Gikan sa Among mga Magbabasa

Panahon Ako nagsulat sa pagpasalamat kaninyo sa seryeng “Unsay Nagkahitabo sa Panahon?” (Agosto 8, 2003) Sa dihang nabasa nako ang pamulong nga, “Bisan pa sa tanang kasakitang gipahinabo sa maong mga katalagman, kini mahimong adunay mapuslanong epekto,” ako natingala. Apan sa dihang akong nabasa ang sunod nga tudling-pulong, “Kana makapalihok sa mga tawo sa pagpasundayag sa gugma ug pagkamahunahunaon alang sa ilang mga silingan,” kinahanglang mouyon ko. Kada adlaw kita nag-atubang sa tanang matang sa kasakitan​—ug dili lamang sa mga katalagman. Gusto nakong hinumdoman nga bisan unsay mahitabo, kana mahimong aduna say mapuslanong epekto.

S. T., Japan

Hinabang Panahon sa Katalagman Nabasa nako ang artikulong “Butang nga Dili Mabanlas sa Bagyo.” (Agosto 8, 2003) Ang paagi nga giatubang sa mga Saksi ni Jehova ang mga emerhensiya nga gipahinabo sa kinaiyanhong mga katalagman nagtukmod kanako sa pagpabili pa sa pagkahimong bahin niining organisasyona. Salamat sa pagpatik ug mga artikulo nga sama niini, nga motabang kanamo sa pagpasundayag ug mga hiyas nga dili mabanlas sa bagyo.

M. P., Italya

Nakasinati ko mismo ug daghang katalagman, lakip na sa mga baha ug mga linog. Namalaybalay ko sa dihang mihapak ang usa ka linog niadtong 1989. Usa ka 14-anyos nga batan-ong lalaki nga kauban nako misugod pagdagan tungod sa kahadlok! Ako siyang gikuptan ug nag-ampo ko nga mokalma siya. Sulod sa pipila ka segundo, ang mga poste sa koryente nangatumba sa among palibot. Ang mga tawo nangahadlok! Ang akong balay adunay dako, lawom nga liki diha sa salog nga semento. Apan nianang hapona mismo mibalik mi sa pagpamalaybalay, nga mitabang sa uban sa pagsagubang. Kining artikuloha nakapahinumdom gayod nako sa akong naeksperyensiyahan!

B. S., Tinipong Bansa

Daghang salamat sa pagpatik ug makapadasig nga mga artikulo sama sa “Butang nga Dili Mabanlas sa Bagyo.” Naghilak ko samtang nagbasa niana. Segurado nga walay bagyo nga makabanlas sa atong gugma alang sa atong mga isigka-Kristohanon ug sa dili-mahakogong gugma nga atong nabatonan alang sa atong mga silingan.

I. A., Japan

Pag-abuso sa Droga Daghan kaayong salamat sa seryeng “Pag-abuso sa Droga Diha sa Pamilya​—Unsay Imong Mahimo?” (Abril 8, 2003) Taudtaod na kong nagtuon sa Bibliya uban sa mga Saksi ni Jehova, apan wala ko mouswag sa espirituwal tungod niining problemaha. Sa pagkabasa nako sa kahon nga “Tabang Aron Maulian ang mga Tig-abuso sa Droga,” akong naamgohan nga ang pagbasa sa Bibliya adlaw-adlaw ug pagpadapat sa mga prinsipyo niini motabang kanako sa akong mga paningkamot nga maulian. Dugang pa, ang pagkahibalo nga ang Diyos may pagtagad gayod kanako dako ug epekto kanako.

R.S.A., Brazil

Napit-osang mga Bata Gusto nakong magpasalamat pag-ayo sa seryeng “Mga Bata​—Dali ra ba Silang Nahamtong?” (Abril 22, 2003) Mao gyod niy akong gipangita. Ingong nag-inusarang inahan ug bug-os-panahong tig-ebanghelyo, lisod kaayo ang akong eskedyul. Sagad maghunahuna ko, ‘Maayo ba akong inahan? Sobra ra ba ang akong gikinahanglan gikan sa akong anak nga babaye?’ Makapahupay ang pagkahibalo kon unsay akong angayng pauswagon. Gusto nakong matagamtam karon ang panahon sa pagkabata sa akong anak, ug gusto nakong matagamtam usab niya kini. Bisan tuod napalig-on ako sa tanan ninyong mga artikulo, ang mga artikulo nga sama niini nakapadasig gayod kanako.

M.D.E., Mexico

Usa ka Bata Nangita sa Diyos Ako 11 anyos. Akong gibasa ang artikulong “Gusto Ko nga Masayod pa ug Dugang Bahin Kang Jehova.” (Abril 22, 2003) Nadasig ko sa pagkahibalo nga ang usa ka batang babaye nga magulang lang nakog usa ka tuig naningkamot sa pagtuon bahin kang Jehova. Karon gusto nakong mogawas ug mosangyaw ngadto sa uban.

Y. T., Japan