Sa Dihang Wala na Gayoy Magmamingawon Pa

ANG rekord sa Genesis 2:18 nag-ingon nga sa dihang gilalang ang unang tawo, “si Jehova nga Diyos miingon: ‘Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.’” Ang mga tawo gilalang aron makig-uban sa ubang tawo ug modepende kanila.

Si Jehova nga Diyos mao ang labing maayong Higala nga mabatonan nato. Giila ni apostol Pablo si Jehova ingong “ang Amahan sa malumong mga kaluoy ug ang Diyos sa tanang paghupay, kinsa nagahupay kanamo sa tanan namong kasakitan.” (2 Corinto 1:​3, 4) Si Jehova mismo nagpahayag ug kasubo sa pag-antos sa iyang mga alagad. Siya maoy Diyos nga may empatiya. “Siya nahibalo pag-ayo sa atong pagkaumol, nga nahinumdom nga kita abog.” (Salmo 103:14) Dili ka ba madani kang Jehova nga Diyos ug mapasalamaton sa iyang gugma, kalulot, ug pagkamahunahunaon?

Si Jehova Motabang sa mga Mamingawon

Sa nangagi, daghang mga alagad sa Diyos ang nakaagom ug mga kahimtang diin sila mibating mamingawon. Alang kanila si Jehova maoy tuboran sa kadasig ug kahupayan. Tagda, pananglitan, si Jeremias, kinsa nahimong manalagna sa dihang siya batan-on pa. Sa 40 ka magsusulat sa Kasulatan, lagmit nga si Jeremias ang kinadaghanag gipadayag maylabot sa iyang mga pagbati. Mibati siya ug pagkamaulawon ug kawalay-katakos sa dihang nadawat niya ang iyang unang asaynment gikan sa Diyos. (Jeremias 1:6) Aron mahimo niya kadto, siya kinahanglang mosalig kang Jehova sa bug-os. Sa pagkatinuod, si Jehova miuban kaniya “sama sa usa nga makalilisang ang pagkagamhanan.”​—Jeremias 1:​18, 19; 20:11.

 Mga 300 ka tuig una pa kang Jeremias, sa dihang nabalitaan ni Rayna Jezebel nga ang iyang mga manalagna nga maninimba ni Baal gipamatay, siya nanumpa sa pagpatay kang Elias. Mikalagiw si Elias sa gilay-ong mga 450 kilometros ngadto sa Horeb sa Sinai Peninsula. Misulod siya didto sa usa ka langob aron sa pagpalabay sa kagabhion, ug si Jehova nga Diyos nangutana kaniya: “Unsay imong gibuhat dinhi, Elias?” Gisaysay ni Elias nga gibati niya nga siya lang ang bugtong magsisimba ni Jehova sa tibuok Israel, ang bugtong nahibiling manalagna nga madasigon sa pag-alagad sa Diyos. Gipasaligan siya ni Jehova nga wala siya mag-inusara. Si Jehova nag-uban kaniya, ug ang 7,000 ka isigka-Israelinhon ni Elias nahiusa usab uban kaniya, bisan pag wala siya masayod niini. Gihupay ni Jehova si Elias ug gilig-on ang iyang pagtuo. Gitandog niya ang kasingkasing ni Elias, nga nagdasig sa manalagna sa pagpadayon sa iyang asaynment. (1 Hari 19:​4, 9-12, 15-18) Kon, sama ni Elias, bation man ugaling nato ang kamingaw o kawalay-pulos, kita makaampo usab kang Jehova alang sa kalig-on. Dugang pa, ginamit ang maayong panabot, ang Kristohanong mga ansiyano makasultig makapahupay nga mga pulong ngadto sa mga matinumanon, nga magtabang kanila nga makita ang ilang bahin diha sa katumanan sa katuyoan sa Diyos.​—1 Tesalonica 5:14.

Atong makita gikan niini ug sa uban pang mga pananglitan nga si Jehova andam nga modasig ug motaganag mahigugmaong paghupay niadtong nagmamingawon. Oo, “si Jehova mahimong usa ka luwas nga hataas nga dapit alang sa dinaogdaog, usa ka luwas nga hataas nga dapit sa mga panahon sa kasakit.”​—Salmo 9:9; 46:1; Nahum 1:7.

Usa ka Tawo nga May Lalom nga mga Pagbati ug Simpatiya

Si Jesu-Kristo maoy maayong panig-ingnan sa usa nga takos sa pagdayeg tungod sa iyang hingpit nga emosyonal nga panimbang ingong pagsundog kang Jehova. Gihubit ni Lucas ang reaksiyon ni Jesus sa dihang nasugatan niya ang usa ka prosesyon sa paglubong didto sa siyudad sa Nain: “Dihay giyayongan paingon sa gawas nga usa ka patayng tawo, ang bugtong anak nga lalaki sa iyang inahan. . . . Sa nakit-an  siya sa Ginoo, siya giabot ug kaluoy kaniya, ug siya miingon kaniya: ‘Ayaw na paghilak.’ Niana siya miduol ug gihikap ang andas, ug ang nagyayong mihunong, ug siya miingon: ‘Dong, ingnon ko ikaw, Bangon!’ Ug ang patay nga tawo milingkod ug misugod sa pagsulti, ug iyang gihatag siya ngadto sa iyang inahan.” (Lucas 7:12-15) Si Jesus natandog pag-ayo. Siya usa ka mabination nga tawo. Handurawa ang kalipay nga gibati sa nagmamingawong balo tungod sa pagbanhaw ni Jesus sa iyang anak! Wala na siya mibatig kamingaw.

