Usa ka Bag-ong Nawong Alang Kang Mailyn
Usa ka Bag-ong Nawong Alang Kang Mailyn
SUMALA SA GIASOY SA INAHAN NI MAILYN
Nganong si Mailyn, ang akong matahom nga 11-anyos nga anak nga babaye, nanginahanglan man ug usa ka bag-ong nawong? Pasaysaya ko.
Si Mailyn maoy ikaduha sa akong duha ka anak nga babaye. Siya natawo sa Holguín, Cuba, sa Agosto 5, 1992. Ang iyang amahan, iyang igsoong babaye, ug ako nalipay pag-ayo sa dihang siya natawo. Apan wala magdugay ang among kalipay. Pipila ka adlaw human siya matawo, gihangga ako, ug usa ka bulan sa ulahi, natakdan si Mailyn.
Sa sinugdan, morag dili kaayo grabe ang iyang kahimtang; apan migrabe kadto, ug kinahanglan siyang dalhon sa ospital. Giatiman pag-ayo si Mailyn sa ospital, apan mihuyang pag-ayo ang iyang sistema sa imyunidad nga siya natakboyan ug impeksiyon. Namatikdan nako ang usa ka katingad-ang pagpamula sa usa ka kilid sa iyang gamayng ilong. Nahibal-an sa mga doktor nga ang hinungdan mao ang usa ka talagsaon, isog kaayo nga matang sa bakterya.
Bisan pa sa mga antibiotiko nga dihadihang gidapat, sa pipila lang ka adlaw, ang bakterya nagsugod sa pagkutkot sa iyang nawong. Sa panahong napukgo kadto sa mga doktor, si Mailyn halos nawad-an na sa iyang ilong, mga ngabil, ug mga bahin sa iyang lagos ug suwang. Aduna usab siyay mga lungag sa kilid sa usa ka mata.
Sa dihang ang akong bana ug ako nakakita kaniya, kami nakahilak. Nganong nahitabo man ang ingon niini sa among bata? Si Mailyn didto sa intensive care unit sulod sa ubay-ubayng adlaw, ug ang mga doktor nagtuo nga dili siya mabuhi. Ang akong bana kanunayng moingon kanako, “Andama ang imong kaugalingon engkaso nga mamatay siya.” Apan, sa dihang ibutang ko ang akong kamot sulod sa inkubetor aron hawiran ang gamayng kamot ni Mailyn, iyang kuptan pag-ayo ang akong kamot nga nasayod ko nga mabuhi pa siya. Giingnan ko ang akong bana: “Dili mamatay ang atong anak. Apan sa iyang kahimtang, unsang matanga sa kinabuhi ang mabatonan ni Mailyn?” Matag buntag inigmata namo, maghunahuna mi nga basin damgo lang kadtong tanan.
Samtang atua kami sa ospital, ang among mas magulang nga anak nga babaye, si Maydelis, nga sayis anyos niadto, nagpuyo uban sa akong mga ginikanan. Naghinamhinam siyang nagpaabot sa pagpauli sa iyang gamayng manghod. Nakita niya si Mailyn nga mibiya sa balay ingong usa ka matahom nga “monyeka” nga adunay dagkong asul nga mga mata. Apan sa sunod higayong nakita ni Maydelis ang iyang masuso nga igsoon, si Mailyn makahahadlok nang tan-awon.
‘Nganong Kinahanglan Mang Mag-antos Pag-ayo ang Akong Anak?’
Human sa usa ka bulan ug tunga sa ospital, si Mailyn gipagawas. Wala mi mobalik sa among balay sa siyudad tungod kay dili mi buot nga may makakita kaniya. Gilain namo ang among kaugalingon diha sa usa ka gamayng balay sa banika, tupad sa umahan sa akong mga ginikanan.
Sa sinugdan, makahatag ko kang Mailyn ug diyutayng gatas gikan nako nga ipaagi sa lungag diha sa iyang nawong diin nahimutang kaniadto ang iyang baba. Dili siya makasupsop. Apan, sa dihang ang mga samad nagsugod pagkaalim, kana nga lungag halos mikipot na. Kahatagan ko lang siya ug mga pagkaon nga gihimong likido nga ibutang sa botelya. Sa dihang siya nag-edad ug usa ka tuig, namalik mi sa Holguín, diin ang mga doktor naghimog upat ka operasyon aron padak-on ang lungag.
