Ngalan sa Diyos Gidispley Diha sa Karaang mga Tinukod
Ngalan sa Diyos Gidispley Diha sa Karaang mga Tinukod
TINAMPO SA MAGSUSULAT SA PAGMATA! SA SLOVENIA
Latas sa daghang siglo, ang mga simbahan ug monasteryo gitukod ibabaw sa mga bungtod sa tibuok Uropa. Ang arkitektural nga disenyo niining karaang mga tinukod maoy gikan sa Romanesque nga disenyo sa Edad Medya—nga kasagarang adunay baga nga mga bungbong ug nagbawog nga mga arko. Ang uban adunay maartehon ug madanihon nga baroque nga disenyo sa ulahing mga siglo. Makaiikag nga sa sulod niining kadaghanang tinukod makaplagan ang Tetragrammaton, ang upat ka Hebreohanong mga letra sa personal nga ngalan sa Diyos.
Pananglitan, tagda ang monasteryo sa Stična, usa sa labing karaang Cistercian nga mga monasteryo, nga nahimutang sa Slovenia. Gitukod kini niadtong 1135, mga 40 ka tuig lamang human nga natukod ang orden sa Cistercian nga mga monghe sa Pransiya. Bisag daghang higayon nang gibag-o ang monasteryo, nagpabilin gihapon ang orihinal nga Romanesque nga disenyo niini, nga karon may baroque nga mga adorno. Ang sulod giadornohan ug nagkalainlaing mga dibuho ug estatwa. Diha sa usa ka altar sa kilid makita ang dagkong bulawan nga mga letra sa Tetragrammaton nga nakuwadro sa plata.
Ang lungsod sa Slovenj Gradec unang gihisgotan diha sa mga talaan nga nahisulat niadto pang ikanapulo nga siglo. Ang usa ka Gothic nga simbahan nga may sumpay nga ospital gitukod didto niadtong 1419. Ang bungbong sa sulod sa tinukod napunog ika-15 nga siglo nga dibuho nga naglarawan sa 27 ka esena sa Bibliya. Ang una mao ang pagkabanhaw ni Lazaro ug ang kataposan mao ang Pentekostes. Sa laing dapit sa maong tinukod, gidispley ang Hebreohanong ngalan sa Diyos nga itom ug kolor ang mga letra ug ang luyo maoy bulawan.
Diha sa amihanan-kasadpan nga rehiyon sa nasod mao ang lungsod sa Radovljica. Sa katuigang 1400, ang gamayng balangay gilibotan ug mga paril ug usa ka trinsera ug dunay usa ka kastilyo, simbahan, ug uban pang nagkalainlaing mga tinukod. Adunay Tetragrammaton sa usa ka bulawan nga plake diha sa usa sa mga altar sa simbahan.
Duol sa gamayng balangay sa Podčetrtka nagbarog ang usa ka karaang monasteryo nga gitukod sa ika-17ng siglo. Sa sulod, makita sa usa nga mapanid-on kaayo ang usa ka dibuho nga gidayandayan sa ngalan sa Diyos.
Ang Tetragrammaton makita sa daghang uban pang karaang mga tinukod sa Slovenia. Busa, samtang kalingawan ug tan-aw ang kahanas ug artistikong buhat sa karaang panahon, masayran sa mga turista nga ang mga molupyo sa kanhiayng mga adlaw sinati sa ngalan sa Diyos.
[Hulagway sa panid 31]
Altar sa kilid sa monasteryo sa Stična
[Hulagway sa panid 31]
Sa Sveti Duh nga simbahan sa Slovenj Gradec
[Credit Line]
Slovenj Gradec - Cerkev Sv. Duha, Slovenija