Usa ka Kalibotan nga Walay Sakit

“Ang tanang nasod angayng magtinabangay diha sa espiritu sa pagtambayayong ug pag-alagad aron maseguro ang pagtaganag paninugdang pag-atiman sa panglawas sa tanang tawo sanglit ang pagbatog maayong panglawas sa mga tawo sa usa ka nasod direktang makaapektar ug makahatag kaayohan sa matag laing nasod.”—ALMA-ATA NGA DEKLARASYON, SEPTIYEMBRE 12, 1978.

KAWHAAG-LIMA ka tuig kanhi, ang paninugdang pag-atiman sa panglawas sa tanang tawo sa yuta gihunahuna sa uban nga maorag makab-ot nga tumong. Ang mga delegado sa Internasyonal nga Komperensiya Bahin sa Paninugdang Pag-atiman sa Panglawas, nga nagtigom sa Alma-Ata, nga karon maoy Kazakhstan, mihukom nga bakunahan ang tanang tawo batok sa dagkong mananakod nga mga sakit pagkatuig-2000. Naglaom usab sila nga sa maong tuig, mabatonan sa tanang tawo sa yuta ang paninugdang kahinlo ug mainom nga tubig. Ang tanang nasod nga membro sa World Health Organization (WHO) mipirma sa deklarasyon.

Dalayegon gayod ang tumong, apan makapahiubos ang misunod nga mga hitabo. Ang paninugdang pag-atiman sa panglawas wala gayod mabatoni sa tibuok yuta, ug ang panglawas sa bilyonbilyong tawo sa yuta nameligro gihapon tungod sa mananakod nga mga sakit. Ug kining makapatay nga mga sakit kasagarang motakboy sa mga bata ingon man sa mga hamtong nga anaa sa kinabaskogan nga yugto sa kinabuhi.

Bisan ang kapeligrohan sa tulo ka sakit nga mao ang AIDS, tesis, ug malarya wala makapugos sa mga nasod nga “magtinabangay diha sa espiritu sa pagtambayayong.” Ang bag-ong natukod nga Tibuok-Yutang Pondo sa Pagbugno sa AIDS, Tesis ug Malarya nangayog $13 ka bilyon sa mga gobyerno aron makatabang sa pagpukgo sa maong mga epidemya. Pagkating-init sa 2002, hinunoa, kapig $2 ka bilyon lang ang natanyag​—sa samang tuig, ang gasto sa militar miabot ug mga $700 ka bilyon! Ikasubo, sa nagkabahinbahin nga kalibotan karong adlawa, pipila ra ang kapeligrohan nga makapahiusa sa tanang nasod alang sa kaayohan sa tanang tawo.

Bisan pag maayog tuyo, ang mga ahensiya sa gobyerno bahin sa panglawas limitado sa ilang pagpakigbugno batok sa mananakod nga mga sakit. Mahimong dili mohatag ug igong salapi ang mga gobyerno. Ang mga mikrobyo dili na madutlan sa daghang droga, ug ang mga tawo mahimong moinsistir sa estilo sa kinabuhi nga may dakong risgo nga matakdan sa mga sakit. Dugang pa, ang komon nga mga suliran sa usa ka dapit sama sa kakabos, gubat, ug gutom motaganag mas maayong kahimtang aron ang mga mikrobyo malamposong motakod sa milyonmilyong tawo.

Ang Interes sa Diyos Bahin sa Atong Panglawas

Adunay usa ka kasulbaran. Kita adunay tin-awng ebidensiya nga si Jehova nga Diyos interesado kaayo sa panglawas sa katawhan. Ang atong  sistema sa imyunidad maoy talagsaong pamatuod sa maong interes. Ang daghang balaod nga gihatag ni Jehova sa karaang Israel nagpadayag sa iyang tinguha nga panalipdan sila batok sa mananakod nga mga sakit. a

Si Jesu-Kristo, kinsa nagsumbalik-silaw sa personalidad sa iyang langitnong Amahan, susamang may kahangawa sa masakiton. Ang Ebanghelyo ni Marcos nagbatbat sa panagkita ni Jesus ug sa usa ka tawo nga gitaptan ug sanla. “Kon buot mo lamang,” matod sa sanlahon, “ikaw makahinlo kanako.” Si Jesus naluoy kaayo sa dihang iyang nakita ang kasakit nga giantos sa maong tawo. “Buot ko,” mitubag si Jesus. “Mamahinlo ka!”​—Marcos 1:​40, 41.