Mangutana ko kaniadto sa akong kaugalingon, ‘Nganong kinahanglan mang mag-antos pag-ayo ang akong anak?’ Nangita ko sa tubag gikan sa mga espiritista ug nag-ampo sa akong relihiyosong mga imahen. Apan walay nakapahupay nako. Ang masakit nga mga sulti sa pipila ka paryente ug mga higala nakapasamot sa akong kalibog. Ang pipila miingon, “Nasayod ang Diyos kon nganong iyang gitugotan kining mga butanga.” Ang uban miingon kanako, “Silot gayod kini gikan sa Diyos.” Kanunay usab akong mabalaka kon unsay akong isulti kang Mailyn inigdako na niya. Kas-a, dihang siya gamay pa kaayo, si Mailyn nangutana sa iyang amahan, “Nganong wala man koy ilong sama sa uban?” Ang iyang amahan dili makatubag ug migawas aron sa paghilak. Gisulayan ko sa pagsaysay kaniya ang nahitabo. Nahinumdom pa siya nga moingon ako nga usa ka gamayng insekto ang mikaon sa iyang ilong ug baba.
Usa ka Pasikaranan sa Paglaom
Sa diha gayong mibati ako ug hilabihang kahigawad, nahinumdom ko nga ang akong silingan maoy usa sa mga Saksi ni Jehova. Gihangyo ko siya sa pagpakita kanako gikan sa Bibliya kon nganong gitugotan sa Diyos ang akong gamayng anak nga mag-antos pag-ayo. Nangutana sab ko, “Kon kini nga sakit mao gayoy silot gikan sa Diyos tungod sa butang nga akong nahimo, nganong si Mailyn man ang kinahanglang mag-antos niana?”
Ang akong silingan misugod sa pagtuon sa Bibliya uban kanako, ginamit ang librong Ikaw Mabuhing Walay Kataposan sa Paraiso sa Yuta. a Inanay nakong nasabtan nga ang Diyos dili angayng basolon sa nahitabo kang Mailyn ug nga siya nahingawa gayod kanato. (Santiago 1:13; 1 Pedro 5:7) Misugod ko sa pagpabili sa kahibulongang paglaom nga ilalom sa pagmando sa iyang langitnong Gingharian diha sa mga kamot ni Jesu-Kristo, ang kasakit pagawad-on na. (Mateo 6:9, 10; Pinadayag 21:3, 4) Kini nga kahibalo nagpalig-on kanako ug nagtukmod kanako sa pagtambong sa Kristohanong mga panagkatigom sa mga Saksi ni Jehova. Sa una, ang akong bana wala moangay sa akong bag-ong espirituwal nga kaikag. Apan, wala niya ako pugngi sa pagtuon sa Bibliya, basta lang nga makatabang kini kanako nga masagubang ang among kagul-anan.
Tabang Gikan sa Laing Nasod
Sa dihang si Mailyn nag-edad ug dos anyos, usa ka inilang plastic surgeon sa Mexico ang nakahibalo bahin sa iyang kahimtang ug mitanyag sa pag-opera kaniya nga walay bayad. Ang unang mga operasyon gihimo sa 1994. Si Mailyn ug ako miestar sa Mexico ug duolan sa usa ka tuig. Sa sinugdan, wala kami makakontak sa mga Saksi ni Jehova, busa wala kami makatambong sa Kristohanong mga tigom. Kini nakapaluya nako sa espirituwal. Dayon, usa sa mga Saksi didto mikontak
namo, ug misugod na usab kami sa pagpakig-uban sa mga isigkamagtutuo nga subsob sumala sa among maarangan. Sa pagbalik sa Cuba, gipadayon ko ang akong pagtuon sa Bibliya ug naulian sa espirituwal.Niadtong panahona, ang akong bana dili gihapon interesado sa Bibliya. Sa paningkamot nga mapukaw ang iyang interes, misugod ko paghangyo kaniya sa pagbasa kanako sa pipila ka bahin sa binase-sa-Bibliya nga mga publikasyon aron mas masabtan nako kadto. Ngadtongadto napalihok siya sa pagtuon sa Bibliya, kay siya nabalaka nga ang balikbalik nga dugayng pag-estar sa Mexico basin makadaot sa relasyon sa among pamilya. Gihunahuna niya nga ang pagbaton ug samang espirituwal nga interes makatabang namo nga mas maagwanta kining mga yugto sa panagbulag. Ug nakatabang gayod kadto. Ang akong bana, akong kinamagulangang anak, ug ako nabawtismohan ingong mga Saksi ni Jehova niadtong 1997.