Makasalig kita nga si Jesus “mobati sa atong mga kaluyahon.” May simpatiya gayod siya alang niadtong matarong nga mga tawo nga mamingawon. Sa pagkatinuod, pinaagi kaniya “makadawat kita ug kaluoy ug makakaplag ug dili-takos nga kalulot ingong tabang sa hustong panahon.” (Hebreohanon 4:​15, 16) Pinaagi sa pagsundog kang Jesus, kita makaugmad ug simpatiya alang niadtong nag-antos ug kaguol, kasakit, ug kamingaw. Pinaagi sa pagtabang sa uban, diyutay ra ang purohan nga kita magmamingawon. Apan aduna pay laing paagi aron kita matabangan sa pagbuntog sa negatibong mga pagbati sa kamingaw.

Ang Pulong ni Jehova Makatabang Kanato sa Pagbuntog sa Kamingaw

Daghan ang nakakaplag nga “pinaagi sa paghupay gikan sa mga Kasulatan kita makabatog paglaom.” Ang Pulong sa Diyos naundan ug daghang praktikal nga tambag nga makatabang kanato sa pagbuntog sa kamingaw. (Roma 15:4; Salmo 32:8) Pananglitan, ang Pulong sa Diyos nag-awhag kanato ‘nga dili maghunahuna ug labaw bahin sa atong kaugalingon kay sa angay nga hunahunaon.’ (Roma 12:3) Aron mapadapat kining tambaga, kinahanglan tingaling mohimo kitag pagpasibo sa atong panghunahuna. Ang pagkamapainubsanon​—ang pagbaton ug realistikong panglantaw sa atong mga limitasyon—​makatabang gayod kanato sa pag-ugmad ug balanse ug rasonableng mga panahom. Ang Pulong sa Diyos nagtambag usab kanato sa pag-ugmad ug tiunay nga personal nga interes sa uban. (Filipos 2:4) Nalangkit dinhi ang pagtinabangay. Kon kita magpakitag kahingawa sa uban, ang uban usab magpakitag kahingawa kanato. Kining maayong panag-ubanay motabang sa pagwala sa kahaw-ang nga atong bation ug mohatag ug kahulogan sa atong kinabuhi.

Ang Bibliya nagdasig kanatong mga Kristohanon “nga dili talikdan ang atong mga panagkatigom.” (Hebreohanon 10:​24, 25) Busa pakigbahin sa mapuslanong mga kalihokan, sama sa pagtambong nga regular sa mga tigom sa mga Saksi ni Jehova. Walay duhaduha nga ang Kristohanong mga tigom makaamot sa atong espirituwal, emosyonal, ug pisikal nga kaayohan. Ang pagsangyaw sa maayong balita sa Gingharian sa Diyos maoy makapalipay nga paagi sa pagpuno sa atong kinabuhi ug maayong kalihokan. Kini magpatumong sa atong hunahuna sa hustong direksiyon, magpalig-on sa atong pagtuo, ug magpanalipod sa atong paglaom.​—Efeso 6:14-17.

Duol kang Jehova diha sa pag-ampo. Si David miawhag: “Itugyan ang imong palas-anon kang Jehova, ug siya magasapnay kanimo.” (Salmo 55:22) Pinaagi sa pagtuon sa Pulong sa Diyos, ikaw magmalipayon. (Salmo 1:1-3) Kon ikaw mobatig kamingaw, palandonga ang mahigugmaong pag-atiman ni Jehova ingon sa makita diha sa iyang Pulong. Ang salmista misulat: “Ang akong kalag mitapot sa abog. Tipigi akong buhi sumala sa imong pulong.”​—Salmo 119:25.

Sa Dihang Wala nay Moingon, “Ako Mamingawon”

Si Jehova nga Diyos nagsaad kanato ug usa ka bag-ong kalibotan nga wala nay kabalaka, kahigawad, ug negatibong mga pagbati. Ang Bibliya nag-ingon: “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:4) Oo, lakip sa kanhing mga butang nga mawala na unya mao ang pisikal, mental, ug emosyonal nga mga kasakit nga atong nasinatian karon.

Ang yuta mapuno unya ug mahigalaong mga tawo nga magpatugob sa atong kinabuhi. Wagtangon ni Jehova hangtod sa hangtod ang atong kamingaw pinaagi sa iyang langitnong Gingharian diha sa mga kamot ni Jesu-Kristo. Hatagan unya niya kita ug bag-o ug maayong mga butang nga pagabuhaton dinhi sa yutang paraiso. Ang adlaw hapit nang moabot sa dihang dili na gayod kita moingon pa, “Ako mamingawon.”

 [Hulagway sa panid 8, 9]

Uban sa tabang ni Jehova, kita dili magmamingawon, bisag nag-inusara

[Mga hulagway sa panid 10]

Unsay atong makat-onan gikan sa mga asoy sa Bibliya bahin ni Jeremias ug Elias?