Gikan sa Among mga Magbabasa

Mga Prinsipyo Nakurat ako sa mga pulong sa pangbukas nga parapo sa ikaduhang artikulo sa seryal nga “Unsay Nagakahitabo sa mga Prinsipyo?” (Hunyo 8, 2003) Kini nag-ingon: “Ang labing talagsaong mga gasa nga ikahatag sa mga ginikanan sa ilang mga anak mao ang walay kondisyon nga gugma ug hugpong sa mga prinsipyo nga gisunod sa mga ginikanan.” Kon ang mga bata ug mga hamtong molihok nga morag may katungod sila sa gugma sa usag usa, ang mga prinsipyo mawala gayod.

K. B., Tinipong Bansa

Ang “Pagmata!” nagtubag: Ang mga pulong “walay kondisyon nga gugma” gigamit sa pagsugyot nga ang mga ginikanan dili magpakita nga ang ilang gugma sa ilang mga anak kaduhaduhaan o dili-malig-on​—nga kini mahimong bawion sa bisan unsang panahon tungod sa kapakyasan sa bahin sa bata o nga ang bata obligado sa pag-angkon sa gugma sa ginikanan pinaagi sa pagbuhat sa tanang butang sa hustong paagi.​—Efeso 6:4; Colosas 3:21.

Akong nakita nga maayo kaayong pagkasulat ang kataposang artikulo niining maong seryal. Ang materyal simple kaayo, makataronganon, ug makapadasig. Ang hulagway maanindot. Salamat sa makapahupayng mga artikulo.

M. P., Tinipong Bansa

Tubig Salamat sa artikulong “Bililhong Likido sa Kinabuhi​—Tubig.” (Hunyo 8, 2003) Gikutlo niining maong artikulo ang usa ka espesyalista sa pagkatambok nga nagsugyot nga ang mga tawong himsog ug panglawas kinahanglang moinom ug walo ngadto sa napulo ka kasagarang basong tubig kada adlaw. Apan, kon ang tawo dunay sakit sa kasingkasing o may diperensiya sa rinyon, tambagan sa mga doktor ang mga pasyente nga dili moinom ug daghang tubig.

T. A., Japan

Ang “Pagmata!” nagtubag: Ang mga rekomendasyon niining butanga nagkalainlain. Ang ubang mga espesyalista moingon nga kon ang tawo dunay pipila ka problema sa panglawas, ang pag-inom ug tubig kinahanglang limitehan. Maalamon nga magpakonsulta sa imong doktor alang sa dugang tambag.

Postpartum Depression Usa ako ka inahan, ug ako dunay pinalanggang batang babaye nga usa pa lamang ka tuig ang edad. Karon ko pa lang nabati sukad ang mapanalipdanong pagtagad ni Jehova sa dihang akong gibuksan ang Pagmata! ug gibasa ang artikulong “Pagsabot sa Postpartum Depression.” (Hunyo 8, 2003) Wala akoy pulong nga ikahubit sa pagpahayag sa akong dakong pagpasalamat alang niining artikuloha. Nagpasalamat gayod ako nga nahimong sakop sa usa ka grupo nga mahigugmaong nagtagad sa tagsatagsang mga membro niini. Salamat kaayo, salamat kaayo!

M. G., Espanya

Crossword Puzzle Salamat sa inyong Hunyo 8, 2003, nga Awake! Nakaplagan nako ang bahandi nga akong gipaabot​—ang crossword puzzle! Nahimo akong usa sa mga Saksi ni Jehova sa mga upat na ka tuig, ug natubag nako ang halos tanang pulongbay nga gipatik nianang panahona. Usa kini ka dakong paagi sa pagsinati sa Kasulatan. Ipadayon ang maayong buhat. Ako nagpaabot nga makatubag ug daghan pa sa inyong mga pulongbay sa umaabot!

K. G., Tinipong Bansa

Mga Igbalati Salamat sa inyong mga seryal nga “Ang Katingalahang mga Igbalati sa Kinabuhi​—Giapresyar ba Nimo Kini?” (Marso 8, 2003) Ang atong mga igbalati makatabang gayod kanato sa pag-apresyar sa kinabuhi ug sa atong kalikopan. Ang mga artikulong sama niini makapalig-on sa atong gugma sa Diyos. Salamat sa inyong pagpatik niini.

J. N., Burundi

Materyalismo Buot kong pasalamatan kamo sa artikulong “Ang Hunahuna sa Bibliya: Unsa ang Materyalismo?” (Abril 8, 2003) Tinuod nga daghang tawo karon ang nalinga nga mahimong sapian, ug ikasubo, kining problemaha makaapektar usab sa mga Kristohanon. Kining maong artikulo nakatabang kanako sa pagsabot kon unsa ang materyalismo ug kon unsaon sa paglikay niana. Karon himoon ko ang kutob sa akong maarangan sa paghatag ug pangunang pagtagad sa espirituwal nga mga butang ug dili sa materyal nga mga butang. Daghang salamat sa pagpatik ug sama niini ka matulon-anong artikulo!

Z. K., Rusya