Gikan sa Among mga Magbabasa

Dala-sa-Insekto nga mga Sakit Ako usa ka magtutudlo sa usa ka unibersidad ug nangulo sa mga laboratoryo sa mikrobiolohiya, parasitolohiya, ug biokemistriya didto sulod sa miaging 24 ka tuig. Gisaysay ninyo sa simpleng paagi ang siyentipikanhong mga ulohan! Naikag ako sa seryeng “Sa Dihang ang mga Insekto Magpakaylap ug mga Sakit.” (Mayo 22, 2003) Usahay may mga punto diha sa siyentipikanhong mga tun-anan nga dili nako masabtan. Apan sa dihang gisaysay ninyo kanang mga puntoha, nasabtan dayon nako kana. Salamat sa inyong mga paghago.

M. R., Mexico

Pagpangopya Salamat sa artikulong “Mga Batan-on Nangutana . . . Unsay Daotan sa Pagpangopya?” (Enero 22, 2003) Ang akong mga isigkaestudyante nagtanyag kanakog dagkong kantidad sa salapi kon akoy mokuhag mga pasulit alang nila. Ang akong pagdumili sa paglimbong para nila nasaypan ingong pagkadili-makataronganon. Ang artikulo nagpahinumdom kanako sa pagsunod sa mga sukdanan sa Diyos ug dili gayod mokompromiso.

F.A.C., Nigeria

Wala pa ako makahimo sukad ug akong kaugalingong homwork kondili mangopya lang sa akong mga klasmet. Kining artikuloha nakatabang kanako sa pagsabot nga ang pagpangopya sama rag pagpangawat. Ug bisan tuod wala moangay ang akong mga eskolmet niining hunahunaa, wala ko magpadala nila.

Y. D., Rusya

Trolleybus Ako nagpuyo ug nagtrabaho sa Italya, ug mapasalamaton kaayo ako sa usa ka babaye nga Saksi ni Jehova kinsa tigdala kanako ug mga magasin ninyo sa pinulongang Ruso. Nabasa ko ang artikulong “Usa ka Pagbiyahe sa Kinatas-ang Ruta sa Trolleybus sa Kalibotan.” (Marso 22, 2003) Naghisgot kini bahin sa baybayon sa Crimea sa Ukraine, diin ako nagpuyo kaniadto. Nalipay kaayo ako sa pagbasa niining mubo apan makaiikag nga estorya bahin sa dapit nga akong gigikanan.

Z. B., Italya

Diabetes Sa dihang nabasa ko ang seryeng “Pagsagubang sa Diabetes” (Mayo 8, 2003) ug nahibaloan nga ang kanunayng pagpangihi maoy usa ka simtoma, gihunahuna nako nga basin ako adunay diabetes. Busa miadto ako sa ospital ug akong nasayran nga ako may diabetes. Kapig usa ka bulan na ang milabay human sa akong pagpahiling, ug ako karon naningkamot sa pagpaus-os sa sukod sa asukar sa akong dugo pinaagi sa mga tambal, pagdiyeta, ug pag-ehersisyo. Kon wala nako mabasa ang magasin, basin wala nako madiskobrehi nga aduna akoy diabetes.

Y. N., Japan

Dili ako usa sa mga Saksi ni Jehova, apan nadawat ko ang inyong mga magasin gikan sa usa ka maayong silingan. Nalingaw kaayo ako sa pagbasa sa serye bahin sa diabetes. Sanglit ako nagtuon sa pagkanars sa mga tigulang, kinahanglan kong mohimog usa ka sinulat bahin sa diabetes. Kon sayosayo ko pa nga nadawat ang magasin, wala na unta ko magsusi sa daghan kaayong mga libro! Dako kaayong tabang ang inyong mga artikulo.

A. S., Alemanya

Mga Wati Nakadayeg ako sa artikulo nga “Ang Makaiikag nga Kalibotan sa mga Wati.” (Mayo 8, 2003) Naminaw ko sa usa ka estasyon sa radyo sa among dapit sa dihang gihisgotan ang mga wati. Gikuha dayon nako ang akong kopya sa Pagmata! ug gibuksan kini sa maong artikulo. Nahingangha ako sa dihang ang magsisibya sa radyo nagkutlo gikan sa maong isyu. Kana nagpakita kanako nga ang Pagmata! mapuslanon bisan asa sa kalibotan.

F. B., Nigeria

Nahingangha ako sa pagkasayod nga adunay 1,800 ka espisye sa wati. Gihunahuna nako nga kon dili pa tungod sa pagbugwal sa yuta nga gihimo niining mga wati, kita magbugwal ug gahing yuta sa tibuok adlaw. Hinuon, dili ko makaingon nga ganahan na kaayo ko ug mga wati, apan naapresyar ko ang ilang bili.

Y. N., Japan