Ang Atong Planeta—Unsay Palaaboton Niini?

“Samtang ang mga tawo sa libolibo nang katuigan nahadlok sa kinaiyanhong mga kalamidad nga dili mapugngan sa tawo sama sa lunop ug hulaw, sila karon naladlad sa mas grabe pa nga kalamidad: ang kinaiyanhong kalamidad nga tawo ang nagpahinabo,” nagtaho ang mantalaang Globe and Mail sa Canada. Ang United Nations Environment Programme (UNEP) nagpatik ug matukiong report nga nag-awhag sa mga tawo sa paghunong sa mga kalihokan nga makadaot sa kalikopan sa dili pa ulahi ang tanan. Ang ehekutibong direktor sa UNEP, nga si Klaus Toepfer, miingon: “Daghan na kami ug nahipos nga impormasyon karon sa pagkakita kon sa unsang paagi ang atong mga lihok o kakulang ug paglihok makaapektar sa kalikopan ug sa mga molupyo niining talagsaong asul nga planeta inigka-2032.”

Dunay kauswagan nga nahimo sa pagpanalipod sa kalikopan sukad nga natukod ang UNEP sa 1972. Sama sa gikataho diha sa The Toronto Star, “ang kalidad sa hangin ug ang katubigan sa mga suba miarang-arang na sa Uropa ug sa Amerika del Norte, ug ang gipahamtang nga mga restriksiyon sa pagpakunhod sa gidaghanon sa kemikal nga ginabuga nakatabang sa pagkunhod sa kadaot sa ozone layer.” Dugang pa, ang mga programa sa pagdumala sa lasang, sama nianang sa Canada, Norway, Pinlandia, ug sa Tinipong Bansa, “nagpasalig nga ang epekto sa sobrang pagpuril sa mga kahoy mamenosan.” Bisan pa niana, ang report sa UNEP nag-ingon nga kon dili kontrolahon ang padayon nga paglambo sa ekonomiya ug ang pagdako sa mga siyudad, kini duna unyay makadaot nga epekto sa kinabuhi sa mga tanom ug mga hayop ug sa ekolohiya. Ang Globe nag-ingon: “Mga katunga sa mga suba sa kalibotan hugaw o menos na ug tubig. Ang otsenta ka nasod nga may 40 porsiyento sa populasyon sa kalibotan dunay dakong problema sa kakulang sa tubig.”

Si Toepfer nagtuo nga “makab-ot ang maayong mga resulta kon dunay tinong lakang nga pagahimoon.” Siya midugang: “Kita nagkinahanglan ug espesipiko nga plano . . . espesipikong mga proyekto . . . ug labaw sa tanan klarong opisyal nga deklarasyon.” Apan unsa may paglaom ang mapaabot kon ang mga lider dili molihok alang sa kaayohan sa planeta?

Ayawg kalugda, kay adunay usa nga naghimog “klarong opisyal nga deklarasyon” ug usa nga mohimog “tinong lakang”​—si Jehova nga Diyos. Sa pagkatinuod, siya mihatag ug opisyal nga deklarasyon nga klarong nag-ingon nga siya mangilabot ug ‘molaglag sa mga nagalaglag sa yuta.’ (Pinadayag 11:18) Dugang pa, ang Diyos nagpasalig kanato nga ang mga ekosistema sa yuta ipasig-uli. Ang mga desyerto mamulak. (Isaias 35:1) Ang pagkaon mahimong dagaya. Ang mga suba limpiyo na unya. (Salmo 72:16; 98:8) Ang Diyos nagpasalig ug panalangin alang sa tanang buhing butang sa yuta.​—Salmo 96:​11, 12.

[Picture Credit Line sa panid 31]

NASA photo