Ang Hunahuna sa Bibliya

Matino ba ang Imong Personalidad Pinaagi sa Tipo sa Dugo?

ANG pagtino sa personalidad sa usa ka tawo nga gipasukad sa iyang tipo sa dugo maoy popular diha sa pipila ka nasod. Sa Japan, pananglitan, dili talagsaon nga may tawong mangutana, “Unsa may tipo sa imong dugo?” aron sa pagsugod sa panag-estorya. Ang mga tigpaluyo ning maong ideya nag-angkon nga ang mga tawong may tipo-A nga dugo maoy kalmado, responsable, ug matahapon; kadtong may tipo-B nga dugo maoy mahinatagon, sapoton, daling mailad; ug uban pa. Giingon usab nga ang usa ka tawo sa usa ka tipo sa dugo mahimong malisdan​—o masayonan​—sa pagpakiglabot sa usa ka tawo nga lain ug tipo sa dugo.

Pinasukad ning maong panghunahuna, ang pipila nag-isip sa tipo sa dugo ingong hinungdanong bahin sa paggrupo sa mga estudyante sa mga eskuylahan, pagpilig mga ehekutibo diha sa mga kompaniya, o bisan sa pagpilig mga kapikas. Aduna bay pamatuod nga ang atong tipo sa dugo mao gayoy magtino sa atong personalidad? Aduna bay mga pagtulon-an sa Bibliya nga naghisgot niining bahina?

Unsa May Tipo sa Dugo?

Ang The World Book Multimedia Encyclopedia nag-ingon: “Ang nipis nga mga hapin sa mga selula sa pulang dugo adunay mga protina nga gitawag ug mga antigen. Kapin sa 300 ka antigen sa pulang dugo ang nailhan.” Bisan tuod ang pipila ka tawo dunay pipila ka matang sa mga antigen, ang uban wala, ug ang ubang mga antigen dili mahimong dungang maglungtad. Busa, sumala sa gidugang sa maong ensiklopedia, “binase sa pagkaanaa o pagkakulang sa partikular nga mga antigen, maklasipikar sa mga siyentipiko ang dugo sa tawo ngadto sa nagkalainlaing mga grupo.”

Ang labing dinawat nga sistema sa paghugpong sa dugo mao ang ABO nga sistema, nga nagklasipikar sa dugo sa tawo ngadto sa upat ka tipo​—A, B, AB, ug O. Dugang pa, ang Rh nga sistema komon nga gigamit. Sa pagkatinuod, dunay mga 20 ka nailhang  mga sistema sa paghugpong sa dugo. Nan, dayag nga ang dugo komplikado kaayo. Ang Encyclopædia Britannica nag-ingon: “Tungod sa daghan kaayong nagkalainlain nga mga antigen sa pulang selula lagmit gayong dili mahitabo nga ang mga tawo adunay managsamang han-ay sa mga substansiya sa grupo sa dugo gawas lang sa mga kaluha nga parehog hitsura.”

Kini nagpasabot nga, sa tukmang pagkasulti, ang tagsatagsa ka tawo adunay lahi nga “tipo sa dugo.” Busa, ang pag-ingon nga ang mga tawo nga dunay usa ka matang sa tipo sa dugo dunay susamang mga kinaiya morag walay pasikaranan. Daghang butang ang dayag nga magtino sa atong personalidad.

Unsay Magtino sa Atong Personalidad?

“Ang personalidad mao kanang kinaiyanhong mga panggawi, napanunod ug naugmad, nga magpalahi sa matag tawo,” matod sa Encyclopædia Britannica. Oo, gawas pa sa atong napanunod, dunay ubang mga hinungdan​—sama sa kahimtang sa pamilya, edukasyon, kauban, ug maayo ug dili-maayo nga mga kasinatian​—nga makaapektar sa kaugmaran sa atong personalidad. Busa, ang atong henetikanhong pagkagama dili kay mao ray magtino sa atong personalidad. Bisan ang kaluha nga parehog hitsura, nga dunay managsamang henetikanhong kahulmahan, kasagaran nga lainlain ug mga personalidad.

