Ang Hunahuna sa Bibliya

Daotan ba Gayod ang Paghuboghubog?

ANG usa ka makapahimuot nga hubog, kansang papel mao ang pagpakatawa sa mga tawo, anaa kanunay sa mga entablado ug mga pelikula sa daghan nang katuigan. Bisan tuod ang mga magdudula nag-inartista lang, ang ilang matang sa pasiaw nagsundog sa nagkalainlaing tinamdan sa daghang tawo maylabot sa paghuboghubog, nga nag-isip niana ingong kahuyangan, apan dili ra makadaot.

Siyempre, ang kamatuoran dili kataw-anan. Ang World Health Organization nag-isip sa pag-abuso sa alkoholikong ilimnon ingong usa sa labing makadaot sa panglawas sa tibuok kalibotan. Giingon nga gawas sa pagkagiyan sa tabako, ang pag-abuso sa alkoholikong ilimnon nakapahinabog mas daghang kamatayon ug mga sakit kay sa pag-abuso sa bisan unsang uban pang makagiyan nga mga substansiya, ug kini nakalimas sa ekonomiya sa Amerika lamang ug kapin sa $184 bilyones kada tuig.

Bisan pa niining maong mga kamatuoran, daghan ang padayong nagbalewala sa paghuboghubog. Bisan pag ilang giila ang makadaot nga mga epekto sa dugayng pag-abuso niini, wala silay nakitang sayop sa panalagsang pagkahubog. Taliwala sa mga batan-on diha sa pipila ka bahin sa kalibotan, ang pagkahubog giisip nga usa ka talagsaong kaugmaran sa kinabuhi. Ug bisan pa sa seryosong mga pasidaan sa mga organisasyon sa panglawas, ang pagpatuyang sa pag-inom, nga gihubit ingong pag-inom ug lima o kapin pang lainlaing mga ilimnon sa usa ka higayon, kusog nga miuswag diha sa mga tawo sa tanang pangedaron. Nan, masabot nga daghang tawo ang naghunahuna kon makadaot ba gayod ang paghuboghubog. Unsay giingon sa Bibliya?

Bino ug Alkoholikong mga Ilimnon​—Mga Gasa Gikan sa Diyos

Ang Bibliya naundan ug daghang reperensiya bahin sa bino ug isog nga mga ilimnon. Si Haring Solomon misulat: “Lakaw, kan-a ang imong pagkaon  uban ang pagmaya ug imna ang imong bino uban ang usa ka maayong kasingkasing, tungod kay ang matuod nga Diyos nakakaplag na ug kahimuot sa imong mga buhat.” (Ecclesiastes 9:7) Giila sa salmista nga si Jehova nga Diyos mao ang Magtatagana sa “bino nga makapalipay sa kasingkasing sa may-kamatayong tawo.” (Salmo 104:​14, 15) Dayag nga ang bino maoy usa sa mga gasa nga gihatag ni Jehova ngadto sa katawhan.

Ang pag-inom ug bino dayag nga giuyonan ni Jesus. Gani, ang iyang unang milagro nalangkit sa paghimo sa tubig nga dekalidad nga bino diha sa usa ka kombira sa kasal. (Juan 2:3-10) Gigamit usab niya ang bino ingong haom nga simbolo sa iyang dugo sa dihang iyang gisugdan ang Panihapon sa Ginoo. (Mateo 26:27-29) Gihisgotan pa gani sa Bibliya ang medisinal nga bili sa bino, tungod kay gidasig ni apostol Pablo si Timoteo sa “pag-inom ug diyutayng bino alang sa [iyang] tiyan.”​—1 Timoteo 5:23; Lucas 10:34.

Ang Pagkamakasaranganon Maoy Gikinahanglan

Matikdi nga si Pablo nagtambag nga moinom lamang ug “diyutayng bino.” Ang Bibliya dayag nga nagsaway sa tanang dili-makasaranganong pag-inom ug alkoholikong ilimnon. Ang Hudiyong mga saserdote libreng makainom ug bino kon wala sa serbisyo basta kasarangan lang. Apan, sila gidid-an sa pag-inom ug bisan unsang alkoholikong ilimnon sa dihang nagahimo sa ilang mga katungdanan sa pagkasaserdote. (Levitico 10:8-11) Katuigan sa ulahi, ang unang-siglong mga Kristohanon gipasidan-an nga ang mga palahubog “dili makapanunod sa gingharian sa Diyos.”​—1 Corinto 6:​9, 10.

Dugang pa, diha sa mga instruksiyon ngadto kang Timoteo, si Pablo nag-ingon nga kadtong manguna diha sa kongregasyon kinahanglang dili ‘mga palahubog nga burokinto’ o “palainom ug daghang bino.” a (1 Timoteo 3:​3, 8) Gani, ang Bibliya nagsugo nga ang dili-mahinulsolong mga palahubog angayng palagpoton gikan sa Kristohanong kongregasyon. (1 Corinto 5:11-13) Sama sa tukmang pagkasulti sa Kasulatan, “ang bino mabiaybiayon.” (Proverbio 20:1) Tungod sa pagkahubog, mahimong sabaan ang nakainom ug madaot ang iyang panghukom.

Kon Nganong Gisaway sa Pulong sa Diyos ang Paghuboghubog

Si Jehova, ‘ang Usa nga nagtudlo kanato aron kita makabaton ug kaayohan,’ nahibalo nga kon abusohan nato ang bisan unsang butang, sa ngadtongadto daoton lang nato ang atong kaugalingon ug ang uban. (Isaias 48:​17, 18) Tinuod kini kon bahin sa pag-inom ug alkoholikong mga ilimnon. Nangutana ang Pulong sa Diyos: “Kinsa man ang may kaalaotan? Kinsa man ang may kabalisa? Kinsa man ang may mga panagkabingkil? Kinsa man ang may kabalaka? Kinsa man ang may mga samad sa walay hinungdan? Kinsa man ang may lubog nga mga mata?” Kini nagtubag: “Kadtong mga nagpabilin ug dugay uban sa bino, kadtong nanulod aron sa pagpangita sa sinagol nga bino.”​—Proverbio 23:​29, 30.

Ilalom sa impluwensiya sa sobrang alkoholikong ilimnon, ang mga tawo nakahimo ug daghang wala-hunahunaa ug peligroso nga mga butang: nagdrayb nga hubog ug busa nagpameligro sa ilang kaugalingon ug sa uban, nahimong sobra ka paraygon sa kapikas sa laing tawo ug nakadaot pag-ayo sa mga relasyon, nakasulti ug nakalihok sa binuangbuang o sa law-ay pa gani nga paagi. (Proverbio 23:33) Ang pag-abuso sa alkoholikong ilimnon tukmang gitawag nga usa sa labing makadaot sa tanang sakit sa katilingban nga mihampak sa katawhan karon. Dili ikatingala nga ang Diyos nag-awhag: “Ayaw pagpakig-uban sa mga labihan ka hinginom ug bino”!​—Proverbio 23:20.

Diha sa Galacia 5:19-21, gilista ni Pablo ang mga paghuboghubog ug mga hudyaka ingong “mga buhat sa unod” nga sukwahi sa mga bunga sa espiritu sa Diyos. Ang pagpatuyang sa alkoholikong ilimnon makadaot sa relasyon sa usa uban sa Diyos. Nan, tin-aw nga ang mga Kristohanon kinahanglang maglikay sa bisan unsang dili-makasaranganong pag-inom ug alkoholikong mga ilimnon.

[Footnote]