Gikan sa Among mga Magbabasa

Pagkamahingpiton Buot kong magpasalamat kaninyo tungod sa mga artikulong “Mga Batan-on Nangutana . . . Nganong Bation Ko man nga Kinahanglan Akong Magmahingpit?” ug “Sa Unsang Paagi Ako Makahunong sa Pagpaningkamot nga Magmahingpit?” (Hulyo 22 ug Agosto 22, 2003) Ang akong pagkalinga pag-ayo sa paghimo sa mga butang sa hingpit nga paagi nahimong bug-at kaayo nga dili na nako madaog; giwagtang niini ang akong kalipay. Tungod kay nahadlok ko nga makasultig sayop, dili gani ko mokomento diha sa Kristohanong mga tigom. Mapasalamaton kaayo ko kang Jehova tungod niining mga artikuloha. Kini nakatabang kanako sa pagkontrolar sa akong negatibong hunahuna.

S. M., Italya

Ang mga artikulo mao gayod ang akong gikinahanglan sa pagtabang kanako sa pagbuntog sa problema nga akong nabatonan sulod sa 50 ka tuig. Abi nakog walay daotan sa pagpaningkamot nga mahimong hingpit​—nga gihatag lamang nako kang Jehova ang kinamaayohan. Natingala ko kon nganong subsob nga dili nako ikasinabot ang akong mga anak, mga kauban sa trabaho, ug Kristohanong mga igsoon. Akong naamgohan karon nga ang pipila sa akong mga panglantaw dili timbang ug wala mahiuyon sa panghunahuna ni Jehova. Tungod sa “pagpalabi sa pagkamatarong,” akong gipahinabo ang kadaot nganhi sa akong kaugalingon ug ngadto sa uban. (Ecclesiastes 7:16) Dili sayon buntogon kining problemaha, apan uban sa tabang ni Jehova andam kong mosulay.

C. H., Tinipong Bansa

Tinuod gayod ang mga komento nga ang pagkamahingpiton makapugong sa usa sa paghimo sa gusto niyang buhaton! Nahigawad ako latas sa katuigan, nga naghunahuna kon nganong dili nako mahimo ang mga butang nga gusto gayod nakong buhaton. Ug ang giingon bahin sa pagkawalay mga higala​—kasagaran walay ganahang makig-uban nako, apan wala nako masabti kon ngano. Karon nahibalo na ko nga ako adunay dugay, malisod nga pagpakigbisog sa unahan ug nga si Jehova motabang kanako.

L. R., Tinipong Bansa

Nakigbisog ko niining problemaha sulod sa daghang tuig, nga wala matagbaw sa akong ginabuhat. Nahupayan kaayo ko nga dili diay kay ako lang ang nakigbisog sa pagkamahingpiton.

A. B., Canada

Nasabtan nako nga walay tawong hingpit, apan ang akong pagbati nagtukmod kanako sa paningkamot nga magmahingpit. Nakapadasig gayod kanako ang pagkabasa nga si Jehova wala magdahom ug kahingpitan gikan kanato ug nga ang hinungdanon kaniya mao ang anaa sa atong kasingkasing. Mapasalamaton ko tungod niining mga artikuloha.

S. K., Alemanya

Ang kahadlok nga mapakyas subsob nga nagpugong kanako sa paglihok. Akong nakat-onan nga ang pagkamahingpiton maoy hinungdan sa pagkamasuk-anon, negatibong panglantaw, depresyon, ug ubos nga pagtamod-sa-kaugalingon. Wala pa nako masulbad sa bug-os ang akong problema, apan nahibalo ko nga gusto nakong makakatawa sa akong mga sayop.

A. I., Japan

Nag-antos ko sa grabeng kahigwaos ug kabalaka. Akong sawayon pag-ayo ang akong kaugalingon, nga moingon, “Ako walay pulos.” Ang inyong mga artikulo naghatag ug makatabang nga panglantaw ug pagdasig. Ang kabug-at nga gihambin sa akong kasingkasing​—ang panginahanglan nga magmahingpit​—migaan na. Ang Kasulatan nakatabang kanako sa pagpasibo sa akong tinamdan ug sa pag-ugmad ug mas positibong panglantaw.

M. N., Japan

St. Petersburg Nagpasalamat kami kaninyo sa artikulong “St. Petersburg​—Ang ‘Bentana nga Pinaagi Niini Makalantaw ang Rusya sa Uropa.’” (Agosto 22, 2003) Sulod sa among duha-ka-semanang hanimon, nakita namo mismo ang makasaysayanhong mga talan-awon sa St. Petersburg. Dili gayod namo makalimtan ang among pagduaw sa sangang buhatan sa mga Saksi ni Jehova, sa Mariinsky Theater, sa State Hermitage Museum, ug sa Peterhof. Daghan kaayong salamat niining artikuloha. Kini nagsilbing among giya niining maanindot nga siyudad!

A. ug O. S., Rusya