Gikan sa Among mga Magbabasa

Mga Siyudad Ako 13 anyos, ug nalingaw ko sa pagbasa sa mga artikulo nga “Madrid​—Kaulohan nga Gitukod Alang sa Usa ka Hari” (Hunyo 22, 2003), “Barcelona​—Walay-Atop nga Museyo nga May Nagkadaiyang Adorno ug Estilo” (Hulyo 8, 2003), ug “Seville​—Usa ka Ganghaan Ngadto sa Kayutaan sa Amerika” (Hulyo 22, 2003). Ingong usa ka Katsila nga nagpuyo sa Alemanya, nalipay ko nga makabasa ug mga artikulo bahin sa akong yutang natawhan. Palihog padayona ang pagsulat sa maong mga artikulo.

C.G.R., Alemanya

Ganahan ko kanunay nga mobasa ug Pagmata! apan ang mga artikulo bahin sa lainlaing nasod ug siyudad mao ang akong nagustohan pag-ayo. Nalingaw kaayo ko sa pagbasa sa mga artikulo bahin sa mga siyudad sa Espanya. Ug nalipay kaayo ko sa pagkakita sa artikulo nga “St. Petersburg​—Ang ‘Bentana nga Pinaagi Niini Makalantaw ang Rusya sa Uropa.’” (Agosto 22, 2003) Gusto kaayo ko nga makakita sa nindot nga mga dapit niini ug sa hayag nga kagabhion niini. Tungod sa maong artikulo, daw nakaduaw ako didto.

O.A.V., Rusya

Mga Insekto Mapasalamaton kaayo ako sa serye nga “Sa Dihang ang mga Insekto Magpakaylap ug mga Sakit,” nga adunay kahon nga “Ang mga Insekto Magpakaylap bag HIV?” (Mayo 22, 2003) Sa pipila ka tuig na karon, ako nagpuyo sa usa ka siyudad nga daghag lamok panahon sa ting-init. Kanunay akong mahadlok nga matakboyan ug virus sa HIV. Tungod sa inyong artikulo, dili na ko mabalaka bahin niana karong ting-init!

J. L., Albania

Gikan sa Among mga Magbabasa Ganahan kaayo kong mobasa sa lindog nga “Gikan sa Among mga Magbabasa.” Usahay gamiton nako ang mga komento gikan sa mga magbabasa aron awhagon ang akong mga gitun-an sa Bibliya sa paghatag ug linaing pagtagad sa pipila ka artikulo. Ang lindog nagpakita nga ang inyong mga paningkamot sa pagtandog sa kasingkasing sa mga tawo wala makawang.

S. A., Rusya

Pagkatulog Sa dihang gisugdan nakog basa ang serye nga “Igo ba ang Imong Katulog?” (Marso 22, 2003), wala na nako kini lung-i. Sukad sa batan-on pa ako, kasagarang duha o tulo ka oras lang ang akong katulog kada gabii. Tungod niining magasina, nakita nako ang panginahanglan nga magpadoktor.

W. A., Taiwan

Tubig Ang akong trabaho nalangkit sa nutrisyon ug pagkontrolar sa timbang sa lawas, ug ang artikulong “Bililhong Likido sa Kinabuhi​—Tubig” mao gayod ang akong gikinahanglan. (Hunyo 8, 2003) Sa usa lang ka artikulo, nasaysay ninyo sa mubo ang dagkong mga punto nga akong nakat-onan sa 30-oras nga kurso sa nutrisyon. Nagplano ko nga gamiton kining impormasyona sa pagtabang sa akong mga kliyente.

J.F.S.F., Brazil

Postpartum Depression Niadtong Abril, ang akong bana ug ako nahimong mga ginikanan. Human mahimugso ang among anak nga lalaki, nasinati ko ang mga butang nga gihubit sa artikulo nga “Pagsabot sa Postpartum Depression.” (Hunyo 8, 2003) Ang tanan miingon kanako nga matahom kaayo ang among anak, apan dili gani ko gusto nga makakita kaniya. Nagpondo ra ko sa balay ug naghilak. Human nako mabasa ang artikulo, gihalog nako ang akong bana ug gipahungaw ang akong mga pagbati ngadto kaniya. Nalipay siya sa pagkasabot sa hinungdan sa mga kausaban nga nakita niya kanako. Mapasalamaton ako kaninyo sa pagsulat bahin niining ulohana uban ang nahiangay nga taktika. Natandog ninyo ang akong kasingkasing.

S. V., Italya

Tour de France Gipili nako ang ulohan bahin sa mga bisikleta alang sa usa ka proyekto sa eskuylahan. Ang artikulong “Ang Tour de France​—100 ka Tuig sa Kinalabwang Lumba sa Bisikleta” (Hulyo 8, 2003) migula sa hustong panahon! Gibasa pa gani nako ang akong sinulat atubangan sa klase. Daghan na kog nagamit nga mga artikulo gikan sa Pagmata! alang sa akong mga asaynment. Daghang salamat.

N. K., Alemanya