Dili ra pipila ka tawo ang milagrosong giayo ni Jesus. Ang magsusulat sa Ebanghelyo nga si Mateo nagtala nga si Jesus “milibot lukop sa tibuok Galilea, nga nagtudlo . . . ug nagwali sa maayong balita sa gingharian ug nag-ayo sa tanang matang sa balatian ug tanang matang sa kaluyahon sa taliwala sa mga tawo.” (Mateo 4:23) Ang iyang pagpang-ayo wala lang magtabang sa masakitong mga tawo sa Judea ug sa Galilea. Ang maong mga pagpang-ayo naghatag kanato ug abanteng hulagway kon sa unsang paagi mahanaw sa kataposan ang tanang matang sa sakit sa dihang ang Gingharian sa Diyos, nga giwali ni Jesus, magmando na nga walay magsusupak ibabaw sa katawhan.

Ang Maayong Panglawas Alang sa Tanan Dili Imposible

Ang Bibliya nagpasalig kanato nga ang maayong panglawas alang sa tanan dili imposible. Napanan-aw ni apostol Juan ang panahon nga ang ‘tolda sa Diyos maanaa uban sa mga tawo.’ Ingong resulta sa maong aksiyon sa Diyos, “ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Maayo ba kaayo kana nga dili na katuohan? Sa sunod bersikulo, ang Diyos mismo nagpahayag: “Kining mga pulonga kasaligan ug matuod.”​—Pinadayag 21:3-5.

Siyempre, aron mawala ang sakit, kinahanglang matapos ang kakabos, gutom, ug gubat, sanglit ang maong mga katalagman nalangkit man sa mananakod  nga mga mikrobyo. Busa gihatag ni Jehova kining dako kaayong buluhaton ngadto sa iyang Gingharian, usa ka langitnong kagamhanan diha sa mga kamot ni Kristo. Ingong tubag sa milyonmilyong tim-os nga mga pag-ampo, kining maong kagamhanan moabot, ug kini maoy magseguro nga ang kabubut-on sa Diyos matuman sa yuta.​—Mateo 6:​9, 10.

Kanus-a nato madahom nga moabot ang Gingharian sa Diyos? Sa pagtubag sa maong pangutana, si Jesus mitagna nga ang katawhan sa kalibotan makakitag sunodsunod nga hinungdanong mga panghitabo nga maoy usa ka ilhanan nga magpaila nga ang Gingharian duol nang molihok. Usa sa mga bahin sa ilhanan, matod niya, mao ang pagbutho sa ‘mga kamatay sa nagkalainlaing mga dapit.’ (Lucas 21:​10, 11; Mateo 24:​3, 7) Ang Gregong pulong alang sa “kamatay” nagtumong sa “bisan unsang makapatay nga mananakod nga sakit.” Nahitabo gayod sa ika-20ng siglo ang makalilisang nga mga pagbutho sa kamatay, bisan pa sa tanang kauswagan sa medikal nga siyensiya.​—Tan-awa ang kahong “Mga Kamatay Sukad 1914.”

Usa ka tagna diha sa basahong Pinadayag, nga susama sa mga pulong ni Jesus diha sa mga Ebanghelyo, naghulagway sa daghang magkakabayo nga nag-uban kang Jesu-Kristo sa dihang makabaton siyag gahom sa langit. Ang ikaupat nga magkakabayo nagsakay sa “usa ka luspad nga kabayo,” ug siya nagpahinabog “makamatay nga hampak” ingong sangpotanan. (Pinadayag 6:​2, 4, 5, 8) Ang pagsusi sa nangamatay gumikan sa grabeng mananakod nga mga sakit sukad 1914 magpamatuod nga kining mahulagwayong magkakabayo tinuod nga nagsakay na. Ang tibuok-kalibotan nga pag-antos gumikan sa “makamatay nga hampak” naghatag ug usa pa ka pamatuod nga haduol nang moabot ang Gingharian sa Diyos. b​—Marcos 13:29.

