Tagamtama ang Pagpakig-uban sa mga Mananap sa Walay Kataposan

NAGKADAIYA gayod ang mga mananap, nga ang matag usa morag adunay lainlaing mga personalidad! Ang pagmahal ug kaluoy alang niini mahimong makapasuod sa usa ka tawo sa Maglalalang niini. Giilustrar kini sa kaso ni Maria.

Mga tulo ka tuig kanhi, sa dihang si Maria nagpuyo sa Lisbon, Portugal, ang iyang pinalanggang iro nawala, ug gipasibya niya kini sa radyo. Usa sa mga Saksi ni Jehova, kinsa nakaseguro nga iyang nakita ang iro nga haom sa kahubitan nga gihatag, mikontak kang Maria. Sa dihang nagkita silang duha, ilang nakaplagan ang iro, ug ang Saksi mikomento nga sanglit si Maria mahigugmaon man kaayo sa mga mananap, tinong malipay siya nga mabuhi sa bag-ong kalibotan nga gisaad sa Diyos. Gipatin-aw sa Saksi nga ang mga tawo nianang panahona aduna nay pakigdait uban sa tanang mananap.

 Gidawat ni Maria ang imbitasyon nga motambong sa usa ka tigom sa mga Saksi. Ang iyang nadungog ug nakita didto nakapukaw sa iyang interes sa gilapdon nga gusto niyang magtuon sa Bibliya. Samtang nagpadayon ang pagtuon, si Maria natandog pag-ayo sa iyang nakat-onan bahin kang Jehova nga Diyos ug sa iyang saad nga kinabuhing walay kataposan sa yuta diha sa usa ka bag-ong kalibotan sa pagkamatarong. (Salmo 37:29; Juan 17:3) Sa ngadtongadto, sa Pebrero 16, 2002, iyang gipasimbolohan ang iyang pahinungod kang Jehova pinaagi sa pagpabawtismo sa tubig.

Ang Orihinal nga Katuyoan sa Diyos

Sama kang Maria, daghan ang nahinam sa pamatuod nga ang orihinal nga katuyoan sa Diyos nga ang mga tawo mabuhi sa walay kataposan sa paraiso sa yuta ug mag-atiman sa tanang mananap niini matuman sa ngadtongadto. (Genesis 1:28) Ang Bibliya nag-ingon nga ang Diyos “wala maglalang [sa yuta] sa wala lamay kapuslanan” kondili “nag-umol niini aron pagapuy-an.” Dayag nga katuyoan sa Diyos nga tagamtamon sa mga tawo ang yuta ug ang mga mananap niini sa walay kataposan.​—Isaias 45:18.

Gipasiugda pa sa Bibliya nga tumanon gayod sa Diyos ang iyang orihinal nga katuyoan nga himoong paraiso ang yuta. “Akong gisulti gayod kini,” matod niya, nga midugang: “Akong ipadangat usab kini.” Dugang pa si Jehova nagsugo: “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”​—Isaias 46:11; 55:11.

Klaro nga orihinal nga katuyoan sa Diyos nga ang mga tawo makatagamtam sa yutan-ong paraiso sa walay kataposan. Makaseguro gayod kita nga sa ngadtongadto ang maong katuyoan matuman. Susihon nato ang mugbong mga kahubitan nga gihatag diha sa Bibliya kon sama sa unsa ang kinabuhi sa bag-ong kalibotan sa Diyos. Sa pagkatinuod, atong makita nga ang tanang mananap, gipaaghop ug ihalas, aduna unyay pakigdait sa usag usa ug uban sa mga tawo.​—Isaias 65:​17, 21-25; 2 Pedro 3:13.

Mga Binuhi sa Bag-ong Kalibotan sa Diyos

Sa bag-ong kalibotan ni Jehova, ang mga tawo makahimo na sa paghikap sa labong nga lambungay sa leyon, sa paghapyod sa rinayahang balhibo sa tigre ug, oo, matulog sa kalasangan nga dili mahadlok nga adunay mananap nga manghilabot kanila. Matikdi kining maong saad sa Diyos: “Wagtangon ko ang makadaot nga mapintas nga mananap gikan sa yuta, ug [ang mga tawo] magpuyo sa kasegurohan diha sa kamingawan ug mangatulog diha sa kalasangan.”​—Ezequiel 34:25; Oseas 2:18.

Sa pagkatinuod, ang ihalas nga mga mananap magpasakop na unya, bisan sa gagmayng mga bata! Ang Bibliya nag-ingon: “Ang lobo mopuyo gayod sa makadiyot uban sa laki nga nating karnero, ug ang leopardo mohigda uban sa nating kanding, ug ang nating baka ug ang may-lambungay nga nating leyon ug ang pinakaon-pag-ayo nga hayop magkauban ang tanan; ug usa lamang ka gamayng bata ang mangulo kanila.”

Apan dili lang kay kana ra! Ang teksto nagpadayon: “Ang baka ug ang oso manibsib; manag-ipon sa paghigda ang ilang mga nati. Ug bisan ang leyon mokaon ug uhot sama sa torong baka. Ug ang bata nga masuso magadula sa lungag sa kobra; ug ang usa ka bata nga linutas mokuot sa buho nga lutsanan sa kahayag sa malalang bitin. Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”​—Isaias 11:6-9.

Sa bag-ong kalibotan ni Jehova, dili na unya problema ang mga tawo nga magpunsisok diha sa dagkong mga siyudad nga dili maayong puy-an nila ug sa ilang mga binuhi. Tinuod, bisan karon daghan ang nakatagamtam sa pagpakig-uban sa ilang mga mananap, ug daghan ang nagpasundayag ug pagkatimbang sa ilang tinamdan ug pag-atiman niana. Apan handurawa ra ang kahibulongang palaaboton nga matagamtam ang pagpakig-uban sa mga binuhi sa walay kataposan diha sa matarong nga bag-ong kalibotan! Ang mahigugmaong pag-atiman kanila magpasidungog gayod sa Dakong Maglalalang sa tanang buhing mga butang.

Kon wala ka pa mahibalo bahin sa kahibulongang mga katuyoan sa Diyos​—maingon nga ang mahigugmaon-sa-binuhi nga si Maria bag-o pa lang nahibalo bahin niini​—mainiton namo kamong gidapit sa pagkontak sa mga magpapatik niining magasina o sa usa sa mga Saksi ni Jehova, kinsa malipayng motabang kanimo nga makahibalo bahin sa mga katuyoan sa Diyos.

[Hulagway sa panid 10]

Sa bag-ong kalibotan sa Diyos, matagamtam ang pagpakig-uban sa mga mananap sa walay kataposan