Ang laing hinungdanong kamatuoran mao nga ang personalidad sa usa mahimong mabag-o o mailisan. Gipasiugda ni apostol Pablo ang gahom sa Kristohanong mga pagtulon-an nga makausab sa mga tawo. Siya misulat: “Hukasa ang daang pagkatawo uban ang mga buhat niini, ug isul-ob ang bag-ong pagkatawo, nga pinaagi sa tukmang kahibalo gibag-o sumala sa larawan sa Usa nga naglalang niini.” (Colosas 3:​9, 10) Giila sa mga Kristohanon nga sila maoy mga makasasala ug nakapanunod sa makasasalang mga hilig. Aron dawaton sila sa Diyos, ang ilang mga personalidad kinahanglang mabag-o.

Sa unsang paagi mahimo ang maong mga kausaban? Pinaagi sa gahom sa pulong, o mensahe, sa Diyos. Maylabot sa kusganong impluwensiya sa pulong sa Diyos, nga makita karon diha sa Bibliya, si Pablo misulat: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Hebreohanon 4:12) Sa dihang ang usa ka tawo magpailalom sa impluwensiya sa espiritu sa Diyos ug maningkamot sa pagpahiuyon sa moral nga mga sukdanan nga gilatid diha sa Bibliya, ang iyang personalidad anam-anam nga mabag-o. Ang Kristohanong personalidad nga naugmad niining paagiha naglakip sa “malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob.”​—Colosas 3:12.

Kristohanong Pagkamakataronganon

Tinuod, walay prinsipyo sa Bibliya nga nagdili sa pagtuon sa mga tipo sa dugo. Apan ang bisan unsang kalangkitan tingali niini ngadto sa kinaiya sa tawo maoy laing butang. Sama sa tanang bahin sa kinabuhi, angay natong tugotan ang Pulong sa Diyos nga mogiya sa atong mga lakang. (Salmo 119:105) Hinungdanon usab ang pagkamakataronganon.​—Filipos 4:5.

Dayag nga dili gayod makataronganon nga gamiton ang tipo sa dugo sa usa ingong pasangil sa dili pagtul-id sa mga diperensiya sa personalidad. Bisan pa sa ilang henetikanhong kahulmahan, ang mga Kristohanon kinahanglang padayon nga mouswag sa pag-umol sa ilang mga personalidad nga mobanaag sa mga hiyas ni Jehova ug ni Jesus kutob sa maarangan.​—Efeso 5:1.

Dugang pa, ang mga Kristohanon maningkamot sa paglantaw sa uban sumala sa paglantaw ni Jehova kanila. “Ang Diyos dili mapihigon.” (Buhat 10:​34, 35) Malipayong dawaton ni Jehova ang tanang matang sa mga tawo. Busa dili makataronganon ug dili-Kristohanon ang pagsalikway o paglikay sa pagpakig-uban sa pipila ka tawo tungod lang sa ilang tipo sa dugo. Tinuod usab kana kon ang usa ka tawo makig-uban lamang niadtong adunay “ikasinabot” nga tipo sa dugo. Ang Bibliya nagtambag: “Kon kamo magpadayon sa pagpakitag paboritismo, kamo nakasala.”​—Santiago 2:9.

Samtang nag-uswag ang siyensiya ug teknolohiya, adunay daghang bag-ong mga kaplag ug mga teoriya bahin sa lawas sa tawo. Kinaiyanhon lamang nga mahingangha sa maong mga panghunahuna. Bisan pa niana, mas maayong tugotan sa mga Kristohanon ang Bibliya​—dili ang mga teoriya sa tawo​—nga maoy mogiya sa ilang panghunahuna. Diha sa tanang kahimtang sa kinabuhi, kinahanglang ‘tinoon sa mga Kristohanon ang tanang butang’ ug ‘panguptan pag-ayo ang maayo.’​—1 Tesalonica 5:21.