Gikan sa Among mga Magbabasa

Pornograpiya Salamat sa seryeng “Pornograpiya​—Makadaot o Dili?” (Hulyo 22, 2003) Gikinahanglan nako ang maong prangka nga tambag. Dugay na akong naladlad sa pornograpiya una pa nahimong Kristohanon. Kining mga artikuloha nakatabang nako nga mas klaro pang masabtan kon unsa kini ka makadaot ug kon unsang determinadong mga lakang ang gikinahanglan aron makalingkawas gikan sa grabeng pagkagiyan niini.

E. P., Tinipong Bansa

Ang akong malipayong kaminyoon nga milungtad ug 22 ka tuig natapos sa diborsiyo duha ka tuig na ang milabay. Ang pornograpiya maoy nakaingon nga ang among pamilya nawad-an ug usa ka maayong bana ug mahigugmaong amahan. Kining mangil-ad nga pagkagiyan nakapausab sa iyang personalidad gikan sa usa nga maluloton ug malumo ngadto sa usa nga masuk-anon, bakakon, ug mananapon. Kaniadto akong gibati nga ako ra ang biktima sa pornograpiya, apan karon ako nakaamgo nga kini maoy usa ka krisis nga nag-apektar sa daghan. Salamat niining maayong pagkasulat nga serye.

L. T., Tinipong Bansa

Sa wala pa magtuon ug Bibliya, ako nagiyan na sa pornograpiya sa kapig napulo ka tuig. Bisan pa sa gisulti sa mga manlalaban niini, wala gayoy positibo bahin niini. Sa wala pa mahimong usa sa mga Saksi ni Jehova, ako nagiyan sa halos tanang matang sa naandang droga. Sa tanang matang sa pagkagiyan nga akong naeksperyensiyahan, ang pornograpiya maoy kinalisorang biyaan. Palihog padayona ang pagpatik ug mga artikulo nga sama niini.

J. A., Tinipong Bansa

Mga Batan-on Nangutana Kinasingkasing akong nagpasalamat kaninyo tungod sa artikulong “Mga Batan-on Nangutana . . . Nganong Bation Ko man nga Kinahanglan Akong Magmahingpit?” (Hulyo 22, 2003) Ako maoy 25-anyos nga bug-os-panahong magwawali. Sukad pa sa pagkabata, akong gitandi ang akong kaugalingon sa akong igsoong babaye ug igsoong lalaki, kinsa upat ka tuig ug tulo ka tuig nga mas magulang nako. Nakigbisog ako sa ubos nga pagtamod sa kaugalingon, nga naghunahunang ako walay pulos. Aron masagubang kining maong mga pagbati, naningkamot ko nga magmahingpit. Kining artikuloha naghubit gayod sa akong pagbati. Gusto nakong itul-id ang akong panghunahuna.

M. Y., Japan

Ako 16 anyos, ug di pa dugayng nadayagnos nga dunay depresyon. Naningkamot ko kanunay nga himoon ang mga butang sa hingpit nga paagi, ug pirme nakong sawayon ang akong kaugalingon sa akong kapakyasan. Kining artikuloha miabot sa tukma gayod nga panahon. Nagsige kog hilak samtang nagbasa niini. Wala gayod ako makaamgo nga daghan pang uban ang nakigbisog sa samang pagbati. Salamat sa seryeng “Mga Batan-on Nangutana.” Ako maikagong nagpaabot sa sunod nga artikulo.

L. S., Tinipong Bansa

Mga Zebra Mussel Ako 12 anyos, ug nalingaw gayod ako sa artikulong “Pirhuwisyong mga Tigdalisayg Tubig.” (Hulyo 22, 2003) Nakadayeg ako sa pagkahibalo nga ang usa ka baye makapatungha ug 500,000 ka itlog sa usa ka tuig ug nga ingon ka daghan sa 700,000 ka kinhason ang masulod sa usa ka metro kuwadrado lang nga luna. Angay gayod natong tahoron ang dagat tungod kay mao kini ang pinuy-anan sa mga zebra mussel ug sa ubang mga linalang. Pinaagi sa pagtahod niini, kita usab nagpakitag pagtahod kang Jehova nga Diyos. Palihog padayona ang pagsulat ug makaiikag nga mga artikulo nga sama niini!

E. T., Italya

Karaang mga Isyu Dili pa dugay ang akong hamtong nga anak nga babaye nadayagnos nga dunay sakit nga Parkinson. Nakakaplag ako ug artikulo bahin niining sakita diha sa Enero 8, 1988, nga isyu sa Pagmata! Ang maong artikulo balikbalik nga gibasa sa among tibuok pamilya, apil na sa akong anak nga babaye. Tungod niini, natabangan kami sa pag-atubang sa among situwasyon sa kalmadong paagi. Bisan tuod kining artikuloha kapin na sa 15 ka tuig sukad nga gipatik, napahimuslan gihapon namo kini. Matag karon ug unya, ang Pagmata! nagtaho bahin sa mga sakit nga wala pa namo madunggi sukad, ug segurado nga kining mga artikuloha nakahatag gayod ug dakong pagdasig niadtong natakboyan nianang mga sakita. Ako kinasingkasing nga nagpasalamat kaninyo tungod sa inyong pagsulat niining mga artikuloha.

E. M., Japan