israel sa Yutang Saad: “Akong ipahayag ang ngalan ni Jehova.”​—Deuteronomio 32:3.

● Gisulti ni David ngadto sa higanteng si Goliat: “Ako mianhi kanimo uban sa ngalan ni Jehova sa mga panon.”​—1 Samuel 17:45.

● Ang giingon ni Job human sa pagkahanaw sa tanan niyang kabtangan ug sa kalit nga kamatayon sa tanan niyang mga anak: “Padayong dayegon ang ngalan ni Jehova.”​—Job 1:21.

● Si apostol Pedro nagkutlo sa Hebreohanong Kasulatan diha sa usa ka pakigpulong: “Ang matag usa nga magatawag sa ngalan ni Jehova maluwas.”​—Buhat 2:21.

● Ang manalagnang si Isaias: “Pagpasalamat kamo kang Jehova! Tawga ang iyang ngalan. . . . Hisgoti nga ang iyang ngalan gibayaw.”​—Isaias 12:4.

● Si Jesus nga nagtudlo sa iyang mga tinun-an sa pag-ampo: “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan.’”​—Mateo 6:​9, 10.

● Si Jesu-Kristo nga nag-ampo sa Diyos: “Gipadayag ko ang imong ngalan.”​—Juan 17:6.

● Ang Diyos nga nagsulti sa iyang katawhan: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya.”​—Isaias 42:8.