Panahon sa pipila namo ka pag-estar sa Mexico, si Mailyn moingon nga kon wala pa kan-a sa gamayng insekto ang iyang nawong, dili unta kami mahimulag gikan sa iyang papa ug iyang igsoon. Makapaguol gayod nga kinahanglang magbulag pagpuyo ang pamilya sulod sa tag-as nga mga yugto. Apan, nahinumdom ko sa usa ka pagduaw ngadto sa sangang buhatan sa mga Saksi ni Jehova sa Mexico, nga gitawag ug Bethel, nga nakadasig pag-ayo namo. Si Mailyn nag-ingon nga dili na siya buot nga magpaopera pag-usab—ang ikalimang operasyon panahon niadto nga pag-estar—tungod kay sakit kaayo ang proseso sa pagpaalim. Apan giingnan siya sa pipila ka Saksi nga nag-alagad sa sangang buhatan nga kon magmaisogon siya ug tugotan ang mga doktor sa pag-opera, sila maghimog usa ka salosalo alang kaniya iniggawas niya sa ospital. Busa miuyon siya nga magpaopera.
Pasaysaya si Mailyn sa iyang gibati: “Nagustoan ko kaayo ang ideya bahin sa usa ka salosalo didto sa Bethel. Busa nagmaisogon gayod ako panahon sa operasyon. Bibo ang salosalo, nga may daghan kaayong espirituwal nga mga igsoong lalaki ug babaye. Gihatagan ko nila ug daghang kard, nga ania gihapon kanako. Ang pagdasig nga akong nadawat naghatag kanakog kusog sa pag-agwanta sa sunod nga mga operasyon.”
Pag-uswag ug Tabang sa Pag-agwanta
Si Mailyn, nga karon 11 anyos, nakaagi nag 20 ka operasyon aron ayohon ang iyang nawong. Bisag kadto nakatabang gayod kaniya, dili gihapon niya mabuka pag-ayo ang iyang baba. Apan, siya kanunayng adunay maisogon ug positibo nga tinamdan. Nagpakita usab siyag dakong pagpabili sa espirituwal nga mga butang. Sukad sa edad nga sayis anyos, siya nagpatala na sa Teokratikanhong Tunghaan sa Ministeryo sa among lokal nga kongregasyon, ug siya nabawtismohan sa Abril 27, 2003. Dihay panahon nga nakadumala siyag tulo ka pagtuon sa Bibliya. Kas-a, samtang didto sa Mexico, siya nakigsulti sa usa ka lalaki nga miuyon sa pagtuon sa Bibliya uban niya. Gidapit siya ni Mailyn sa Memoryal sa kamatayon ni Kristo ug sa ubang mga tigom sa kongregasyon, nga gitambongan sa lalaki nga may dakong kaikag.
Sa dihang si Mailyn mosangyaw sa balaybalay, ang ubang mga tawo motan-aw sa iyang nawong ug mangutana kaniya kon siya ba nasunog. Pahimuslan ni Mailyn ang maong higayon sa pagpaambit sa iyang binase-sa-Bibliya nga paglaom nga si Jehova maghatag kaniyag bag-ong nawong sa umaabot nga Paraiso.—Lucas 23:43.
Ang kasakit nga giantos ni Mailyn gikan sa mga operasyon ug gikan sa mga pagbiaybiay sa ubang mga bata dili mabatbat. Unsay nakatabang niya sa pag-agwanta? Si Mailyn mitubag nga may pagsalig: “Si Jehova tinuod kaayo kanako. Gihatagan ko niya ug kusog ug kaisog aron makaagwanta. Dili na ako gusto ug dugang pang mga operasyon kay ang mga doktor wala na kaayoy mahimo alang kanako. Dili gayod nila ikapasig-uli ang akong hitsura sa dihang ako natawo. Apan nasayod ako nga si Jehova maghatag kanakog bag-ong nawong sa bag-ong kalibotan ug nga mahimo na usab unya akong maanyag.”
[Footnote]
a Gipatik sa mga Saksi ni Jehova.
[Blurb sa panid 26]
Jehova maghatag kanakog bag-ong nawong sa bag-ong kalibotan”
[Blurb sa panid 27]
Inanay nakong nasabtan nga ang Diyos dili angayng basolon