Ang Hunahuna sa Bibliya

Nganong Lantawon nga Sagrado ang Kaminyoon?

DAGHANG tawo karon ang lagmit moangkon nga nagtuo sila sa pagkasagrado sa kaminyoon. Apan, nganong daghan man kaayong kaminyoon ang misangko sa diborsiyo? Alang sa uban, ang kaminyoon maoy usa lang ka romantikong saad o usa lang ka legal nga kasabotan. Ug gihunahuna nila nga ang maong mga saad mahimo rang pakyason. Ang mga tawo nga naglantaw sa kaminyoon niining paagiha magdesisyon dayon sa pagtapos sa ilang kaminyoon sa dihang may mga suliran.

Unsay panglantaw sa Diyos bahin sa kahikayan sa kaminyoon? Ang tubag makaplagan sa iyang Pulong, ang Bibliya, diha sa Hebreohanon 13:4: “Himoa nga dungganon ang kaminyoon taliwala sa tanan.” Ang Gregong pulong nga gihubad “dungganon” nagpasabot ug usa ka butang nga gipabilhan ug gitamod pag-ayo. Kon gipabilhan nato ang usa ka butang, atong ampingan nga mapreserbar kana ug dili kana mawala, bisan sa wala tuyoa. Tinuod usab kana sa kahikayan sa kaminyoon. Angayng lantawon sa mga Kristohanon ang kaminyoon ingong dungganon​—ingong usa ka butang nga bililhon nga buot nila nga ampingan.

Dayag nga gimugna ni Jehova nga Diyos ang kaminyoon ingong usa ka sagradong kahikayan tali sa bana ug asawa. Apan sa unsang paagi nato ikapakita nga susama kaniya ang atong panglantaw bahin sa kaminyoon?

Gugma ug Pagtahod

Aron mapasidunggan ang kahikayan sa kaminyoon, ang mga magtiayon kinahanglang magpasidungog sa usag usa. (Roma 12:10) Ang apostol nga si Pablo misulat sa unang-siglong mga Kristohanon: “Kinahanglang higugmaon gayod sa matag usa ang iyang asawa sama sa iyang kaugalingon; sa laing bahin, ang asawa angay nga adunay halawom nga pagtahod sa iyang bana.”​—Efeso 5:33.

 Tinuod, may mga panahon nga ang usa ka kapikas dili mogawi sa labing mahigugmaon o matinahoron nga paagi. Bisan pa niana, ang mga Kristohanon angayng magpakita niana nga gugma ug pagtahod. Si Pablo misulat: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.”​—Colosas 3:13.

Panahon ug Atensiyon

Ang mga magtiayon nga naglantaw nga sagrado ang ilang kaminyoon mogahin ug panahon sa pagtagbaw sa pisikal ug emosyonal nga mga panginahanglan sa usag usa. Naglakip kini sa seksuwal nga relasyon. Ang Bibliya nag-ingon: “Ihatag sa bana ngadto sa iyang asawa ang nahiangay kaniya; apan buhaton usab sa asawa ang sama ngadto sa iyang bana.”—1 Corinto 7:3.

Apan, gibati sa ubang magtiayon nga ang bana kinahanglang temporaryong mopuyo sa laing lugar aron mokita ug mas dako. Usahay, ang ilang panagbulag wala damhang milungtad ug taas kaayo nga panahon. Kasagaran, ang maong mga panagbulag nakadaot sa kaminyoon, nga usahay motultol sa pagpanapaw ug diborsiyo. (1 Corinto 7:​2, 5) Tungod niana, daghang Kristohanong magtiayon ang mihukom sa pagsalikway sa materyal nga mga bentaha inay kay ibutang sa peligro ang kaminyoon nga gilantaw nila nga sagrado.

Sa Dihang Motungha ang mga Problema

Kon motungha ang mga suliran, ang mga Kristohanon nga may pagtahod sa ilang kaminyoon dili dayon makigbulag o makigdiborsiyo. (Malaquias 2:16; 1 Corinto 7:​10, 11) Si Jesus nag-ingon: “Ang matag usa nga nagdiborsiyo sa iyang asawa, gawas kon tungod sa pakighilawas, magladlad kaniya sa pagpanapaw, ug si bisan kinsa nga magminyo sa gidiborsiyohan nga babaye makapanapaw.” (Mateo 5:32) Ang pagdesisyon sa pagdiborsiyo o pagbulag sa dihang ang usa ka magtiayon walay Kasulatanhong mga pasukaranan magdaot sa dungog sa kaminyoon.

Ang atong panglantaw bahin sa kaminyoon mapadayag usab pinaagi sa mga tambag nga atong ihatag niadtong may seryosong mga problema sa kaminyoon. Mosugyot ba dayon kita ug pagbulag o diborsiyo? Tinuod, may mga higayon nga ang pagbulag mahimong balido, sama sa dihang may grabeng pagdagmal o tinuyong dili pagsuporta sa materyal. a Ug, sama sa gihisgotan sa itaas, ang Bibliya nagtugot lamang sa diborsiyo kon ang usa ka kapikas sad-an sa pakighilawas. Apan, ang mga Kristohanon dili maghinobra sa pag-impluwensiya sa desisyon sa uban maylabot sa maong mga kahimtang. Kon buot hunahunaon, ang tawo nga may problema sa kaminyoon​—dili ang usa nga naghatag ug tambag​—ang mag-antos sa mga sangpotanan sa gihimong desisyon.​—Galacia 6:​5, 7.

Likayi ang Dili-Mapabilhon nga Panglantaw

Sa pipila ka dapit, nagkadaghan ang mga tawo nga magminyo lang aron legal nga makapuyo sa laing nasod. Ang maong mga tawo kasagarang mohimog mga kahikayan sa pagbayad sa usa ka lungsoranon sa maong nasod aron minyoan sila. Kasagaran, kini nga mga paris, bisan kasado, dili mag-ipon pagpuyo, ug basin wala ganiy mahigalaong relasyon. Human dayon makuha ang gitinguhang legal nga pagpuyo, sila magdiborsiyo. Ilang gilantaw ang ilang kaminyoon ingong usa lang ka kasabotan sa negosyo.

Ang Bibliya wala mouyon sa maong dili-mapabilhon nga panglantaw. Bisan unsa pay ilang mga motibo, ang mga tawo nga maminyo mosulod sa usa ka sagradong kahikayan nga giisip sa Diyos nga molungtad sa tibuok kinabuhi. Ang matag paris sa maong mga kasabotan pabiling nahiusa isip bana ug asawa, ug dili mahimong magminyo pag-usab kon walay Kasulatanhong pasikaranan sa diborsiyo.​—Mateo 19:​5, 6, 9.

Sama sa ubang mapuslanong mga pangagpas, ang usa ka malamposong kaminyoon nagkinahanglan ug paningkamot ug paglahutay. Kadtong walay pagpabili sa pagkasagrado niini motapos ra dayon niini. O basin antoson na lang nila ang usa ka dili-malipayong kaminyoon. Sa laing bahin, kadtong nag-ila sa pagkasagrado sa kaminyoon nasayod nga gidahom sa Diyos nga sila magpabiling nahiusa. (Genesis 2:24) Nakaamgo usab sila nga pinaagi sa paghimo sa ilang kaminyoon nga malinawon, sila nagpasidungog kaniya ingong ang Tigmugna sa kahikayan sa kaminyoon. (1 Corinto 10:31) Kini nga panglantaw nagtukmod kanila sa paglahutay ug sa paghimo sa ilang kaminyoon nga malamposon.

[Footnote]