Gikan sa Among mga Magbabasa

Pagdaogdaog Ang akong siyete-anyos nga anak nga babaye miingon kagabii nga dili na siya buot mobalik sa tunghaan tungod kay may duha ka batang babaye nga kanunayng manghasi kaniya. Gisugdan ko pagbasa ang serye nga “Pagdaogdaog​—Unsay Imong Mahimo Niini?” (Agosto 22, 2003) Kining mga artikuloha nakatabang kanako​—dili lang sa pag-abag sa akong anak kondili sa pagsabot usab kon nganong ang mga tawo mogawi sa usa ka paagi.

L. H., Tinipong Bansa

Sa akong trabahoan, ako gimakmakan ug law-ayng mga sinultihan, gipakaulawan atubangan sa mga isigkatrabahante, ug gibalewala sa usa sa akong mga amo hangtod nga mipahawa ako sa trabaho. Nasakitan gihapon ko pag-ayo sa maong panghitabo. Apan, human mabasa ang mga artikulo, miarang-arang ang akong gibati, kay nasayod nga adunay nakasabot kanako.

H. N., Japan

Ang pagbasa niining mga artikuloha nahisamag pagtan-awg-balik sa akong kagahapon. Sa nagtungha pa ako, gidaogdaog ko kada adlaw. Nahibulong ko kon ngano. Kini nga serye nakatabang kanako sa pagkasabot, ug nahupayan ko tungod niana.

M. M., Japan

Gitratar ko nga morag sinalikway sa tunghaan, ug miubos pag-ayo ang akong pagtamod sa kaugalingon. Gitudloan ko nga kataw-an lang ang akong mga magsasakit, apan husto kamo sa pag-ingon nga mas maayong tan-awon sila sa mata ug saysayan sa kalmadong paagi nga dili kadto makapahimuot.

M. G., Pransiya

Angkonon ko nga dili sayon alang kanako ang pagbasa sa mga artikulo bahin sa pagdaogdaog tungod kay biktima ako sa pisikal, binaba, ug dili-direkta nga pagdaogdaog panahon sa akong pagkabatan-on ug pagkahamtong. Human mabasa ang mga artikulo, nasabtan ko na kon nganong ako nakasinatig negatibong mga panghunahuna ug kawalay-pagtahod sa kaugalingon. Busa buot kong magpasalamat alang niining mga artikuloha, nga naghatag ug praktikal ug makapahupay nga tambag.

A. M., Italya

Ang pagdaogdaog maoy usa ka suliran nga akong gipakigbisogan kada adlaw sukad ako naghayskul. Kining mga artikuloha nagtabang kanako sa pagsabot nga dili tinuod nga ako walay bili tungod kay membro ako sa usa ka minoriya nga relihiyon. Samtang nagkadugay, mas mapasigarbohon ako sa pagkahimong usa sa mga Saksi ni Jehova, ug malipay ko bisan kon kinahanglan akong mag-antos tungod niana. Masuko ko kaniadto. Karon nahibalo na ko kon unsay himoon, ug segurado ko nga moarang-arang ang kahimtang.

M. S., Italya

Ang akong kaluha ug ako maoy 16 anyos, ug klasmet mi sa tunghaan. Ang among mga klasmet nasayod nga kami mga Saksi ni Jehova, ug atakehon nila kami kanunay. Ang ulohan bahin sa pagdaogdaog gipresentar sa praktikal kaayo nga paagi, ug kini nagdasig pag-ayo kanamo.

E. P., Italya

Nakahilak ako sa dihang nabasa ko ang mga artikulo, tungod kay nahinumdom ko sa tanang butang nga gipahamtang kanako sa kanhi nakong mga eskolmet matag adlaw sulod sa unom ka tuig. Sa batan-on pa, naghunahuna gayod ako nga ako ray nag-antos sa maong mga butang. Wala gani ko masayod nga kining maong sikolohikal nga pagpanghadlok maoy pagdaogdaog. Karon nga ako usa na ka hingkod nga dalaga, labaw na akong mapasalamaton sa pagkasayod bahin niining sulirana. Gibati ko nga aduna nay nakasabot kanako!

A. P., Alemanya

Nag-antos ko ug daghan kaayong kalisdanan sa tunghaan nga usahay dili na ko buot nga moadto didto. Apan, kining mga artikuloha nagtabang kanako sa pagsusi pag-usab sa akong kahimtang, ug naghatag kinig maayong mga tambag. Gipadapat ko ang pipila ka mga sugyot nga gihisgotan, ug nakatabang na kini. Salamat sa maong makapadasig ug mapuslanon nga mga artikulo.

M. T., Rusya