Ang Hunahuna sa Bibliya

Ilhanan ba sa Kakulang sa Pagtuo ang Kabalaka?

“KABALAKA GIDILI.” Ubos niining maong ulohan ang usa ka pastor sayo sa ika-20ng siglo nagsulat nga ang kabalaka bahin sa materyal nga mga butang dili lamang sayop kondili “usa ka bug-at nga sala.” Di pa dugay, usa ka komentarista nga nagsulat bahin sa pagbuntog sa kabalisa ug kabalaka nag-ingon, “Ang kabalisa maoy pagpahayag nga kita walay pagsalig sa Diyos.”

Sa maong mga sinulat ang mga awtor nagpasukad sa ilang konklusyon diha sa Wali sa Bukid ni Jesus, nga niana siya miingon: “Hunong na sa pagkabalaka.” (Mateo 6:25) Sanglit ang daghang tawo karon mobatig kabalaka, kita makapangutana: Angay ba nga mobating sad-an ang usa ka Kristohanon bahin sa pagkabalaka? Ang mga pagbati sa kabalaka ilhanan ba sa kakulang sa pagtuo?

Ang Diyos Makasabot sa Atong mga Pagkadi-hingpit

Ang Bibliya wala magtudlo nga ang kakulang sa pagtuo maoy hinungdan sa tanang kabalaka. Tungod kay kita nagakinabuhi sa “mga panahong lisod sagubangon,” daw imposible nga kita dili mabalaka ug diyutay. (2 Timoteo 3:1) Ang matinumanong mga Kristohanon nagsagubang sa adlaw-adlawng mga kabalaka gumikan sa di-maayong panglawas, pagkatigulang, kalisod sa panginabuhi, kasamok diha sa pamilya, krimen, ug ubang mga problema. Bisan pa sa karaang mga panahon, ang mga alagad sa Diyos nag-atubang usab ug mga kahadlok ug mga kabalisa.

Tagda ang asoy sa Bibliya bahin kang Lot. Giingnan siya sa Diyos sa pagkalagiw ngadto sa kabukiran aron dili mamatay sa kalaglagan sa Sodoma ug Gomora. Apan si Lot nabalaka. Siya miingon: “Palihog, dili kana Jehova!” Kay nagpanuko, siya mipadayon: “Apan ako​—ako dili makahimo sa pag-ikyas ngadto sa bukirong rehiyon  sa kahadlok nga ang katalagman basin magpabiling haduol kanako ug ako gayod mamatay.” Nganong nahadlok man si Lot sa kabukiran? Ang Bibliya wala magsulti. Bisan unsa pay rason, si Lot nahadlok gayod. Unsay sanong sa Diyos? Gibadlong ba si Lot tungod sa iyang kakulang sa pagtuo o pagsalig sa Diyos? Wala. Sa kasukwahi, si Jehova nagpakitag konsiderasyon, nga nagtugot kang Lot sa pag-ikyas ngadto sa usa ka duol nga siyudad.​—Genesis 19:​18-​22.

Ania pay laing mga pananglitan sa Bibliya sa matinumanong mga magsisimba nga usahay nabalaka pag-ayo. Ang manalagnang si Elias nahadlok ug mikalagiw human makadawat ug hulga sa kamatayon. (1 Hari 19:​1-4) Si Moises, Ana, David, Habacuc, Pablo, ug ubang mga lalaki ug babaye nga lig-on ug pagtuo nagpahayag usab ug mga kabalaka. (Exodo 4:​10; 1 Samuel 1:6; Salmo 55:5; Habacuc 1:​2, 3; 2 Corinto 11:28) Bisan pa niana, ang Diyos nagmabination ug nagpadayon sa paggamit kanila sa iyang buluhaton, sa ingon nagpakitag tinuod nga pagsabot sa di-hingpit nga mga tawo.