Bisan pag ang medikal nga siyensiya milampos sa pagpugong sa pagkaylap sa mananakod nga sakit sulod sa pipila ka dekada, ang bag-ong pagbutho naghulga kanato. Tin-aw, nagkinahanglan kitag labaw-tawhanong solusyon sa pagsulbad sa bug-os niini nga suliran. Gisaad sa atong Maglalalang ang pagbuhat gayod niana. Ang manalagnang si Isaias nagpasalig kanato nga ubos sa Gingharian sa Diyos, “walay pumoluyo nga moingon: ‘Ako masakiton.’” Dugang pa, “lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nasod.” (Isaias 25:8; 33:​22, 24) Inigsugod na nianang adlawa, ang sakit mabuntog na sa dayon.

[Mga footnote]

[Kahon sa panid 12]

Mga Kamatay Sukad 1914

Kining mga estadistikaha maoy banabana lang gayod. Hinuon, kini nagpaila sa gidak-on nga ang kamatay naghasi sa katawhan sukad 1914.

◼ Buti (tali sa 300 ka milyon ug 500 ka milyon) Walay epektibong tambal sa buti ang nagama sukad. Ang dakong internasyonal nga programa sa pagbakuna sa kataposan milampos sa pagpuo sa sakit pagka-1980.

◼ Tesis (tali sa 100 ka milyon ug 150 ka milyon) Ang tesis karon mopatay ug mga duha ka milyong tawo kada tuig, ug mga 1 sa 3 ka tawo sa kalibotan ang nagdala sa kagaw sa tesis.

◼ Malarya (tali sa 80 ka milyon ug 120 ka milyon) Sulod sa unang katunga sa ika-20ng siglo, ang nangamatay sa malarya maoy duolag duha ka milyon sa usa ka tuig. Ang labing daghang namatay karon nasentro sa Aprika nga kasikbit sa Sahara, diin ang malarya mopatay gihapon ug kapin sa usa ka milyong tawo kada tuig.

◼ Trangkaso Espanyola (tali sa 20 ka milyon ug 30 ka milyon) Ang pipila ka historyano nag-ingon nga ang nangamatay mas daghan pa. Kining makapatay nga epidemya milukop sa kalibotan niadtong 1918 ug 1919, human gayod sa unang gubat sa kalibotan. “Bisan ang bubonic plague wala makapatay ug ingon ka daghang tawo nga dali kaayo,” matod sa librong Man and Microbes.

◼ Tipos (mga 20 ka milyon) Ang mga epidemya sa tipos kanunayng nag-uban sa gubat, ug ang unang gubat sa kalibotan nakapahinabog usa ka hampak sa tipos nga nagdaot sa mga nasod sa Silangang Uropa.

◼ AIDS (kapig 20 ka milyon) Kining modernong hampak karon nagpatay ug tulo ka milyong tawo kada tuig. Ang presenteng mga banabana sa programa sa AIDS sa Hiniusang Kanasoran nagpaila nga “kon walay dako kaayong mga paningkamot sa pagsanta ug pagtambal, 68 ka milyong tawo mamatay . . . tali sa 2000 ug 2020.”

[Mga hulagway sa panid 11]

Ubos sa Gingharian sa Diyos, ang mga tawo dili na mameligro niini nga mga sakit

AIDS

Malarya

Tesis

[Credit Lines]

AIDS: CDC; malaria: CDC/Dr. Melvin; TB: © 2003 Dennis Kunkel Microscopy, Inc.

[Hulagway sa panid 13]

Giayo ni Jesus ang tanang matang sa balatian ug kaluyahon