“Pagpangita sa Katawhan sa Diyos”

Ang mantalaan sa Mexico City nga Excelsior sa Septiyembre 25, 2002, nagpatik ug usa ka editoryal uban sa maong ulohan sa ibabaw. Gisulat kini ni Carlo Coccioli, usa ka iladong eskolar ug magsusulat sa Mexico. Ang iyang artikulo gisugdan niining mosunod nga mga pulong.

“Mao pay akong pagkahumag basa​—o makaingon ko pagbasa pag-usab o, sa mas haom nga pagkasulti, pagsublisublig basa​—sa usa ka talagsaong gamay nga pulang libro​—dili ang pulang libro nga ilado kaayo sa panahon ni Mao Tse-tung. Kini [Pagpangita sa Katawhan sa Diyos a] dili lang kay mas talagsaon pa gayod nga libro kondili, lahi sa ‘Gamayng Pula nga Libro’ ni Mao Tse-tung nga nahanaw na paglabay sa panahon, kini lagmit dili gayod mahanaw. Sa mubong pagkasulti, kining libroha maoy usa ka gasa gikan sa mga Saksi ni Jehova ngadto sa kalibotan. Kon itandi sa kadaghanang mga libro, gamay ra kini, apan daghan kaayo kinig sulod. Ikasuksok lang nimo kini sa imong bulsa, apan kon kini makaplagan diha sa usa ka librarya sa 90,000 ka nagkalainlaing mga libro, kini lagmit mao ang labing hinungdanong libro nianang tanan.”

Si G. Coccioli nagpadayon sa pag-asoy bahin sa panahon sa iyang pagkabatan-on sa dihang nakahukom siya kon unsang kursoha ang iyang kuhaon. “Ang kurso nga akong gipili alang sa akong pagtuon sa unibersidad,” matod pa niya, “dunay kalabotan sa kon unsay nakadani sa akong kinaadman ug nagustohan sa akong kalag: ang mga relihiyon, ilabina ang mga relihiyon sa Oriente.” Siya miingon nga ang pagtuon bahin sa mga relihiyon nakadani kaniya ug nga panahon sa Gubat sa Kalibotan II, siya mikuhag silid nga doctorate nga ang mga subject nalangkit sa relihiyon.

“Busa,” siya miingon, “gibati kong takos gayod sa pag-ingon nga ang gamay nga pulang libro nga akong nadawat maoy usa ka talagsaong produkto sa kaalam ug kahinungdanon sa ulohan bahin sa kahibulongang mga panghitabo sa relihiyon. . . . [Ang maong libro] angayng batonan sa matag panimalay aron ablihan, basahon, ug basahon pag-usab matag karon ug unya. Kini wala masudli ug bisan unsang relihiyoso nga panganunsiyo kondili, hinuon, maoy usa ka makinaadmanong kultural nga produkto sa tawo, kansang kinaiyahan nakiling sa pagsusi sa komplikadong misteryo sa Diyos.”

Sa kataposan sa iyang artikulo, gihatag ni G. Coccioli ang numero sa telepono sa Saksi nga naghatag kaniya sa libro. Sukad niadto nakadawat na ang maong sister ug daghang tawag sa telepono nga nangayo niana, mao nga gipaneguro sa sangang buhatan sa mga Saksi ni Jehova sa Mexico nga ang tanang interesado sa Pagpangita sa Katawhan sa Diyos makadawat ug usa ka kopya. Ang usa ka tawo nga nangayo ug 20 ka libro alang sa iyang pamilya ug mga higala adunay maayong pag-uswag diha sa iyang pagtuon sa Bibliya.

[Footnote]