“Ang Sala nga Daling Makasabod Kanato”

Apan, ang nagpadayong kabalaka makapahuyang sa atong pagtuo ug mosangpot sa pagkawala sa pagsalig sa Diyos. Si apostol Pablo naghisgot sa kakulang sa pagtuo ingong “ang sala nga daling makasabod kanato.” (Hebreohanon 12:1) Pinaagi sa paglakip sa iyang kaugalingon, lagmit giadmitir ni Pablo ang iyang kiling nga ‘daling masabod’ sa mga kahimtang sa panalagsang pagkahuyang sa pagtuo.

Lagmit ingon niini ang kahimtang ni Zacarias sa dihang siya wala motuo sa manulonda nga nagpahibalo kaniya nga ang iyang asawa magmabdos. Sa usa ka okasyon ang mga apostoles ni Jesus wala makaayo tungod sa “kagamay sa [ilang] pagtuo.” Bisan pa niana, kadtong mga tawhana padayong nagpahimulos sa pag-uyon sa Diyos.​—Mateo 17:​18-​20; Lucas 1:​18, 20, 67; Juan 17:26.

Sa laing bahin, ang Bibliya naglakip usab sa mga pananglitan sa mga tawong nawad-an sa ilang pagsalig sa Diyos ug nag-antos sa grabeng mga resulta. Pananglitan, daghang Israelinhon nga mibiya sa Ehipto wala pasudla sa Yutang Saad tungod sa ilang kakulang sa pagtuo. Sa usa ka hitabo sila direktang nagsulti batok sa Diyos, nga nag-ingon: “Nganong kami inyong gipagawas sa Ehipto aron lamang mamatay sa kamingawan? Kay walay tinapay ug walay tubig.” Isip pagpakita sa kapungot sa Diyos, ang malala nga mga halas gipatungha aron sa pagsilot kanila.​—Numeros 21:​5, 6.

Ang mga molupyo sa lungsod nga didto nagdako si Jesus, ang Nasaret, wala makapribilehiyo sa pagtan-aw sa daghang milagro nga gihimo sa ilang lugar tungod sa kakulang nilag pagtuo. Dugang pa, ang daotang kaliwatan niadtong panahona nakaagom ug grabeng paghukom gikan kang Jesus tungod sa kakulang sa pagtuo. (Mateo 13:58; 17:17; Hebreohanon 3:19) Sa tukma, si Pablo nagpasidaan: “Pagbantay, mga igsoon, kay basin maugmad diha kang bisan kinsa kaninyo ang daotang kasingkasing nga walay pagtuo pinaagi sa pagpahilayo sa buhi nga Diyos.”​—Hebreohanon 3:12.

Oo, sa grabeng mga kahimtang, ang kakulang sa pagtuo mahimong mosangpot tungod sa usa ka daotang kasingkasing. Apan dili ingon niini ang kahimtang ni Zacarias ug sa mga apostoles ni Jesus sa mga pananglitan nga gihisgotan ganina. Ang ilang kakulang sa pagtuo maoy tungod sa daklit nga kahuyang. Ang ilang katibuk-ang sumbanan sa kinabuhi nagpakita nga sila ‘putli ug kasingkasing.’​—Mateo 5:8.

Ang Diyos Nahibalo sa Atong mga Panginahanglan

Ang Kasulatan motabang kanato sa pagtino tali sa kasagaran nga kabalaka ug sa sala gumikan sa kakulang sa pagtuo. Ang adlaw-adlaw nga mga kabalaka o bisan ang daklit nga kakulang sa pagtuo tungod sa tawhanong kahuyangan dili angayng saypon nga bug-os nga kakulang sa pagsalig sa Diyos tungod sa usa ka daotan, tig-a nga kasingkasing. Busa ang mga Kristohanon dili angayng mahasol sa pagkasad-an tungod lamang sa ilang popanahon nga pagkabalaka.

Bisan pa niana, kinahanglang magbantay kita nga ang kabalaka dili magpabug-at pag-ayo kanato ug magkontrolar sa atong kinabuhi. Busa, masabot nato ang kaalam sa mga pulong ni Jesus sa dihang siya miingon: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’” Kini iyang gisundan sa makapahupay nga mga pulong: “Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.”​—Mateo 6:​25-​33.

[Hulagway sa panid 16]

Si apostol Pablo nakasinatig mga kabalaka